អគ្គនាយក៣រូបត្រូវបានផ្លាស់ប្តូរ ខណៈនាយឧត្តមសេនីយ៍១០រូបត្រូវដាក់ឲ្យចូលនិវត្តន៍
រដ្ឋាភិបាលកម្ពុជា បានធ្វើការផ្លាស់ប្តូរក្បាលម៉ាស៊ីនដឹកនាំនៃអគ្គនាយកដ្ឋានសំខាន់ៗ ចំនួន៣កន្លែងដែលចំណុះឲ្យក្រសួងមហាផ្ទៃ ខណៈឧត្តមសេនីយ៍ផ្កាយ៤ចំនួន១០រូប ត្រូវបានដាក់ឲ្យចូលនិវត្តន៍។ ការដាក់ឲ្យចូលនិវត្តន៍ដំណាលៗគ្នានៅពេលនេះ រាប់បញ្ចូលទាំងមេប៉ូលីសក្រុងភ្នំពេញ គឺលោកនាយឧត្តមសេនីយ៍ ជួន សុវណ្ណ ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ក្នុងលិខិតមួយច្បាប់របស់ប្រមុខរដ្ឋាភិបាល ទូលថ្វាយព្រះមហាក្សត្រ កាលពីថ្ងៃម្សិលមិញ លោក ហ៊ុន សែន បានស្នើផ្ទេរភារកិច្ច និងតែងតាំង នាយឧត្តមសេនីយ៍ផ្កាយ៤ចំនួន២រូប និងអគ្គនាយករងម្នាក់ ឲ្យទៅកាន់មុខតំណែងថ្មី។ មុខតំណែងថ្មីរបស់ឧត្តមសេនីយ៍គ្រាក់ៗទាំងនោះ គឺ នាយឧត្តមសេនីយ៍ គៀត ច័ន្ទថារិទ្ធ ជាអគ្គស្នងការរងនគរបាលជាតិ ត្រូវបានតែងតាំងជាអគ្គនាយកនៃអគ្គនាយកដ្ឋានអន្តោប្រវេសន៍ ជំនួស នាយឧត្តមសេនីយ៍ សុខ ផល ដែលត្រូវដាក់ឲ្យចូលនិវត្តន៍។
ជាមួយគ្នានោះ នាយកឧត្តមសេនីយ៍ កង សុខន អគ្គស្នងការរងនគរបាលជាតិដែរ ត្រូវបានតែងតាំងទៅជាអគ្គនាយកនៃអគ្គនាយកដ្ឋានអត្តសញ្ញាណកម្ម ជំនួយនាយឧត្តមសេនីយ៍ ម៉ៅ ច័ន្ទតារា ដែលត្រូវចូលនិវត្តន៍។ ចំណែក លោក សេង យូអ៊ាន់ ជាអគ្គនាយរង ត្រូវបានតែងតាំងទៅជាអគ្គនាយកនៃអគ្គនាយកដ្ឋានភស្តុភារ និងហិរញ្ញវត្ថុ នៃក្រសួងមហាផ្ទៃ ជំនួយ នាយឧត្តមសេនីយ៍ ម៉ៅ ប៊ុនណារិន ដែលត្រូវបានដាក់ឲ្យចូលនិវត្តន៍ ត្រឹមថ្ងៃទី៣១ខែសីហា។
លើសពីនេះទៀត នៅមានឧត្តមសេនីយ៍គ្រាក់ៗមួយចំនួនទៀតដែលត្រូវបានឲ្យចូលនិវត្តន៍ដំណាលៗគ្នានោះ រួមមាន នាយឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ នាយឧត្តមសេនីយ៍ សួស អង្គារ៍ នាយឧត្តមសេនីយ៍ ឯម សំណាង នាយឧត្តមសេនីយ៍ ថោង សំអាត នាយឧត្តមសេនីយ៍ ផាន ពៅ នាយឧត្តមសេនីយ៍ មួន សារ៉ន និងនាយឧត្តមសេនីយ៍ លី គឹមឡុង។
សូមបញ្ជាក់ការដាក់ឲ្យឧត្តមសេនីយ៍ទាំងនេះចូលនិវត្តន៍ គឺដោយសារដល់អាយុកំណត់ត្រូវចូលនិវត្តន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ