បក្សប្រឆាំងកំពុងរៀបចំដោះដូរតំណាងរាស្ត្រដើម្បីឲ្យលោកមាជ សុវណ្ណារ៉ាគេចផុតពីពន្ធនាគារ
គណបក្សសង្គ្រោះជាតិកំពុងពន្យល់បញ្ចុះបញ្ចូលដល់តំណាងរាស្ត្ររបស់ខ្លួន ដើម្បីបរិច្ចាគតំណែងជាតំណាងរាស្ត្រជាប់ឆ្នោតក្នុងរដ្ឋសភាដល់លោកមាជ សុវណ្ណារ៉ាក្នុងការឲ្យលោកអាចគេចផុតពីការជាប់ពន្ធនាគារ។ នេះបើតាមលោកសម រង្ស៊ី ប្រធានគណបក្សសង្គ្រោះជាតិដែលបានថ្លែងប្រាប់វិទ្យុបារាំងអន្តរជាតិនៅព្រឹកថ្ងៃអាទិត្យនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
នៅពេលនេះគណបក្សសង្គ្រោះជាតិ កំពុងរៀបចំដំណើរការដោះដូរតំណាងរាស្ត្រជាប់ឆ្នោតរបស់ខ្លួន ជាមួយលោកមាជ សុវណ្ណារ៉ា ដើម្បីត្រួសត្រាយផ្លូវឲ្យលោកអាចដើរចេញពីពន្ធនាគារបាន។ លោកសម រង្ស៊ី បានបញ្ជាក់ប្រាប់វិទ្យុបារាំងអន្តរជាតិថា គណបក្សសង្គ្រោះជាតិកំពុងពន្យល់ដល់តំណាងរាស្ត្ររបស់ខ្លួនឲ្យលះបង់តំណែង ដើម្បីជួយដល់លោកមាជ សុវណ្ណារ៉ា។
គណបក្សសង្គ្រោះជាតិកំពុងពន្យល់ដល់តំណាងរាស្ត្ររបស់ខ្លួនឲ្យលះបង់តំណែង ដើម្បីជួយដល់លោកមាជ សុវណ្ណារ៉ា។
ប្រសាសន៍របស់លោកសម រង្ស៊ី
លោកសម រង្ស៊ី មានប្រសាសន៍ថា “ យើងកំពុងតែពន្យល់ បញ្ចុះបញ្ចូលអ្នកពាក់ព័ន្ធទាំងអស់ឲ្យសហកាជាមួយគណបក្សទាំងមូល ដើម្បីជួយគ្នាយើងដែលកំពុងតែមានរឿងកំពុងតែរងគ្រោះ។ ដូច្នេះម្នាក់ៗត្រូវតែលះបង់ដល់វិភាគទានចូលរួម រួមចំណែកដើម្បីធ្វើម៉េចឲ្យអ្នកដែលជាប់ឃុំឃាំងដូចជាលោកមាជ សុវណ្ណារ៉ាបានទទួលសេរីភាពរបស់គាត់ឡើងវិញ"។
ថ្វីដ្បិតប្រធានគណបក្សសង្គ្រោះជាតិមិនបានបង្ហើបឲ្យដឹងពីឈ្មោះតំណាងរាស្ត្រដែលត្រូវផ្លាស់ប្តូរជាមួយលោកមាជ សុវណ្ណារ៉ា ក៏ពិតមែន ក៏ប៉ុន្តែតំណាងរាស្ត្រជាប់ឆ្នោតពីររូបរបស់គណបក្សនេះ ត្រូវបានគេមើលឃើញថា អាចក្លាយជាជម្រើសនៃការដោះដូរនេះ។ នោះ គឺលោកឡុង រី និង លោកយន្ត ថារ៉ូ ដែលជាតំណាងរាស្ត្រជាប់ឆ្នោតប្រចាំខេត្តបន្ទាយមានជ័យ។ មូលហេតុព្រោះថា លោកមាជ សុវណ្ណារ៉ា គឺជាបេក្ខជនតំណាងរាស្ត្រមិនជាប់ឆ្នោតនៅក្នុងខេត្តបន្ទាយមានជ័យនេះ។ ក៏ប៉ុន្តែតំណាងរាស្ត្រជាប់ឆ្នោតទាំងពីរនាក់នេះ មិនអាចទាក់ទងសូមការបញ្ជាក់បន្ថែមបាននោះទេនៅព្រឹកថ្ងៃអាទិត្យនេះ។
យ៉ាងណាក៏ដោយ លោកសម រង្ស៊ី បានគូសបញ្ជាក់ថា ការដោះដូរនឹងត្រូវធ្វើឡើងដោយការយោគយល់គ្នា និង ស្ម័គ្រចិត្ត ហើយតំណាងរាស្ត្រដែលត្រូវផ្លាស់ប្តូរចេញនោះ គណបក្សសង្គ្រោះជាតិនឹងរៀបចំតួនាទីសមស្របមួយផ្សេងទៀតសម្រាប់ពួកគេ។
តាមគណៈកម្មាធិការជាតិរៀបចំការបោះឆ្នោត(គ.ជ.ប) ការផ្លាស់ប្តូរបេក្ខភាពតំណាងរាស្ត្រជាប់ឆ្នោតគឺអាចធ្វើទៅបាន។ លោកទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោតបានពន្យល់ថា បេក្ខជនដែលមានបំណងចង់ផ្លាស់ប្តូរនោះត្រូវមានឈ្មោះក្នុងបញ្ជីបេក្ខជនតំណាងរាស្ត្រជាមុនសិន ហើយបន្ទាប់មកត្រូវជូនដំណឹងមកកាន់គ.ជ.ប ដើម្បីឲ្យគ.ជ.ប បញ្ចូលឈ្មោះបេក្ខជននោះជំនួសតំណាងរាស្ត្រដែលត្រូវផ្លាស់ចេញ។
លោកសម រង្ស៊ី បានលើកឡើងថា គណបក្សសង្គ្រោះជាតិនឹងជូនដំណឹងនៃដោះដូរតំណាងរាស្ត្រនេះទៅកាន់គណៈកម្មាធិការជាតិរៀបចំការបោះឆ្នោតក្នុងពេលឆាប់ៗខាងមុខនេះ បន្ទាប់ពីបញ្ចប់ការព្រមព្រៀងគ្នានៅក្នុងគណបក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ