សំណុំរឿងព្រហ្មទណ្ឌលោក កឹម សុខា៖ តុលាការកោះហៅមនុស្ស៨នាក់បន្ថែម ក្នុងនាមជាសាក្សី
តុលាការក្រុងភ្នំពេញ បានចេញដីកាកោះហៅមនុស្ស៨នាក់បន្ថែមទៀត ដើម្បីធ្វើជាសាក្សីនៅក្នុងសំណុំរឿង «សន្និដ្ឋិភាពជាមួយរដ្ឋបរទេស» របស់លោក កឹម សុខា ចុះថ្ងៃទី ៣ ខែកញ្ញា ឆ្នាំ១០១៧ ។ សូមបញ្ជាក់ថា ក្នុងចំណោមជនទាំង៨នាក់នោះ មានប្រធានអង្គការសង្គមស៊ីវិលល្បីៗចំនួន៤រូប។ ពួកគេតម្រូវឲ្យចូលខ្លួនទៅឆ្លើយបំភ្លឺម្តងម្នាក់ ចាប់ពីថ្ងៃទី ៥ ដល់ថ្ងៃទី ១៥ ខែមិថុនាខាងមុខ។
ចុះផ្សាយនៅថ្ងៃ៖
ស្តាប់ - ០២:៤២
ក្នុងចំណោមមនុស្សទាំង៨នាក់ ដែលត្រូវបានតុលាការកោះហៅ ក្នុងនាមជាសាក្សីក្នុងសំណុំរឿងព្រហ្មទណ្ឌរបស់លោក កឹម សុខា នេះ មានលោក ប៉ាង ងួនទៀង ប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM), លោក សៀ ភារម្យ ប្រធានអង្គការក្រុមការងារពិសេសសិទ្ធិលំនៅដ្ឋាន លោក មាស គឹមសេង ប្រធានអង្គការធាងត្នោត និងលោកស្រី ចក់ សុភាព ប្រធានមជ្ឈមណ្ឌលសិទ្ធិមនុស្សកម្ពុជា (CCHR) ។ ក្រៅពីនោះ គឺជាយុវជន និងអ្នកដែលធ្លាប់មានសម្ព័ន្ធភាពជាមួយអតីតប្រធានគណបក្សសង្គ្រោះជាតិ។
នេះគឺជាការកោះហៅសាក្សីថ្មីបន្ថែមទៀត បន្ទាប់ពីតុលាការបានកោះហៅលោក ម៉ម សូណង់ដូ នាយកវិទ្យុសំបុកឃ្មុំ ក្នុងនាមជាសាក្សី តែមិនបានចូលខ្លួននោះទេ ខណៈលោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា ក៏ត្រូវបានកោះហៅឲ្យចូលខ្លួនទៅឆ្លើយបំភ្លឺដែរ ក្នុងនាមជាសាក្សី។ លោក ផេង ហេង មេធាវីការពារក្តីលោក កឹម សុខា បានថ្លែងថា ជានីតិវិធី ចៅក្រមស៊ើបសួរអាចកោះហៅសាក្សីមកបំភ្លឺបាន។ ហើយចម្លើយរបស់សាក្សី អាចជាការដាក់បន្ទុក ឬអាចជាការដោះបន្ទុកក៏ថាបាន។
ផ្អែកតាមដីកាកោះហៅ ដែលចេញដោយលោក គី ឬទ្ធី ចៅក្រមស៊ើបសួរសាលាដំបូងរាជធានីភ្នំពេញ បានកោះហៅមនុស្សទាំង៨នាក់ខាងលើ ក្នុងនាមជាសាក្សី ដើម្បីបំភ្លឺពីដំណើររឿងដែលពាក់ព័ន្ធនឹងសំណុំរឿងព្រហ្មទណ្ឌចុះថ្ងៃទី ៣ កញ្ញា ឆ្នាំ ២០១៧ របស់លោក កឹម សុខា ពាក់ព័ន្ធនឹងបទចោទ «សន្និដ្ឋិភាពជាមួយបរទេស» ដែលមន្ត្រីរដ្ឋាភិបាលបានចាត់ទុកថា ជាសំណុំរឿងក្បត់ជាតិរបស់លោក កឹម សុខា។ បើតាមដីកាកោះនេះ បានអញ្ជើញ លោក គ្រី សុង ចូលខ្លួនទៅកាន់តុលាការមុនគេ គឺនៅថ្ងៃទី ៥ ខែមិថុនា បន្ទាប់មក គឺអ្នកស្រី ចក់ សុភាព ប្រធានមជ្ឈមណ្ឌលសិទ្ធិមនុស្សកម្ពុជា និងលោក មាស គឹមសេង ប្រធានអង្គការធាងត្នោត ចូលខ្លួននៅថ្ងៃទី៧ ខែមិថុនា ខណៈលោក ប៉ា ងួនទៀងប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ចូលខ្លួននៅថ្ងៃទី ៩ ខែមិថុនា លោក សៀ ភារម្យ ប្រធានអង្គការក្រុមការងារពិសេសសិទ្ធិលំនៅដ្ឋាន ចូលខ្លួននៅថ្ងៃទី ១២ ខែមិថុនា លោក ខឿន វីរ៉ាត់ និងលោក ហេង ពិសិដ្ឋ ចូលខ្លួននៅថ្ងៃទី ១៣ ខែមិថុនា ហើយចុងក្រោយគេ គឺ លោក កែវ រតនា ត្រូវចូលខ្លួន នៅថ្ងៃទី ១៥ ខែមិថុនា។ បច្ចុប្បន្នពួកគេមួយចំនួនកំពុងស្ថិតនៅក្នុងប្រទេសកម្ពុជា តែមួយចំនួនទៀត កំពុងស្ថិតនៅក្រៅប្រទេស ដូចជា លោក ប៉ាង ងួនទៀង និងលោក សៀ ភារម្យ ជាដើម។
អ្វីជាការកត់សំគាល់ ការកោះហៅសាក្សីថ្មីទាំង៨នាក់នេះ គឺស្របពេលដែលមេធាវីការពារក្តីឲ្យលោក កឹម សុខា ធ្លាប់បានលើកហេតុផលថា តុលាការមិនមានភស្តុតាងថ្មី ដើម្បីដាក់បន្ទុកលើលោក កឹម សុខា នោះទេ។ ហើយថា លោក កឹម សុខា គួរត្រូវបានដោះលែងឲ្យនៅក្រៅឃុំ ជាបណ្តោះអាសន្ន តាមរយៈសវនាការតុលាការកំពូល ដែលគ្រោងធ្វើឡើងជាថ្មី នៅថ្ងៃទី ៥ ខែ មិថុនា ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ