ក្រសួងកសិកម្ម៖ ស្រូវដែលខូចខាតដោយទឹកជំនន់ប្រមាណជាង៤ពាន់ហិចតាត្រូវបានស្តារឡើងវិញ
ក្រសួងកសិកម្ម បានចុះអន្តរាគមន៍លើបញ្ហាស្រូវប៉ះពាល់ដោយគ្រោះទឹកជំនន់ នៅខេត្តចំនួន៨ដែលមានស្រូវប្រមាណ២ម៉ឺនហិចតាទទួលផលប៉ះពាល់ តែមានប្រមាណជា៦ពាន់ហិចតាប៉ុណ្ណោះដែលទទួលរងការខូចខាត។ ការស្ដារឡើងវិញនេះគឺដោយប្រើវិធីសាប ព្រួសស្រូវថ្មី ជំនួសស្រូវចាស់ដែលខូចខាត ជៀសវាងនូវការធ្លាក់ចុះនៃចំនួនកសិផលស្រូវក្នុងស្រុក។
ចុះផ្សាយនៅថ្ងៃ៖
ស្តាប់ - ០១:៤៤
អត្ថបទដោយ៖ ទី កញ្ញា និង ហេង ពុធីរៈ
លោក ឡោ រស្មី អ្នកនាំពាក្យក្រសួងកសិកម្ម នៅថ្ងៃទី០៩ សីហា បានប្រាប់វិទ្យុបារាំងថា ដើម្បីស្ដារស្រូវដែលខូចខាត ក្រសួងបានចុះចែកដោយផ្ទាល់នូវពូជស្រូវស្រាលមិនប្រកាន់រដូវ ទៅខេត្តគោលដៅមួយចំនួន។ លោកបានបន្ថែមថា ប្រភេទស្រូវស្រាលមិនប្រកាន់រដូវ អាចច្រូតកាត់បានលឿន ក្នុងរយៈពេលបីខែប៉ុណ្ណោះ ហើយប្រជាកសិករអាចទទួលបានផលស្រូវក្នុងកម្រិតខ្ពស់។
ចាប់តាំងពីពាក់កណ្ដាលខែកក្កដា រហូតដល់ដើមខែសីហានេះ ជំនន់ទឹកភ្លៀងបានបណ្ដាលឲ្យប៉ះពាល់ដំណាំស្រូវជាច្រើនតាមខេត្តគោលដៅមួយចំនួន ហើយក្នុងនោះ ខេត្តព្រះវិហារទទួលរងការខូចខាតស្រូវច្រើនជាងគេ រហូតដល់ជាង៦ពាន់ហិចតា ហើយបច្ចុប្បន្ន ក្រសួងកំពុងតែធ្វើការដោះស្រាយជាមួយអាជ្ញាធរពាក់ព័ន្ធ។
បញ្ហានេះ ក្រសួងកសិកម្មបានដោះស្រាយដោយណែនាំឲ្យកសិករទាំងអស់ រកពូជស្រូវស្រាលមិនប្រកាន់ រដូវ និងដំណាំរួមផ្សំផ្សេងៗទៀត។ រីឯលទ្ធផល ផ្ទៃដីប្រមាណជា៥៨០ពាន់ហិចតា ត្រូវបានដាំស្រូវប្រភេទស្រាលនេះ។ បន្ថែមពីលើនេះ ក្រសួងនៅតែបន្តចុះធ្វើអន្តរាគមន៍ជួយស្ទូង ព្រួស និងស្តារឡើងវិញនូវស្ថានភាពខូចខាតទាំងនោះ ឲ្យទាន់រដូវកាលដំាំដុះ នាចុងរដូវវស្សានេះ។
អ្នកនាំពាក្យដដែលបានឲ្យដឹងទៀតថា ខេត្តគោលដៅទាំងនោះមាន ខេត្តបន្ទាយមានជ័យ កំពង់ចាម កំពង់ធំ ក្រចេះ ព្រះវិហារ ស្ទឹងត្រែង និងឧត្តរមានជ័យ ក្នុងនោះ ខេត្តឧត្តរមានជ័យ ដំណាំស្រូវមិនមានការខូចខាតឬប៉ះពាល់ឡើយ ព្រោះជំនន់ទឹកភ្លៀងស្រកលឿន ធ្វើឲ្យស្រូវដុះបានល្អឡើងវិញ។
សូមរំលឹកថា គិតត្រឹមថ្ងៃទី២ សីហា ឆ្នាំ២០១៧ ស្ថានភាពដំណាំស្រូវរងផលប៉ះពាល់ ដោយគ្រោះទឹកជំនន់ ដែលបង្កឡើងនៅចុងខែកក្កដា លើផ្ទៃដីសរុបចំនួនជាង២ម៉ឺនហិចតា។ ផលប៉ះពាល់ និងខូចខាត គឺកើតឡើងច្រើនទៅលើខេត្តចំនួន៨ តែបើតាមរបាយការណ៍ ក្រសួងផ្ដោតតែ៤ខេត្តប៉ុណ្ណោះ គឺ កំពង់ធំ ក្រចេះ ស្ទឹងត្រែង និងព្រះវិហារ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ