អ្នកជំនាញ អ.ស.ប អំពាវនាវឲ្យរដ្ឋាភិបាលកម្ពុជាវិលមកដើរលើមាគ៌ាសិទ្ធិមនុស្សជាថ្មី
“ប្រទេសកម្ពុជាបានមកដល់ផ្លូវបំបែកហើយ។ នេះគឺជាសេចក្តីថ្លែងការណ៍របស់ការិយាល័យឧត្តមស្នងការអង្គការសហប្រជាជាតិទទួលបន្ទុកផ្នែកសិទ្ធិមនុស្សប្រចាំនៅកម្ពុជា។ សេចក្តីថ្លែងការណ៍នេះ បានធ្លាក់មក បន្ទាប់ពីអ្នករាយការណ៍ពិសេសរបស់អង្គការសហប្រជាជាតិលោកស្រី រ៉ូណាស្មីត (Rohna Smith) បានបញ្ចប់ដំណើរទស្សនកិច្ចជាលើកទី៥នៅកម្ពុជានៅល្ងាចថ្ងៃទី ១៤ មីនានេះ។ ជុំវិញស្ថានភាពសិទ្ធិមនុស្ស និងសិទ្ធិនយោបាយនៅកម្ពុជា អ្នកជំនាញ អ.ស.ប បានអំពាវនាវឲ្យរដ្ឋាភិបាលកម្ពុជា វិលមកដើរលើមាគ៌ាសិទ្ធិមនុស្សឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤០
“ប្រទេសកម្ពុជាបានមកដល់ផ្លូវបំបែកដ៏សំខាន់មួយ ហើយត្រូវតែចាប់យកសិទ្ធិមនុស្សដែលចាំបាច់មិនអាចខ្វះបានក្នុងការទ្រទ្រង់ដល់ការអភិវឌ្ឍ និងសន្តិភាព ដែលរកបានដោយពិបាក។ នេះបើតាមប្រសាសន៍របស់លោកស្រី រ៉ូ ណាស្មីត អ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុស្សនៅកម្ពុជា នៅក្នុងសន្និសីទកាសែតនៅគ្រាចុងបញ្ចប់នៃដំណើរទស្សនកិច្ចជាលើកទី៥នៅកម្ពុជា នាល្ងាចថ្ងៃទី ១៤ មីនា នេះ។
នៅក្នុងសន្និសីទកាសែតនេះ អ្នកជំនាញ អ.ស.ប រូបនេះ បានសំដែងកង្វល់យ៉ាងខ្លាំង អំពីការរឹតត្បិតលើប្រព័ន្ធផ្សព្វផ្សាយ សេរីភាពក្នុងការបញ្ចេញមតិ និងការចូលរួមក្នុងសកម្មភាពនយោបាយ នៅមុនការបោះឆ្នោតជាតិនៅខែកក្កដាខាងមុខ ដោយអំពាវនាវឲ្យរដ្ឋាភិបាលកម្ពុជា ជ្រើសរើសដើរតាមមាគ៌ាសិទ្ធិមនុស្សឡើងវិញ។ អ្នកជំនាញរូបនេះ បានរិះគន់ទៅលើការអនុម័តច្បាប់វិសោធនកម្មរដ្ឋធម្មនុញ្ញនាពេលថ្មីៗនេះថា មិនស្របនឹងច្បាប់អន្តរជាតិនោះទេ។
គួរជំរាបជូនថា លោកស្រី រ៉ូណាស្មីត អ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុស្សនៅកម្ពុជា បានមកទស្សនកិច្ចរយៈពេល១០ថ្ងៃនៅកម្ពុជា ចាប់តាំងពីថ្ងៃទី ៥ មីនាមក ដោយបានជួបជាមួយប្រធានរដ្ឋសភាលោក ហេង សំរិន និងមន្ត្រីជាន់ខ្ពស់រដ្ឋាភិបាលមួយចំនួនទៀត តួយ៉ាងលោក ស ខេង រដ្ឋមន្ត្រីក្រសួងមហាផ្ទៃ លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ លោក កែវ រ៉េមី ប្រធានគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជា ប្រធាន គ.ជ.ប លោក ស៊ិក ប៊ុនហុក និងចុងក្រោយនេះ គឺបានជួបជាមួយរដ្ឋមន្ត្រីការបរទេសកម្ពុជាលោក ប្រាក់ សុខុន និងមន្ត្រីជាន់ខ្ពស់របស់រដ្ឋាភិបាលកម្ពុជាមួយចំនួនទៀត ដែលអ្នករាយការណ៍រូបនេះ បានលើកសរសើរថា លោកស្រីមានបុព្វសិទ្ធិច្រើនជាងពេលមុន។ ប៉ុន្តែអ្នកជំនាញផ្នែកសិទ្ធិមនុស្សរូបនេះ បានសំដែងការសោកស្តាយ ដែលលោកស្រី មិនត្រូវបានអនុញ្ញាតឲ្យជួបជាមួយលោក កឹម សុខា នៅក្នុងពន្ធនាគារត្រពាំងផ្លុងនោះទេ ខណៈដែលដំណើរទស្សនកិច្ចលើកនេះ លោកស្រីត្រូវបានអនុញ្ញាតឲ្យជួបលោក ញឹក ប៊ុនឆៃ អតីតប្រធានគណបក្សខ្មែររួបរួមជាតិនៅក្នុងពន្ធនាគារ PJ ជួបសម្តេចក្រុមព្រះនរោត្តម រណឬទ្ធិ ប្រធានគណបក្សហ្វ៊ុនស៊ិនប៉ិច រួមទាំងជួបតំណាងអង្គការសង្គមស៊ីវិលមួយចំនួនផង។
ជាទូទៅអ្នករាយការណ៍ពិសេសដែលតំណាងដោយអាណត្តិរបស់អង្គការសហប្រជាជាតិរូបនេះ បានលើកឡើងពីដំណើរការវិវត្តន៍ដ៏គួរឲ្យព្រួយបារម្ភនាពេលថ្មីៗនេះ រាប់ទាំងការបិទស្ថានីយ៍វិទ្យុក្នុងស្រុកមួយចំនួន និងកាសែតក្នុងស្រុកមួយ ការរំលាយគណបក្សប្រឆាំងធំជាងគេនៅកម្ពុជា និងការបែងចែកអាសនៈរបស់គណបក្សនេះ ការចាប់បដិបក្ខនយោបាយដាក់ពន្ធនាគារ និងសកម្មជនសិទ្ធិមនុស្ស រួមទាំងការធ្វើវិសោធនកម្មច្បាប់ថ្មីៗ ដើម្បីកាត់បន្ថយសេរីភាព និងការចូលរួមក្នុងសកម្មភាពនយោបាយ និងសកម្មភាពរបស់សង្គមស៊ីវិលជាដើម។
ប្រឈមមុខនឹងស្ថានការណ៍បែបនេះ លោកស្រី រ៉ូណាស្មីត បានអំពាវនាវឡើងវិញដល់រដ្ឋាភិបាលឲ្យស្តារលំហសម្រាប់ប្រជាជនកម្ពុជាគ្រប់រូប អាចអនុវត្តសិទ្ធឈរឈ្មោះឲ្យគេបោះឆ្នោតឡើងវិញ និងបានអំពាវនាវឲ្យមានការពិចារណាដកបំរាមលើអ្នកនយោបាយបក្សប្រឆាំងទាំង១១៨រូប ទម្លាក់ចោលការចោទប្រកាន់លើបុគ្គលិកអង្គការសិទ្ធិមនុស្សអាដហុក រួមទាំងស្នើឲ្យក្រសួងយុត្តិធម៌បង្កើតសេចក្តីណែនាំឲ្យបានច្បាស់លាស់ ស្តីពី បទដ្ឋានសមស្របនិងការវាយតម្លៃលើភស្តុតាង បន្ទាប់ពីតុលាការបានប្រើប្រាស់ភស្តុតាងមួយចំនួន ឬដូចគ្នា ដើម្បីចោទប្រកាន់ទៅលើអតីតប្រធានគណបក្សសង្គ្រោះជាតិលោក កឹម សុខា និងការរំលាយគណបក្សសង្គ្រោះជាតិជាដើម។
សូមបញ្ជាក់ថា បន្ទាប់ពីបញ្ចប់ដំណើរទស្សនកិច្ចលើកទី៥នៅកម្ពុជានៅថ្ងៃនេះ លោកស្រី រ៉ូណាស្មីត នឹងសរសេររបាយការណ៍នៃដំណើរទស្សនកិច្ចនេះដើម្បីដាក់ក្នុងកិច្ចប្រជុំក្រុមប្រឹក្សាសិទ្ធិមនុស្សរបស់អង្គការសហប្រជាជាតិ នៅអំឡុងខែកញ្ញាខាងមុខនេះ។ ប៉ុន្តែយ៉ាងណាក៏ដោយ អ្នករាយការណ៍រូបនេះបានអះអាងថា លោកស្រីមិនមានសិទ្ធិក្នុងការចាប់បង្ខំឲ្យរដ្ឋាភិបាលទីក្រុងភ្នំពេញអនុវត្តតាមអនុសាសន៍នេះទេ ត្បិតថា កម្ពុជា គឺជារដ្ឋអធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ