អង្គការបរិស្ថាន៖ ចិនកំពុងបំផ្លាញឈើប្រណិតនៅកម្ពុជា និងបណ្តាប្រទេសក្នុងតំបន់ទន្លេមេគង្គ
អង្គការធ្វើការងារបរិស្ថាន បានចេញរបាយការណ៍កាលពីពេលថ្មីៗនេះថា ប្រទេសចិនគឺជាមេឈ្មួញធំនៅពីក្រោយការបំផ្លាញឈើប្រណិតនៅតំបន់ទន្លេមេគង្គ។ តំបន់ទន្លេមេគង្គដែលរួមមានកម្ពុជា ឡាវ វៀតណាម ថៃ និងភូមា។ អង្គការនេះបានបញ្ជាក់ថា ប្រទេសចិនបាននាំចូលឈើប្រណិតយ៉ាងគំហុកជាច្រើនពាន់លានដុល្លារនៅរយៈពេលប៉ុន្មានឆ្នាំនេះចុងក្រោយនេះដើម្បីកែច្នៃ។ ឈើប្រណិតនៅកម្ពុជា រងការកាប់បំផ្លាញយ៉ាងសម្បើមណាស់ដែរ។ សង្គមស៊ីវិលស្នើឱ្យរដ្ឋាភិបាលចាត់វិធានការជាបន្ទាន់។
ចុះផ្សាយនៅថ្ងៃ៖
ស្តាប់ - ០២:២៩
ចិនជាមេឈ្មួញឈើធំបំផុតដែលនៅពីក្រោយការបំផ្លាញឈើប្រណិតនៅកម្ពុជានិងបណ្តាប្រទេសចំនួន៤ផ្សេងទៀតនៅតំបន់ទន្លេមេគង្គ។ នេះបើតាមការរបាយការណ៍របស់ទីភ្នាក់ងារស៊ើបអង្កេតបរិស្ថាន(EIA)កាលពីដើមសប្តាហ៍នេះ។ ក្នុងសេចក្តីប្រកាសព័ត៌មានដែលចេញផ្សាយពីទីក្រុងបាងកក អង្គការនេះ បានចោទរដ្ឋាភិបាលចិនថាបានគាំទ្រអាជីវកម្មគ្រឿងកៃច្នៃ ចេញពីឈើប្រណិត។ ឈើប្រណិតដែលចិនបានទិញយ៉ាងគំហុកចេញពីតំបន់ទន្លេមេគង្គដែលមាន កម្ពុជា ឡាវ វៀតណាម ថៃ និងភូមា។
បើតាមការបញ្ជាក់ពីអង្គការដដែលនេះ ក្នុងរយៈពេល១៣ឆ្នាំពីឆ្នាំ២០០០ដល់ឆ្នាំ២០១៣ ចិនបានទិញឈើប្រណិតចំនួន៣.៥ពាន់លានម៉ែត្រគូបពីពិភពលោក។ ហើយឈើប្រណិតប្រមាណជាពាក់កណ្តាលដែលមានតម្លៃប្រមាណ២.៤ពាន់លានដុល្លារសហរដ្ឋអារមេរិក ត្រូវបាននាំចូលពីប្រទេសនៅតំបន់ទន្លេរមេគង្គក្នុងនោះ ក៏មានដែរពីព្រៃឈើកម្ពុជា។
ព្រៃឈើកម្ពុជាដែលត្រូវបានគេរិះគន់ថារងការកាប់បំផ្លាញយ៉ាងអាណាធិបតេយ្យ ក្នុងរយៈពេលជាច្រើនឆ្នាំចុងក្រោយ។ លោក ឈឹម សាវុធ ប្រធានអង្គការការពារធនធានធម្មជាតិបានបញ្ជាក់ប្រាប់នៅថ្ងៃព្រហស្បតិ៍នេះថា ក្នុងមួយថ្ងៃៗ ឈើប្រណិតមិនតិចជាងចន្លោះពី១ទៅ២ពាន់ម៉ែត្រគូបទេដែលត្រូវបានដឹកចេញតាមច្រកព្រំដែនទាំងគោក និងដែនទឹក។ ហើយលោកថា ប្រទេសចិនគឺជាមេឈ្មួញធំដែលទិញឈើកម្ពុជាប្រមាណ៩០ភាគរយពីប្រទេសវៀតណាម ។ បើតាមប្រធានអង្គការធនធានធម្មជាតិដដែលនេះ បច្ចុប្បន្នមេឈ្មួញរកស៊ីព្រៃឈើនៅកម្ពុជាកំពុងសម្រុកកាប់ព្រៃនៅតំបន់កន្ទុយនាគ និងនៅក្នុងខេត្តស្ទឹងត្រែង។
ប៉ុន្តែអ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានលើកឡើងថា រដ្ឋាភិបាលកម្ពុជាកំពុងបើកយុទ្ធនាការទប់ស្កាត់ការកាប់បំផ្លាញព្រៃឈើតាមរយៈការបង្កើតច្បាប់គ្រប់គ្រង់ព្រៃជាដើម។ លោកផៃ ស៊ីផានបន្តថា ប្រជាពលរដ្ឋសាមញ្ញមួយចំនួនក៏បានរួមចំណែកក្នុងការកាប់បំផ្លាញព្រៃឈើនៅកម្ពុជាផងដែរ។ បើតាមលោកអ្នកនាំពាក្យរូបនេះ ការចរាចរណ៍ឈើមួយចំនួនពីកម្ពុជា គឺមានអាជ្ញាបណ្ណអនុញ្ញាតពីរដ្ឋាភិបាល។
យ៉ាងណាក៏ដោយទាក់ទងនឹងវិនាសកម្មព្រៃឈើនៅកម្ពុជា លោក ឈឹម សាវុធ ប្រធានអង្គការការពារធនធានធម្មជាតិ បានលើកឡើងជាសំណួរដល់រដ្ឋាភិបាលថា តើមានឆន្ទៈ និងចេតនាទប់ស្កាត់ការកាប់ព្រៃឈើនៅកម្ពុជាដែរឬទេ? ហើយប្រធានអង្គការការពារធនធានធម្មជាតិរូបដដែលនេះ បានអះអាងថា បើគ្មានការគាំពារជាបន្ទាន់ពីរដ្ឋាភិបាលប្រឆាំងនឹងការកាប់បំផ្លាញព្រៃឈើដែលនៅតែបន្តយ៉ាងគគ្លើននោះទេ ព្រៃឈើប្រណិតកម្ពុជានឹងត្រូវផុតពូជនៅចុងឆ្នាំ២០១៤នេះតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ