តុលាការ ចេញដីកាឃុំខ្លួនស្ត្រីខ្មែរ៣៣នាក់ ពាក់ព័ន្ធសំណុំរឿងស៊ីឈ្នួលពពោះជំនួស
សាលាដំបូងរាជធានីភ្នំពេញ បានសម្រេចចេញដីកាបង្គាប់ឱ្យឃុំខ្លួនស្រ្តីខ្មែរ ៣៣ នាក់ជាបណ្តោះអាសន្ន ជុំវិញសំណុំរឿងពពោះជំនួស។ ការចេញដីកាសម្រេចឃុំខ្លួនស្រ្តីខ្មែរទាំង ៣៣ នាក់ ធ្វើឡើងបន្ទាប់ពីប្រតិបត្តិការចុះបង្រ្កាបទីតាំង ជួលស្រ្តីខ្មែរពពោះជំនួស កាលពីថ្ងៃទី ២១ ខែមិថុនា កន្លងទៅ។
ចុះផ្សាយនៅថ្ងៃ៖
លោក កោ វណ្ឌី អនុប្រធានសាលាដំបូងរាជធានីភ្នំពេញ និងជាចៅក្រមស៊ើបសួរ កាលពីថ្ងៃទី ៥ ខែកក្កដា បានសម្រេចឃុំខ្លួនបណ្តោះអាសន្នស្រ្តីខ្មែរចំនួន ៣៣នាក់ និងបញ្ជូនទៅឃុំខ្លួនក្នុងមន្ទីរទេព្យ ក្នុងរាជធានីភ្នំពេញ ដើម្បីតាមដាន និងពិនិត្យសុខភាព។
លោក កោ វណ្ឌី បានថ្លែងប្រាប់ក្រុមអ្នកសារព័ត៌មានថា ស្រ្តីខ្មែរទាំង ៣៣នាក់ នេះ ត្រូវបានសម្រេចឃុំខ្លួន ពីបទ «ជួញដូរមនុស្សដោយឆ្លងដែន» និងបទ «អន្តរការរវាងអ្នកសុំកូន និងស្ត្រីពពោះ» យោងតាមមាត្រា១៦នៃច្បាប់ ស្តីពីការបង្រ្កាបការជួញដូរមនុស្ស និងការពារអនីតិជន និងយោងតាមមាត្រា៣៣២ នៃក្រមព្រហ្មទណ្ឌ។
ទាក់ទងនឹងសំណុំរឿងពពោះជំនួសនេះដែរ កាលពីថ្ងៃទី២៨ ខែមិថុនាកន្លងទៅនេះ សាលាដំបូងរាជធានីភ្នំពេញ បានសម្រេចចេញដីកាឱ្យឃុំខ្លួនជាបណ្តោះអាសន្នលើក្រុមជនសង្ស័យចំនួន៥នាក់ដែលពាក់ព័ន្ធបទល្មើសជួលស្រ្តីខ្មែរឱ្យពពោះជំនួស។
ជនសង្ស័យទាំង៥នាក់ ក្នុងនោះមានជនជាតិចិនម្នាក់ផងនោះ ត្រូវបានសាលាដំបូងរាជធានីភ្នំពេញសម្រេចចោទប្រកាន់ពីបទ «ការជួញដូរមនុស្សដោយឆ្លងដែន និងបទអន្តរការីជាមួយស្រ្តីពពោះ» ត្រង់មាត្រា១៦ នៃច្បាប់ស្តីពីការបង្រ្កាបការជួញដូរមនុស្ស និងការពារអនីតិជន និងមាត្រា៣៣២ នៃក្រមព្រហ្មទណ្ឌ។
សម្រាប់លោកស្រីជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍របស់គណៈកម្មាធិការជាតិប្រយុទ្ធប្រឆាំងការជួញដូរមនុស្ស ការប្រើប្រាស់នូវវិធានការច្បាប់នេះ គឺដើម្បីការពារកិត្តិយសកម្ពុជា ការពារសីលធម៌នៃការរស់នៅរបស់ប្រជាពលរដ្ឋខ្មែរ ជាពិសេសនោះ គឺដើម្បីទប់ស្កាត់កុំឱ្យមានការយកតម្រាប់ធ្វើតាមតទៅទៀត។
លោកស្រីជូ ប៊ុនអេង បានបង្ហើបឱ្យដឹងថា កន្លងមក អាជ្ញាធរបានរកឃើញថា ករណីពពោះជំនួសនេះធ្វើឡើងដោយស្រ្តីខ្លះដែលធ្វើការនៅក្នុងរោងចក្រ ហើយក៏មានការយកតម្រាប់ផងដែរ។ នេះធ្វើឱ្យលោកស្រីជូ ប៊ុនអេង សង្កត់ធ្ងន់ថា វិធានការច្បាប់ គឺជារឿងចាំបាច់បំផុតក្នុងករណីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ