«ផ្លែក្រូចថ្លុងកោះទ្រង់» របស់កម្ពុជា ត្រូវបានចុះបញ្ជីកម្មសិទ្ធិបញ្ញានៃពិភពលោក
ក្រសួងពាណិជ្ជកម្ម កាលពីព្រឹកថ្ងៃ ២៥ ខែមិថុនា បានប្រកាសដាក់ឲ្យប្រើប្រាស់ជាផ្លូវការនូវម៉ាកសម្គាល់ភូមិសាស្ត្រទំនិញ «ក្រូចថ្លុងកោះទ្រង់» ដើម្បីរួមចំណែកការពារអត្តសញ្ញាណផលិតផលប្រពៃណី សំដៅធ្វើឲ្យមានកំណើនសេដ្ឋកិច្ចជាតិ។ ផ្លែក្រូចថ្លុងកោះទ្រង់ ត្រូវបានចាត់ទុកថា ជាផ្លែឈើធម្មជាតិដ៏ពេញនិយម មានឱជារសឆ្ងាញ់ និងកេរ្តិ៍ឈ្មោះល្បីល្បាញតាំងពីសម័យសង្គមរាស្ត្រនិយមមកម្ល៉េះ។
ចុះផ្សាយនៅថ្ងៃ៖
ស្តាប់ - ០២:០៦
ពិធីប្រកាសនិងទទួលស្គាល់ «ក្រូចថ្លុងកោះទ្រង់» ជាម៉ាកសម្គាល់ភូមិសាស្ត្រទំនិញប្រចាំខេត្តក្រចេះនេះ ត្រូវបានរៀបចំឡើងនៅលើទឹកដី កោះទ្រង់ ក្នុងខេត្តនេះ កាលពីព្រឹកថ្ងៃ ២៥ ខែមិថុនា។ ពិធីនេះ មានការចូលរួមពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម អភិបាលខេត្តក្រចេះ លោក វ៉ា ថន ព្រមទាំងតំណាងអង្គការកម្មសិទ្ធិបញ្ញាពិភពលោក មន្ត្រីរាជការ និងប្រជាពលរដ្ឋ ពាណិជ្ជករ និងសិស្ស-និស្សិតប្រមាណ២០០នាក់។ នេះគឺ ជាផលិតផលកសិកម្មរបស់កម្ពុជាមួយទៀត ដែលត្រូវបានប្រកាសដាក់ឲ្យប្រើប្រាស់ជាផ្លូវការ នូវម៉ាកសម្គាល់ភូមិសាស្ត្រទំនិញ ក្នុងបញ្ជីកម្មសិទ្ធិបញ្ញាពិភពលោក។ ផ្លែក្រូចថ្លុងកោះទ្រង់ ត្រូវបានចាត់ទុកជាផ្លែឈើហូបធម្មជាតិដ៏ពេញនិយម មានឱជារសឆ្ងាញ់ពិសារ និងកេរ្តិ៍ឈ្មោះល្បីល្បាញតាំងពីសម័យសង្គមរាស្ត្រនិយម។
លោកស្រី អេឡិចសាន់ត្រា ហ្គ្រាស្យូលី (Alexandra Grazioli) តំណាងអង្គការកម្មសិទ្ធិបញ្ញាពិភពលោក (WIPO) បានចាត់ទុកការចុះម៉ាកសម្គាល់ភូមិសាស្ត្រទំនិញ «ក្រូចថ្លុងកោះទ្រង់» នេះថា ជាជោគជ័យមួយទៀត សម្រាប់ក្រសួងពាណិជ្ជកម្ម និងរាជរដ្ឋាភិបាលកម្ពុជា ក្នុងការប្រើប្រាស់ វិស័យកម្មសិទ្ធិបញ្ញា ដើម្បីជំរុញការអភិវឌ្ឍសេដ្ឋកិច្ចមូលដ្ឋាន តាមរយៈការផ្សាភ្ជាប់ផលិតផលប្រពៃណីទៅនឹងការគោរពបរិស្ថាន សម្រាប់ទុកជាប្រយោជន៍ដល់មនុស្សជំនាន់ក្រោយ។ នេះបើយោងតាមក្រសួងពាណិជ្ជកម្ម។
គួរជំរាបជូនថា នៅលើកោះទ្រង់ ក្នុងទឹកដីខេត្តក្រចេះ បច្ចុប្បន្ននេះ មានប្រជាពលរដ្ឋដាំក្រូចថ្លុង សរុប៣៣១គ្រួសារ ដែលក្នុងនោះ ១៥៥ គ្រួសារ ទើបតែបានចូលជាសមាជិកសមាគមអ្នកដាំក្រូចថ្លុងកោះទ្រង់។ ក្រូចថ្លុងសរុបមាន ១៣,៧៩០ ដើម ដោយមួយដើមអាចមានផ្លែយ៉ាងតិច១០០ផ្លែក្នុងមួយឆ្នាំ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា បានលើកឡើងពីអត្ថប្រយោជន៍នៃម៉ាកសម្គាល់ភូមិសាស្ត្រទំនិញនេះថា ជាឧបករណ៍ទីផ្សាដ៏មានសក្តានុពល និងប្រសិទ្ធភាពខ្ពស់ ដើម្បីអភិវឌ្ឍន៍វិស័យសេដ្ឋកិច្ច ហើយការដាក់ឲ្យប្រើប្រាស់ម៉ាកសម្គាល់ភូមិសាស្ត្រទំនិញ «ក្រូចថ្លុងកោះទ្រង់» នេះ នឹងជួយបង្កើនឱកាសការងារ និងប្រាក់ចំណូលជូនប្រជាជនមូលដ្ឋាន ព្រមទាំងលើកកម្ពស់ វិស័យទេសចរណ៍ជាតិ ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ