លោក ជា មុនី ត្រូវបានតុលាការកោះហៅឲ្យចូលបំភ្លឺ ចំខួប១៤ ឆ្នាំ នៃឃាតកម្មបងប្រុសរបស់លោក
តុលាការក្រុងភ្នំពេញ នៅថ្ងៃនេះ បានចេញដីកាកោះហៅ លោក ជា មុនី អតីតប្រធានសហភាពសហជីពសេរីកម្មករនៃព្រះរាជាណាចក្រកម្ពុជា ឲ្យចូលបំភ្លឺក្នុងនាមជាជនសង្ស័យ ពាក់ព័ន្ធនឹងការញុះញង់ឱ្យសហគមន៍អឺរ៉ុប និងអាមេរិកដាក់ទណ្ឌកម្មសេដ្ឋកិច្ចលើកម្ពុជា។ យ៉ាងណាក៏ដោយ នៅព្រឹកនេះ មិនមានឡើយវត្តមាន លោក ជា មុនី ចូលបំភ្លឺ តាមការកំណត់របស់តុលាការក្រុងភ្នំពេញ។
ចុះផ្សាយនៅថ្ងៃ៖
ដីកាកោះហៅឲ្យ លោក ជា មុនី អតីតប្រធានសហភាពសហជីពសេរីកម្មករនៃព្រះរាជាណាចក្រកម្ពុជា ចូលបំភ្លឺក្នុងនាមជាជនសង្ស័យនេះ ធ្វើឡើងទៅតាមបណ្តឹងរបស់ក្រុមមេធាវីតំណាងសហជីពប្រមាណ ១២០ស្ថាប័ន កាលពីថ្ងៃទី ១៨ ខែធ្នូ ឆ្នាំ២០១៧ កន្លងទៅ។
បើតាមបណ្តឹងចុះថ្ងៃទី១៨ ខែធ្នូ របស់ក្រុមមេធាវីតំណាងសហជីពទាំងនោះ លោក ជា មុនី បានអំពាវនាវទៅសហគមន៍អឺរ៉ុប ឲ្យដាក់ទណ្ឌកម្មមកលើរដ្ឋាភិបាលកម្ពុជា។ ក្រុមសហជីពមួយចំនួន ចាត់ទុកការអំពាវនាវរបស់ លោក ជា មុនី ថាមានចេតនាញុះញង់ឲ្យអ្នកបញ្ជាទិញទាំងអស់ឈប់ទិញផលិតផលវាយនភ័ណ្ឌ រួមទាំងផលិតផលផ្សេងៗពីកម្ពុជាទៅសហគមន៍អ៊ឺរ៉ុប និងញុះញង់ឲ្យកម្មករស្អប់ខ្ពើមរដ្ឋាភិបាល។
តាមរយៈបណ្តឹងនេះ ក្រុមសហជីព បានស្នើឱ្យតុលាការផ្តន្ទាទោសលោក ជា មុនី ទៅតាមច្បាប់ និងទាមទារសំណងជំងឺចិត្តចំនួនមួយលានដុល្លារសហរដ្ឋអាមេរិក។ យ៉ាងណាក៏ដោយ នៅព្រឹកថ្ងៃទី ២២ មករា នេះ លោក ជា មុនី មិនបានចូលបំភ្លឺនៅតុលាការតាមដីកោះហៅរបស់តុលាការក្រុងភ្នំពេញនោះឡើយ។
កាលពីថ្ងៃទី០៦ ខែធ្នូ ឆ្នាំ២០១៧ អាមេរិក បានសម្រេចរឹតបន្តឹងទិដ្ឋាការមន្ត្រីជាន់ខ្ពស់កម្ពុជា និងក្រុមគ្រួសាររបស់ពួកគេ ដោយថា មានជាប់ពាក់ព័ន្ធនឹងការបំផ្លាញលទ្ធិប្រជាធិបតេយ្យនៅកម្ពុជា។ បន្ទាប់ពីអាមេរិកចាត់វិធានការបែបនេះ សភាសហភាពអឺរ៉ុប បានសម្រេចកាលពីថ្ងៃទី១៤ ខែធ្នូកន្លងមក ឲ្យគណៈកម្មការអឺរ៉ុបផ្អាកការផ្ដល់ភាពអនុគ្រោះពន្ធគយមកដល់កម្ពុជា។
ជាការកត់សម្គាល់ ដីកាកោះហៅ លោក ជា មុនី អតីតប្រធានសហភាពសហជីពសេរីកម្មករនៃព្រះរាជាណាចក្រកម្ពុជា ធ្វើឡើងចំថ្ងៃ នៃខួប១៤ឆ្នាំ នៃឃាតកម្មបាញ់សម្លាប់ លោក ជា វិជ្ជា អតីតមេដឹកនាំសហជីពកម្មករដ៏ល្បីល្បាញ នៅកណ្តាលទីក្រុងភ្នំពេញ។ នៅថ្ងៃខួប១៤ឆ្នាំ នៃការបាញ់សម្លាប់លោក ជា វិជ្ជា គេឃើញមានប្រធានសហជីពនិងកម្មករ-កម្មការិនីមួយចំនួន នាំគ្នាទៅគោរពវិញ្ញាណក្ខន្ធរបស់លោក ជា វិជ្ជា ដោយមានដាក់កម្រងផ្កានៅមុខរូបសំណាករបស់លោក នៅជិតវិមានឯករាជ្យ។
នៅក្នុងខួបគម្រប់១៤ឆ្នាំ នៃឃាតកម្ម លោក ជា វិជ្ជា នៅថ្ងៃទី ២២ ខែមករា ឆ្នាំ២០១៨ នេះដែរ អតីតគណបក្សសង្រ្គោះជាតិវិញ ក៏បានចេញសេចក្តីថ្លែងការណ៍មួយ ដោយថ្លែងថា គណបក្សសង្រ្គោះជាតិ មិនអាចបំភ្លេចបាននូវវីរភាពរបស់ លោក ជា វិជ្ជា ដែលបានលះបង់គ្រប់បែបយ៉ាង និងធ្វើពលិកម្ម ដើម្បីជួយកម្មករ កម្មការិនីខ្មែរ ប្រឆាំងនឹងការជិះជាន់ ឲ្យទទួលបានសិទ្ធិ សេរីភាព ផលប្រយោជន៍ និងលក្ខខណ្ឌការងារ ដែលការពារដោយច្បាប់ជាតិ និងអន្តរជាតិ។
អតីតគណបក្សសង្រ្គោះជាតិ ក៏បានអំពាវនាវឲ្យអាជ្ញាធរមានសមត្ថកិច្ចធ្វើការស៊ើបអង្កេត ស្រាវជ្រាវឲ្យបានពិតប្រាកដ ក្នុងការវែកមុខរកឃាតករពិត និងអ្នកនៅពីក្រោយខ្នងឃាតករ នាំយកមកផ្តន្ទាទោសតាមច្បាប់ជាធរមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ