នាយករដ្ឋមន្ត្រីកម្ពុជាស្នើឲ្យមេដឹកនាំអាស៊ានជំរុញពាណិជ្ជកម្មបន្ថែមនៅក្នុងតំបន់
លោកនាយករដ្ឋមន្ត្រីហ៊ុន សែន បានស្នើដល់អង្គប្រជុំអាស៊ានជាពិសេសប្រមុខរដ្ឋាភិបាលអាស៊ានឲ្យជំរុញការធ្វើពាណិជ្ជកម្មបន្ថែមទៀតនៅក្នុងតំបន់អាស៊ាន។ សំណើរបស់លោកនាយករដ្ឋមន្ត្រី ហ៊ុន សែន ធ្វើឡើងក្នុងកិច្ចប្រជុំកំពូលអាស៊ានលើកទី៣៤នៅឯក្រុងបាងកកប្រទេសថៃ កាលពីថ្ងៃទី២២ ខែមិថុនា។
ចុះផ្សាយនៅថ្ងៃ៖
បើតាមប្រមុខរដ្ឋាភិបាលកម្ពុជា ការស្នើដល់អង្គប្រជុំអាស៊ានឲ្យជំរុញការធ្វើពាណិជ្ជកម្មបន្ថែមទៀតនៅក្នុងតំបន់អាស៊ាន គឺដើម្បីការអភិវឌ្ឍ និងភាពរីកចម្រើនរបស់អាស៊ានទាំងមូល។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភា បានលើកឡើងថាទំហំពាណិជ្ជកម្មក្នុងអាស៊ាននៅមានកម្រិតនៅឡើយ បើប្រៀបធៀបអាស៊ានជាមួយនឹងដៃគូពាណិជ្ជកម្មផ្សេងទៀត ដូចជាអាស៊ានចិន អាស៊ានសហភាពអឺរ៉ុប និងអាស៊ានសហរដ្ឋអាមេរិក។
លោកបញ្ជាក់ថា បើគេនិយាយពីពាណិជ្ជកម្មទ្វេភាគីរវាងបណ្តាប្រទេសជាសមាជិកអាស៊ាន ជាក់ស្តែងដូចជាកម្ពុជាជាមួយសហភាពអឺរ៉ុប កម្ពុជាជាមួយសហរដ្ឋអាមេរិក និងកម្ពុជាជាមួយចិន គឺទំហំពាណិជ្ជកម្មនេះធំជាងទំហំពាណិជ្ជកម្មដែលកម្ពុជាធ្វើជាមួយប្រទេសជាសមាជិកអាស៊ានដូចគ្នា។ លោកអះអាងថា ប្រសិនបើគេជំរុញលើកម្ពស់ពាណិជ្ជកម្មផ្ទៃក្នុងខ្លួនឯង នោះភាពអាស្រ័យលើទីផ្សារខាងក្រៅនឹងមិនសូវធ្ងន់ធ្ងរពេកទេ។
ជាការកត់សម្គាល់ការលើកឡើងរបស់ប្រមុខរដ្ឋាភិបាលកម្ពុជា ធ្វើឡើងខណៈកម្ពុជាអាចប្រឈមនឹងការបាត់បង់ប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ(EBA)ពីសហភាពអឺរ៉ុបនាពេលខាងមុខ។
សូមបញ្ជាក់ថាកិច្ចប្រជុំអាស៊ានលើកទី៣៤នេះ ធ្វើឡើងនៅក្រោមប្រធានបទធំស្តីពី ការជំរុញភាពជាដៃគូសម្រាប់និរន្តរភាព។ ថៃក្នុងនាមជាប្រទេសម្ចាស់ផ្ទះចង់ឃើញរដ្ឋជាសមាជិកអាស៊ានពង្រឹងទំនាក់ទំនងកាន់តែជិតស្និតនៅលើមូលដ្ឋានគ្រឹះនៃសាមគ្គីភាពក្នុងតំបន់។ នេះបើតាមការចុះផ្សាយរបស់សារព័ត៌មានបាងកកប៉ុស្តិ៍។
បញ្ហាមួយចំនួននៅក្នុងតំបន់អាស៊ាន ដូចជា បញ្ហាសមុទ្រចិនខាងត្បូង បញ្ហាជនជាតិភាគតិចរ៉ូហ៊ីងយ៉ានៅក្នុងប្រទេសភូមា និងការបំពុលបរិស្ថានសមុទ្រ ក៏ត្រូវបានលើកមកជជែកពិភាក្សានៅថ្ងៃអាទិត្យនេះដែរ។ ប៉ុន្តែបញ្ហាពាណិជ្ជកម្មគឺប្រធានបទក្តៅមួយសម្រាប់ប្រទេសសមាជិកអាស៊ាន ក្នុងការជជែកពិភាក្សាគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ