CCHR៖ តំបន់សេដ្ឋកិច្ចពិសេសមានផលវិជ្ជមាន តែប៉ះពាល់ធ្ងន់ធ្ងរដល់សិទ្ធិសហគមន៍មូលដ្ឋាន
អង្គការសិទ្ធិមនុស្សក្នុងស្រុកមួយ បានកត់សម្គាល់ថា តំបន់សេដ្ឋកិច្ចពិសេសមានផលវិជ្ជមានក្នុងការអភិវឌ្ឍសេដ្ឋកិច្ច ប៉ុន្តែក៏មានផលប៉ះពាល់ធ្ងន់ធ្ងរផងដែរ ដល់សិទ្ធិសហគមន៍មូលដ្ឋាន។ នេះគឺជាការលើកឡើងនៅក្នុងសលាកប័ត្រព័ត៌មានរបស់មជ្ឈមណ្ឌលសិទ្ធិមនុស្សកម្ពុជា ប្រចាំខែកញ្ញាឆ្នាំ២០១៨។ ការចេញផ្សាយរបាយការណ៍នេះ ធ្វើឡើងស្របពេលដែលសហគមន៍ជាច្រើនបាននិងកំពុងតែរៀបចំទិវាសិទ្ធិលំនៅឋានពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
នៅក្នុងសលាកប័ត្រព័ត៌មានរបស់ខ្លួន មជ្ឈមណ្ឌលសិទ្ធិមនុស្សកម្ពុជា បានលើកយកករណីសិក្សាមួយកន្លែងនៅតំបន់សេដ្ឋកិច្ចពិសេសនៃប្រទេសកម្ពុជា។ តំបន់សេដ្ឋកិច្ចពិសេសគឺសំដៅដល់កន្លែងប្រមូលផ្តុំសកម្មភាពឧស្សាហកម្ម ការនាំចេញ-នាំចូល ដែលស្ថិតក្រោមច្បាប់កំណត់។
តាមការសិក្សារបស់មជ្ឈមណ្ឌលសិទ្ធិមនុស្សកម្ពុជា តំបន់សេដ្ឋកិច្ចពិសេសបានផ្ដល់ផលវិជ្ជមានក្នុងការអភិវឌ្ឍសេដ្ឋកិច្ច ប៉ុន្តែក៏មានផលប៉ះពាល់ធ្ងន់ធ្ងរដល់សិទ្ធិសហគមន៍មូលដ្ឋានផងដែរ។ នៅតំបន់សេដ្ឋកិច្ចពិសេសថ្មដា ក្នុងខេត្តពោធិ៍សាត់ ជាប់ព្រំដែនថៃ ដែលគ្រប់គ្រងដោយឧកញ៉ា ទ្រី ភាព អង្គការនេះរកឃើញថា មានពលរដ្ឋ៩៧គ្រួសាររងផលប៉ះពាល់ ដោយត្រូវបានគេបង្ខំឲ្យចាកចេញដោយគ្មានការជូនដំណឹងជាមុន និងថែមទាំងមានប្រើអំពើហិង្សា និងខូចខាតព្រទ្យសម្បត្តិទៀតផង។ នេះជាការបញ្ជាក់នៅក្នុងសលាកប័ត្រព័ត៌មានអង្គការ CCHR។
រហូតមកទល់ពេលនេះ នៅសល់ពលរដ្ឋ១៧គ្រួសារទៀត ដែលមិនទាន់ទទួលបានសំណងពីការបណ្តេញចេញ ខណៈពលរដ្ឋផ្សេងទៀតបង្ខំចិត្តទទួលយកសំណងមិនសមរម្យ។ នេះបើតាម មជ្ឈមណ្ឌលសិទ្ធិមនុស្សកម្ពុជា។
ឆ្លើយតបនឹងបញ្ហាទាំងនេះ មជ្ឈមណ្ឌលសិទ្ធិមនុស្សកម្ពុជា បានផ្តល់អនុសាសន៍ថា ស្ថាប័នពាក់ព័ន្ធ ត្រូវពិគ្រោះយោបល់ជាមួយសហគមន៍ដែលរងការប៉ះពាល់ជាមុន ដោយវាយតម្លៃផលប៉ះពាល់បរិស្ថាន និងសង្គម មុនយល់ព្រមឲ្យបង្កើតតំបន់សេដ្ឋកិច្ចពិសេស។ លើសពីនេះទៀត ក៏ត្រូវទទួលយកមកពិចារណាការអនុវត្តសិទ្ធិមនុស្ស និងគោលនយោបាយវិនិយោគិន ព្រមទាំងបង្កើតយន្តការទទួលពាក្យបណ្តឹងដោយឯករាជ្យដើម្បីដោះស្រាយផលប៉ះពាល់ជាអវិជ្ជមាននៅតំបន់សេដ្ឋកិច្ចពិសេស។ តំបន់សេដ្ឋកិច្ចពិសេសនៅកម្ពុជាដែលចំនួន៣៨កន្លែងគិតត្រឹមឆ្នាំ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ