កូនស្រីសាស្ត្រាចារ្យរងអំពើហិង្សាក្នុងគ្រោះថ្នាក់ចរាចរណ៍ ដាក់ពាក្យបណ្តឹងទាមទារសំណងជាង៣០ម៉ឺនដុល្លារពីក្រុមជនបង្ក
នៅទីបំផុតទៅ មេធាវីតំណាងឲ្យអាណត្តិរបស់ លោក ស៊ុយ សារ៉េត សាស្ត្រាចារ្យមហាវិទ្យាល័យ និងកូនស្រី បានដាក់ពាក្យបណ្តឹងជាផ្លូវការទៅកាន់ស្នងការនគរបាលរាជធានីភ្នំពេញ នៅថ្ងៃទី ១៣ មីនានេះ ដើម្បីស្វែងរកចាប់ខ្លួនជនមួយក្រុម ដែលបង្កអំពើហិង្សា កាលពីថ្ងៃទី ១១ មីនា។ នៅក្នុងពាក្យបណ្តឹង ជនរងគ្រោះបានទាមទារសំណងជាប្រាក់ជាង៣០ម៉ឺនដុល្លារអាមេរិក។
ចុះផ្សាយនៅថ្ងៃ៖
ស្តាប់ - ០២:២១
កម្មវត្ថុនៃពាក្យបណ្តឹងនេះ គឺប្តឹងក្រុមជនបង្កមួយក្រុម ប៉ុន្តែមិនបានបញ្ជាក់អត្តសញ្ញាណរបស់ជនដែលត្រូវចោទប្រកាន់នោះទេ ខណៈដែលអាជ្ញាធរបានអះអាងថា គេបានកំណត់មុខសញ្ញាជនបង្កបានខ្លះៗហើយ។ ពាក្យបណ្តឹងនេះ បានដាក់ទៅកាន់ស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី ១៣ មីនា នេះ តាមរយៈមេធាវីលោក ឈី សម្បត្តិ ដែលទទួលអាណត្តិពីកូនស្រីរបស់លោក ស៊ុយ សារ៉េត គឺកញ្ញា សារ៉េត សុផាធិតាពេជ្រ។
បើយោងតាមពាក្យបណ្តឹងនេះ មេធាវីតំណាងអាណត្តិ បានទាមទារឲ្យមានការស្រាវជ្រាវអំពីសាវតារបស់ក្រុមជនបង្ក ដើម្បីស្វែងរកចាប់ខ្លួនជនដៃដល់ ឲ្យមកទទួលខុសត្រូវស្របតាមច្បាប់ព្រហ្មទណ្ឌរបស់កម្ពុជា និងទាមទារសំណងជួសជុលការខូចខាត ថ្លៃថ្នាំព្យាបាល ការខាតបង់ពេលវេលា និងសំណងជំងឺចិត្ត ដែលសរុបជាប្រាក់ប្រមាណជា១ពាន់២រយលានរៀល ឬប្រហាក់ប្រហែលជា៣០ម៉ឺនដុល្លារអាមេរិក។ តាមរយៈពាក្យបណ្តឹងដដែលនេះ មេធាវីតំណាងរបស់ជនរងគ្រោះបានរៀបរាប់ថា ពេលជនជនរងគ្រោះឈ្មោះ ស៊ុយ សារ៉េត កំពុងបើកបររថយន្តកាលពីរសៀលថ្ងៃទី ១១មីនា ស្រាប់តែមានបុរសម្នាក់ ដែលបើកបរម៉ូតូក្នុងស្ថានភាពស្រវឹងខ្លាំង បានដួលម៉ូតូក្បែររថយន្តរបស់គាត់ ហើយពេលនោះ ក៏មានក្រុមជនបង្កមួយក្រុម នាំគ្នាស្រែកឆោរឡោ រួចបើកដេញតាម និងបង្កជាអំពើហិង្សាធ្ងន់ធ្ងរទៅលើជនរងគ្រោះ ដែលធ្វើឲ្យជនរងគ្រោះរបួសធ្ងន់ស្ទើបាត់បង់ជីវិត។ ជាងនេះទៅទៀត រថយន្តរបស់ជនរងគ្រោះ ក៏ត្រូវបានរងការខូចខាតទាំងស្រុង ខណៈទ្រព្យសម្បត្តិផ្សេងៗទៀត ដូចជា ទូរសព្ទដៃ និងកាបូបលុយដែលមានប្រាក់ជិត៣ពាន់ដុល្លារសហរដ្ឋអាមេរិក ក៏បានបាត់បង់ទៅដែរ។
ប៉ុន្តែប្រជាពលរដ្ឋមួយចំនួន បានអះអាងថា លោក ស៊ុយ សារ៉េត បានបើករថយន្តបង្កឲ្យមានគ្រោះថ្នាក់ចរាចរណ៍ រួចបើករត់គេចចាប់ពីម្តុំទួលសង្កែ ក្នុងខណ្ឌប្ញស្សីកែវ រហូតដល់ម្តុំមន្ទីរពេទ្យលោកសង្ឃទៅមុខលែងរួច ក៏ត្រូវបានមហាជនវាយតំតែម្តង។ ប៉ុន្តែយ៉ាងណាក៏ដោយ នៅក្នុងករណីនេះ ស្នងការនគរបាលរាជធានីភ្នំពេញលោកនាយឧត្តមសេនីយ៍ ជួន សុវណ្ណ បានចេញមុខមកអំពាវនាវឲ្យសាធារណជនបញ្ឈប់ជាបន្ទាន់នូវការប្រើប្រាស់អំពើហិង្សា ទៅលើអ្នកបើកបររថយន្ដ ក្នុងករណីគ្រោះថ្នាក់ចរាចរណ៍។ បើតាមនាយឧត្តមសេនីយ៍ ច្បាប់ ត្រូវអនុវត្តលើអ្នកបើកបរដែលបង្កគ្រោះថ្នាក់ចរាចរណ៍ហើយរត់គេចពីកន្លែងកើតហេតុ។ ប៉ុន្តែលោកបញ្ជាក់ថា អ្នកដែលវាយអ្នកបើកបរ ក៏ត្រូវតែទទួលទោសផងដែរ ព្រោះវាជាអំពើអសីលធម៌ក្នុងសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ