សហជីពត្រៀមខ្លួនជួបប្រជុំត្រីភាគីកំណត់ប្រាក់ឈ្នួលឆ្នាំ២០១៩នៅដើមខែក្រោយ
កិច្ចប្រជុំត្រីភាគីស្ដីពីការកំណត់ប្រាក់ឈ្នួលអប្បរមាឆ្នាំ២០១៩ នឹងចាប់ផ្ដើមនៅថ្ងៃទី៥ខែកញ្ញាខាងមុខនេះ។ ហើយមុនជំនួបជាលក្ខណៈត្រីភាគីចាប់ផ្ដើមក្រុមសហជីពក៏ត្រៀមខ្លួនជួបគ្នាដាច់ដោយឡែកផងដែរ ដើម្បីឈានទៅកំណត់តួលេខរួម។
ចុះផ្សាយនៅថ្ងៃ៖
ស្តាប់ - ០១:៤៧
លោក ប៉ាវ ស៊ីណា ប្រធានសហភាពចលនាកម្មករកម្ពុជា បានថ្លែងប្រាប់វិទ្យុបារាំងអន្តរជាតិនៅថ្ងៃសៅរ៍នេះថា តាមគម្រោងកិច្ចប្រជុំត្រីភាគីស្ដីពីការកំណត់ប្រាក់ឈ្នួលអប្បរមាឆ្នាំ២០១៩ នៅថ្ងៃទី៥ខែកញ្ញា នឹងមានចូលរួមពីភាគីតំណាងឲ្យរដ្ឋាភិបាលគឺក្រសួងការងារ និងបណ្ដុះបណ្ដាលវិជ្ជាជីវៈ ភាគីនិយោជកតំណាងឲ្យថៅកែ និងភាគីសហជីពតំណាងឲ្យកម្មករ-កម្មាការិនី។ ហើយជំនួបនៅថ្ងៃទី៥ខែកញ្ញា នឹងឈានទៅជជែកដល់ការកំណត់តួលេខរួមតែម្ដង។
បើតាមលោក ប៉ាវ ស៊ីណា មុនជំនួបជាលក្ខណៈត្រីភាគីចាប់ផ្ដើម គឺសហជីព និងដៃគូពាក់ព័ន្ធដែលរួមមាន អង្គការពលកម្មអន្តរជាតិហៅកាត់ ILO កំពុងបើកវគ្គបណ្ដុះបណ្ដាលស្ដីពីដំណើការចរចាប្រាក់ឈ្នួល។ ទន្ទឹមនឹងនេះ ក្រុមសហជីពក៏គ្រោងជួបគ្នាដាច់ឡែក ដើម្បីកំណត់តួលេខរួម មុននឹងយកតួលេខានោះទៅដាក់លើកតុជជែកជាលក្ខណៈត្រីភាគី។ ប៉ុន្តែយ៉ាងណាមិញ លោក ប៉ាវ ស៊ីណា បានបង្ហាញក្ដីព្រួយបារម្ភថា បើកាលណាសហជីពជជែកមិនទាន់ត្រូវរ៉ូវគ្នាលើតួលេខរួមជាមុនទេ ការចរចាជាលក្ខណៈត្រីភាគីអាចនឹងជួបការលំបាក។ ព្រោះតាមបទពិសោធកន្លងមក ក្រុមសហជីពធ្លាប់ជួបប្រទះបញ្ហាខ្វែងគំនិតគ្នាលើតួលេខរួមរួចមកហើយ។
សម្រាប់ លោក ប៉ាវ ស៊ីណា សហជីពលោកចង់បានទំហំប្រាក់ខែគោល២០០ដុល្លារក្នុងមួយខែ សម្រាប់កម្មករកម្មការិនី ដើម្បីឲ្យពួកគាត់រស់នៅបានសមរម្យ។ យ៉ាងណាក៏ដោយ លោក ប៉ាវ ស៊ីណា បញ្ជាក់ថា សហជីពលោក នឹងទាមទារប្រាក់ខែគោល ដោយពិនិត្យមើលលើការបញ្ជាទិញ និងលទ្ធភាពរបស់ថៅកែដែរ។
គួររំឭកថា នៅ២០១៨នេះ កម្មកររោងចក្រកាត់ដេរទទួលបានប្រាក់ឈ្នួលអប្បបរមា ចំនួន១៧០ដុល្លារក្នុង១ខែ។ បើបូករួមនឹងប្រាក់លើកទឹកចិត្តផ្សេងៗទៀត កម្មករមា្នក់អាចទទួលបានប្រាក់ឈ្នួលប្រហាក់ប្រហែល២០០ដុល្លារ ក្នុងមួយខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ