សង្គមស៊ីវិលបារម្ភពីការលួចចូលកាប់ឈើខុសច្បាប់របស់ជនជាតិវៀតណាមនៅខេត្តរតនគិរី
សង្គមស៊ីវិល និង ប្រជាសហគមន៍ បានសម្តែងការព្រួយបារម្ភយ៉ាងខ្លាំងពីវត្តមានជនជាតិវៀតណាមដែលបានលួចចូលកាប់ឈើខុសច្បាប់យ៉ាងអាណាធិបតេយ្យនៅក្នុងស្រុកអូរយ៉ាដាវ ខេត្តរតនគិរី ។ ប្រជាសហគមន៍ និង សង្គមស៊ីវិល បានលើកឡើងថា អាជ្ញាធរបានបណ្តែតបណ្តោយ និង មិនមានវិធានទប់ស្កាត់ជនជាតិវៀតណាមទាំងអស់នោះនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ប្រជាសហគមន៍នៅក្នុងស្រុកអូរយ៉ាដាវ ខេត្តរតនគិរី លោក រចំ ខាំ បានថ្លែងប្រាប់វិទ្យុបារាំងអន្តរជាតិនៅថ្ងៃអាទិត្យ ទី ២៤ សីហា ថា លោកបារម្ភយ៉ាងខ្លាំងពីការលួចចូលកាប់ឈើខុសច្បាប់ពីសំណាក់ជនជាតិវៀតណាមនៅក្នុងសហគមន៍របស់លោក។ លោក បន្តថា អាជ្ញាធរមិនបានទប់ស្កាត់ជនជាតិវៀតណាមទាំងនោះទេ ហើយថា បើបែបនេះតទៅទៀត ព្រៃឈើនៅក្នុងស្រុកអូរយ៉ាដាវ នឹងត្រូវហិនហោចជាមិនខាន។
លោក ឆាយ ធី មន្ត្រីសម្របសម្រួលរបស់សមាគមអាដហុកប្រចាំនៅខេត្តរតនគិរី បានប្រាប់វិទ្យុបារាំងបន្ថែមថា ជនជាតិវៀតណាមទាំងនោះបានលួចចូលមកកាប់ឈើខ្មែរតាមច្រករបៀងអូរថ្ម។ លោក បន្តថា កន្លងមក លោក រួមនឹងប្រជាសហគមន៍នៅក្នុងស្រុកអូរយ៉ាដាវបានតាមដាន និង បានចាប់ជនជាតិវៀតណាមទាំងនោះប្រគល់ឲ្យសមត្ថកិច្ចជាច្រើនលើកមកហើយ។
លោក ឆាយ ធី បានកត់សម្គាល់ថា ការលួចចូលកាប់ខុសច្បាប់ពីសំណាក់ជនជាតិវៀតណាមនេះ បានកើតឡើងតាំងពីឆ្នាំ ២០១២ មកម្ល៉េះ ហើយមកដល់ពេលនេះសកម្មភាពខុសច្បាប់នៅតែកើតឡើងយ៉ាងអនាធិបតេយ្យនៅក្នុងស្រុកអូរយ៉ាដាវ។ មន្ត្រីសម្របសម្រួលរូបនេះ ចោទថា មន្ត្រីដែលយាមកាមនៅច្រករបៀងនៅព្រំដែនកម្ពុជា-វៀតណាមបានឃុបឃិតជាមួយជនជាតិវៀតណាមទើបបង្កឲ្យសកម្មភាពបែបនេះកើតឡើង។
មន្ត្រីយាមកាមនៅច្រកព្រំដែនកម្ពុជា-វៀតណាម មិនអាចស្វែងរកការទាក់ទងសុំការអត្ថាធិប្បាយបាននៅឡើយទេនៅថ្ងៃអាទិត្យទី ២៤ សីហា ។ ចំណែក លោក ថង សាវុន អភិបាលខេត្តរតនគិរីក៏មិនបានអត្ថាធិប្បាយអ្វីដែរ ដោយលោកអះអាងថា កំពុងបើកបរ។
ក៏ប៉ុន្តែ លោក សុខ មីន មេបញ្ជាការកងរាជអាវុធហត្ថស្រុកអូរយ៉ាដាវ បានបញ្ជាក់ប្រាប់វិទ្យុបារាំងអន្តរជាតិថា សមត្ថកិច្ចរបស់លោកធ្លាប់បានសហការជាមួយប្រជាពលរដ្ឋក្នុងការបង្ក្រាបករណីជនជាតិវៀតណាមលួចចូលកាប់ឈើខុសច្បាប់បានមួយចំនួនហើយកាលពីពេលកន្លងមក។ លោក បន្ថែមថា នៅពេលនេះសមត្ថកិច្ចមិនទាន់មានវិធានការជាក់លាក់ណាមួយ ដើម្បីទប់ស្កាត់ការលួចចូលកាប់ឈើនេះនៅឡើយទេ។
យ៉ាងណាក៏ដោយ លោក ឆាយ ធី បានស្នើឲ្យមន្ត្រីប្រចាំការនៅប៉ុស្តិ៍ត្រួតពិនិត្យព្រំដែនឲ្យរឹតបន្តឹង និង ទប់ស្កាត់កុំឲ្យជនជាតិវៀតណាមទាំងនោះចូលមកកាប់ឈើនៅទឹកដីកម្ពុជាតទៅទៀត។
សូមបញ្ជាក់ថា នៅថ្ងៃអាទិត្យនេះ លោក ឆាយ ធី រួមនឹងប្រជាសហគមន៍ផ្សេងទៀតកំពុងដើរល្បាតនៅក្នុងព្រៃ ដើម្បីឃ្លាំមើល និង ត្រៀមចាប់ជនជាតិវៀតណាមដែលគ្រោងលូចចូលមកកាប់ឈើខុសច្បាប់នៅក្នុងស្រុកអូរយ៉ាដាវ ខេត្តរតនគិរីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ