លោក អេង ឆៃអ៊ាង៖ខ្ញុំគ្មានទ្រព្យសម្បត្តិឯណាឲ្យគេបង្កកទេ
លោក អេង ឆៃអ៊ាង អនុប្រធានអតីតគណបក្សសង្រ្គោះជាតិ នៅថ្ងៃអង្គារនេះ បានអះអាងថា លោកគ្មានទ្រព្យសម្បត្តិឯណាឲ្យគេបង្កកនោះទេ។ នេះជាការឆ្លើយទៅនឹងរបាយការណ៍របស់នគរបាលកម្ពុជា ដែលថាកំពុងប្រមូលព័ត៌មានហិរញ្ញវត្ថុ និងទ្រព្យសម្បត្តិរបស់សមាជិកជាន់ខ្ពស់គណបក្សសង្គ្រោះជាតិចំនួន ១១៨ រូប ដែលតុលាការកំពូលហាមធ្វើនយោបាយរយៈពេល៥ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ដោយ អ៊ឹង ប៊ុនថន
ថ្លែងប្រាប់វិទ្យុបារាំងអន្តរជាតិពីសហរដ្ឋអាមេរិក លោក អេង ឆៃអ៊ាង បានហៅផែនការរបស់រដ្ឋាភិបាលដែលព្រមានរឹបអូសទ្រព្យសម្បត្តិរបស់មន្រ្តីគណបក្សសង្រ្គោះជាតិចំនួន១១៨រូបនោះថា លោកមិនមានការភ្ញាក់ផ្អើលនោះទេ។ មិនភ្ញាក់ផ្អើលដោយលោក អេង ឆៃអ៊ាង អះអាងថា កម្ពុជាសព្វថ្ងៃមិនមានការគោរពសិទ្ធិមនុស្ស និងប្រជាធិបតេយ្យដូចមានចែងក្នុងរដ្ឋធម្មនុញ្ញនោះទេ នោះក៏ព្រោះតែមានការរំលាយគណបក្សសង្រ្គោះជាតិដែលលោកថាមានអ្នកគាំទ្រពាក់កណ្តាលប្រទេស។ បើតាម អនុប្រធានអតីតគណបក្សសង្រ្គោះជាតិរូបនេះ លោក«គ្មានទ្រព្យសម្បត្តិឯណាឲ្យគេបង្កកទេ»។
សូមបញ្ជាក់ថា របាយការណ៍របស់នគរបាលជាតិសម្រាប់ខែធ្នូមានមួយឃ្លាបានសរសេរថាខ្លួន«បន្តផ្តោតលើសន្តិសុខជាតិដោយយកចិត្តទុកដាក់ទៅលើការប្រមូលព័ត៌មាន ការវិភាគ និងការវាយតម្លៃធនធានហិរញ្ញវត្ថុរបស់អ្នកដែលមានគោលដៅអវិជ្ជមានចំពោះប្រទេសជាតិ និងរដ្ឋាភិបាល» នឹងត្រូវបានដាក់នៅក្នុងបញ្ជីក្រោមសកម្មភាពបន្តសម្រាប់ខែមករាឆ្នាំ ២០១៨នេះ។
បន្ថែមពីនេះ អ្នកនាំពាក្យក្រសួងមហាផ្ទៃលោក ខៀវ សុភ័គ ត្រូវបានកាសែតភ្នំពេញប៉ុស្តិ៍ស្រង់សំដីមកថា ការស៊ើបអង្កេតទៅលើទ្រព្យសម្បត្តិរបស់មន្ត្រីគណបក្សសង្គ្រោះជាតិគឺគ្រាន់តែជាការបន្តបង្ក្រាបទៅលើបដិវត្តន៍ពណ៌។
លោក សុភ័គ បានចង្អុលចំៗទៅលើកញ្ញា កឹម មនោវិទ្យា កូនស្រីលោក កឹម សុខា និងសមាជិកសង្គមស៊ីវិល លោក ប៉ា ងួនទៀង ថាជាគោលដៅសក្តានុពលដោយសារពួកគេកំពុងធ្វើយុទ្ធនាការនៅបរទេស។
ការព្រមានរបស់រដ្ឋាភិបាលកម្ពុជាទៅបង្កកទ្រព្យសម្បត្តិរបស់មន្រ្តីគណបក្សប្រឆាំងនេះ ស្របពេលដែលប្រធានគណៈកម្មការកិច្ចការបរទេស លោក Ed Royce បានជួបជាមួយមន្រ្តីជាន់ខ្ពស់អតីតគណបក្សសង្រ្គោះជាតិ រដ្ឋ California កាលពីថ្ងៃទី៥ មករា ២០១៨ ដែលលោកស្រី មូរ សុខហួរ អះអាងថា បានពិភាក្សាគ្នាពី ការបង្កកទ្រព្យសម្បត្តិរបស់អ្នកកាន់អំណាចដែលបានធ្វើអោយប៉ះពាល់ធ្ងន់ធ្ងរទៅលើលទ្ធិប្រជាធិបតេយ្យ អំពើពុករលួយ និងការរំលាភសិទ្ធិមនុស្សនៅកម្ពុជា។
គួរំលឹកដែរថា មន្រ្តីជាន់ខ្ពស់ភាគច្រើនរបស់អតីតគណបក្សសង្គ្រោះជាតិ បានរត់គេចទៅបរទេសដោយថាបារម្ភពីការធ្វើបាបពីសំណាក់រដ្ឋាភិបាលកម្ពុជា ហើយពួកគេមួយចំនួនកំពុងបញ្ចុះបញ្ចូលរដ្ឋាភិបាលបរទេស បង្កកទ្រព្យសម្បត្តិរបស់មន្រ្តីកម្ពុជាដែលជាប់ពាក់ព័ន្ធនឹងការរំលាយគណបក្សសង្រ្គោះជាតិ និងការរំលោភសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ