លទ្ធផលនៃការចាប់ឆ្នោត៖ GDP ជំនួសលេខរៀងបក្សប្រឆាំង ខណៈបក្សកាន់អំណាចធ្លាក់ដល់លេខរៀងទី២០
គណបក្សប្រជាធិបតេយ្យមូលដ្ឋាន (GDP) បានស្ថិតនៅលេខរៀងទី៧នៃសន្លឹកឆ្នោត ដែលជាលេខរៀងចាស់របស់អតីតគណបក្សប្រឆាំង ខណៈដែលគណបក្សកាន់អំណាចបានធ្លាក់ទៅដល់លេខរៀងទី២០ក្នុងចំណោមគណបក្សនយោបាយទាំងអស់។ នេះបើយោងតាមលទ្ធផលនៃការចាប់ឆ្នោតកំណត់លំដាប់លេខរៀងគណបក្សនយោបាយចំនួន ២០ ដែលនឹងចូលរួមការបោះឆ្នោតជាតិនៅថ្ងៃទី ២៩ ខែកក្កដាខាងមុខ។ ការចាប់ឆ្នោតកំណត់លំដាប់លេខរៀង របស់គណបក្សនយោបាយ គឺដើម្បីងាយស្រួលឲ្យប្រជាពលរដ្ឋងាយស្រួលគូសឲ្យគណបក្សដែលខ្លួនពេញចិត្ត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
ការចាប់ឆ្នោតកំណត់លេខរៀងគណបក្សនយោបាយនៅលើសន្លឹកឆ្នោតនៅថ្ងៃនេះ គឺធ្វើឡើងដោយសម្តេចព្រះមហាសង្ឃរាជកម្ពុជាទាំងពីរគណៈ នៅចំពោះមុខអ្នកសារព័ត៌មានជាតិនិងអន្តរជាតិ អ្នកសង្កេតការណ៍ រួមទាំងតំណាងគណបក្សនយោបាយទាំងអស់។
ផ្អែកតាមលទ្ធផលនៃការចាប់ឆ្នោតកំណត់លំដាប់លេខរៀងគណបក្សនយោបាយនៅថ្ងៃនេះ គណបក្សខ្មែររួបរួមជាតិរបស់លោក ញឹក ប៊ុនឆៃ ស្ថិតនៅលេខរៀងទី១, គណបក្សមាតុភូមិយើងនៅលេខរៀងទី២, គណបក្សពន្លឺថ្មី នៅលេខរៀងទី៣ គណបក្សសញ្ជាតិកម្ពុជា នៅលេខរៀងទី៤ គណបក្សខ្មែរក្រោកនៅលេខរៀងទី៥ គណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ នៅលេខរៀងទី៦, គណបក្សប្រជាធិបតេយ្យមូលដ្ឋាន (GDP) នៅលេខរៀងទី៧, គណបក្សសាធារណរដ្ឋប្រជាធិបតេយ្យនៅលេខរៀងទី៨, គណបក្សរស្មីខេមរា នៅលេខរៀងទី៩, គណបក្សសម្ព័ន្ធដើម្បីប្រជាធិបតេយ្យ របស់លោក ខឹម វាសនា នៅលេខរៀងទី១០, គណបក្សខ្មែរសាធារណរដ្ឋនៅលេខរៀងទី១១, គណបក្សខ្មែរឈប់ក្រ នៅលេខរៀងទី១២, គណបក្សហ្វ៊ុនស៊ិនប៉ិចរបស់ព្រះអង្គម្ចាស់ នរោត្តម រណឬទ្ធិ នៅលេខរៀងទី១៣, គណបក្សខ្មែរអភិវឌ្ឍន៍សេដ្ឋកិច្ចនៅលេខរៀងទី១៤, គណបក្សយុវជនកម្ពុជារបស់លោក ពេជ្រ ស្រស់ នៅលេខរៀងទី១៥, គណបក្សធម្មាធិបតេយ្យនៅលេខរៀងទី១៦, គណបក្សឆន្ទះខ្មែរ ជាគណបក្សថ្មីដែលទើបបង្កើតឡើងដោយកូនប្រុសពៅរបស់លោក គង់ គាំ ស្ថិតនៅលេខរៀងទី១៧ គណបក្សជនជាតិដើមប្រជាធិបតេយ្យកម្ពុជានៅលេខរៀងទី១៨, គណបក្សខ្មែរតែមួយ ជាគណបក្សថ្មីបង្កើតឡើងដោយប្អូនប្រុសរបស់លោក កែម ឡី នៅលេខរៀងទី១៩ និងចុងក្រោយគេ គឺគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ស្ថិតនៅលេខរៀងទី ២០ ។ សម្រាប់គណបក្សប្រជាជនកម្ពុជាលេខរៀងទី២០ គឺជាលេខរៀងដែលមានហុងស៊ុយល្អ ដែលប្រជាពលរដ្ឋងាយស្រួលចងចាំ។ នេះបើតាមការបញ្ជាក់ពីលោកនាយករដ្ឋមន្ត្រី ហ៊ុន សែន តាមរយៈសំណេរនៅលើគណនីយហ្វេសបុកផ្លូវការរបស់លោក ភ្លាមៗក្រោយពីការចាប់ឆ្នោតកំណត់លំដាប់លេខរៀងគណបក្សនយោបាយនៅថ្ងៃនេះ។
គួរជំរាបជូនថា ក្រោយពីការចាប់ឆ្នោតកំណត់លំដាប់លេខរៀងគណបក្សនយោបាយនេះហើយ គជប នឹងបោះពុម្ពសន្លឹកឆ្នោតចំនួន ១០.៥២៥.៦៥០ សន្លឹក ក្នុងនោះមានសន្លឹកឆ្នោតគំរូចំនួន ៣២៩.២០០សន្លឹក។ សន្លឹកឆ្នោតមួយសន្លឹក តម្លៃ ៩០០រៀល។ នេះបើតាមការបញ្ជាក់ពីអ្នកនាំពាក្យ គជប លោក ឌឹម សុវណ្ណារុំ។ សូមបញ្ជាក់ថា ការបោះឆ្នោតជាតិជ្រើសតាំងតំណាងរាស្ត្រនីតិកាលទី៦ នឹងធ្វើឡើង នៅថ្ងៃទី ២៩ ខែកក្កដា ខាងមុខ ដោយមានប្រជាពលរដ្ឋសរុបចំនួនជាង ៨.៣ លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ