ពលរដ្ឋមានជម្លោះដីធ្លីមកពីខេត្តកោះកុង យល់ព្រមត្រឡប់ទៅផ្ទះវិញ បន្ទាប់ពីមានការសន្យាដោះស្រាយ
ប្រជាពលរដ្ឋជាង៣០០គ្រួសារ ដែលមានទំនាស់ដីធ្លីជាមួយក្រុមហ៊ុនចំនួន ២ នៅខេត្តកោះកុងបានសម្រេចចិត្តវិលត្រលប់ទៅផ្ទះវិញ កាលពីថ្ងៃទី ១៨ ឧសភា បន្ទាប់ពីក្រសួងរៀបចំដែនដីនគរូបនីយកម្ម និងសំណង់ បានសន្យាថា នឹងចុះទៅដោះស្រាយបញ្ចប់ជម្លោះរបស់ពួកគេនៅដើមសប្តាហ៍ក្រោយនេះ។ ការសន្យាបានធ្វើឡើង ក្រោយពីប្រជាពលរដ្ឋទាំងនោះ បានឡើងមកតវ៉ាដល់ទីក្រុងភ្នំពេញ អស់រយៈពេលជាច្រើនថ្ងៃ។
ចុះផ្សាយនៅថ្ងៃ៖
ស្តាប់ - ០២:៥៧
ផ្អែកតាមសេចក្តីប្រកាសរបស់ក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី ១៨ ឧសភា ក្រសួងនេះបានអះអាងថា ខ្លួននឹងចាត់ក្រុមការងារចុះទៅដោះស្រាយជម្លោះដីធ្លីរវាងប្រជាពលរដ្ឋជិត៥០០គ្រួសារជាមួយក្រុមហ៊ុនចំនួនពីរនៅក្នុងខេត្តកោះកុង នៅចុងសប្តាហ៍នេះ។ សេចក្តីប្រកាសនេះបានបញ្ជាក់ថា ក្រសួងរៀបចំដែនដី នគរូបនីកម្ម និងសំណង់ បានបញ្ជាឲ្យក្រុមការងារចុះពិនិត្យអត្តសញ្ញាណអ្នកកាន់កាប់ដីដែលមានការពាក់ព័ន្ធនឹងវិវាទដីធ្លី ចាប់ពីថ្ងៃទី២១ ឧសភា រហូតរួចរាល់ជាស្ថាពរ ដើម្បីឈានទៅដល់ការដោះស្រាយបញ្ចប់ទំនាស់តែម្តង។
ការសន្យានេះ បានធ្វើឡើងដោយផ្អែកតាមសំណូមពររបស់ប្រជាពលរដ្ឋ ៣១៦ គ្រួសារ ស្ថិតនៅស្រុកស្រែអំបិលនិងស្រុកបុទុមសាគរ ខេត្តកោះកុង និងប្រជាពលរដ្ឋ១៧០គ្រួសារទៀត ស្ថិតនៅក្នុងស្រុកស្រែអំបិល ដែលមានវិវាទដីធ្លីជាមួយក្រុមហ៊ុន Koh Kong Plantation និងក្រុមហ៊ុន Koh Kong Sugar Industry របស់លោកឧកញ៉ា លី យ៉ុងផាត់។ បើតាមសេចក្តីប្រកាសព័ត៌មាននេះ ក្រសួងរៀបចំដែនដី នគរូបនីយកម្ម និងសំណង់ បានអំពាវនាវសូមឲ្យប្រជាពលរដ្ឋ សហការជាមួយក្រុមការងារនេះ ដើម្បីឈានទៅដោះស្រាយបញ្ចប់ជម្លោះដីធ្លី ដែលបានអូសបន្លាយពេលជិត១០ឆ្នាំមកនេះ។
គួរជំរាបជូនថា ប្រជាពលរដ្ឋរងគ្រោះដីធ្លីជាង៣០០គ្រួសារមកពីខេត្តកោះកុង បានឡើងមកតវ៉ាដល់ទីក្រុងភ្នំពេញអស់រយៈពេលជាច្រើនថ្ងៃមកហើយ ដើម្បីស្វែងរកកិច្ចអន្តរាគមន៍ពីប្រមុខរដ្ឋាភិបាលកម្ពុជា និងពីក្រសួងរៀបចំដែនដី នគរូបនីយកម្ម និងសំណង់ ដោយមិនព្រមវិលត្រលប់ទៅផ្ទះវិញជាដាច់ខាត បើទោះបីជាអាជ្ញាធររាជធានីភ្នំពេញ បានប៉ុនប៉ងរារាំង និងចាប់បញ្ជួនពួកគេឲ្យវិលត្រលប់ទៅផ្ទះវិញក្តី។ ការតវ៉ារបស់ក្រុមប្រជាពលរដ្ឋទាំងនោះ កាន់តែមានសន្ទុះខ្លាំងឡើងៗ កាលពីថ្ងៃទី ១៨ ឧសភា ដោយបានទម្លុះរនាំងរបស់កងកម្លាំងមានសមត្ថកិច្ច នៅមុខវត្តសាមគ្គីរង្ស៊ី ក្រុងភ្នំពេញ ជាទីដែលពួកគេបានស្នាក់អាស្រ័យ។ ការរុញច្រានគ្នា ដែលបានបណ្តាលឲ្យមានការប៉ះទង្គិចមួយប្រាវជាមួយកំលាំងសមត្ថកិច្ច ដែលបណ្តាលឲ្យទារកអាយុបីខែម្នាក់ បានធ្លាក់ទៅលើដីសន្លប់ភ្លាមៗនៅនឹងកន្លែង ហើយស្ត្រីម្នាក់ទៀតបានរងរបួសជាទម្ងន់។ ប៉ុន្តែយ៉ាងណាក៏ដោយ នៅទីបំផុតទៅ ពួកគេបានសម្រេចចិត្តវិលត្រលប់ទៅផ្ទះវិញហើយ បន្ទាប់ពីទទួលបានការសន្យាជួយដោះស្រាយបញ្ចប់ជម្លោះដីធ្លីដ៏រ៉ាំរ៉ៃ មួយនេះ។
សូមបញ្ជាក់ថា ការតវ៉ានៅក្នុងជម្លោះដីធ្លីនៅក្នុងទីក្រុងភ្នំពេញ ហាក់កំពុងមានសន្ទុះផុសផុលឡើងនៅប៉ុន្មានខែមកនេះ ខណៈដែលប្រទេសកម្ពុជាកំពុងត្រៀមរៀបចំការបោះឆ្នោតជាតិ ដែលនឹងធ្វើឡើងនៅខែកក្កដាខាងមុខ ដោយគ្មានការចូលរួមពីគណបក្សប្រឆាំងធំជាងគេនៅកម្ពុជានោះឡើយ។ កាលពីថ្ងៃទី ១៦ ឧសភាកន្លងទៅ ប្រជាពលរដ្ឋដែលអះអាងថា មានជម្លោះដីធ្លីមកពីខេត្តក្រចេះ ក៏បានឡើងមកតវ៉ាដល់ទីក្រុងភ្នំពេញដែរ ដើម្បីស្វែងរកកិច្ចអន្តរាគមន៍ពីប្រមុខរដ្ឋាភិបាលកម្ពុជា។ ប៉ុន្តែពួកគេ ត្រូវបានចាប់បញ្ជួនឲ្យត្រលប់ទៅផ្ទះវិញ ដោយរងចាំការដោះស្រាយពីអាជ្ញាធរខេត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ