ក្រសួងបីគ្រោងចុះធ្វើយុទ្ធនាការតាមរោងចក្រ បន្ទាប់ពីកើតមានករណីផ្ទុះឡចំហាយជាបន្តបន្ទាប់
គិតត្រឹមហេតុការណ៍ ផ្ទុះឡចំហាយកំដៅសម្រាប់អ៊ុតខោអាវ នៅក្នុងរោងចក្រ ខណ្ឌមានជ័យម្សិលមិញនេះ គឺ មានមនុស្ស៣នាក់ហើយបានស្លាប់ និងអ្នករបួស៦នាក់។ ចំនួនមនុស្សស្លាប់នេះ បូករួមទាំងករណីកើតឡើងស្រដៀងគ្នាមួយ នៅរោងចក្រក្នុងខណ្ឌសែនសុខ បណ្ដាលឲ្យកម្មការិនីម្នាក់ស្លាប់នៅនឹងកន្លែងកាលពី ពីរសប្ដាហ៍មុន។ ប្រឈមបញ្ហានៃការផ្ទុះឡើងជាបន្តបន្ទាប់នូវឡចំហាយនេះ ក្រសួងបីគ្រោងធ្វើយុទ្ធនាការចុះត្រួតពិនិត្យឡនៅតាមរោងចក្ររួមគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ក្រសួងបីនោះរួមមាន៖ក្រសួងការងារ និងបណ្ដុះបណ្ដាលវិជ្ជាជីវៈ ក្រសួងបរិស្ថាន ក្រសួងឧស្សាហកម្ម និងសិប្បកម្ម។ ហើយការងារដែលក្រសួងទាំងបីបំរុងធ្វើរួមគ្នានោះគឺពិនិត្យទៅលើបច្ចេកទេស ក៏ដូចជា ពិនិត្យទៅលើគុណភាពឡចំហាយ នៅតាមបណ្ដាលរោងចក្រដែលមានជំនាញបោកគក់។ លោក ហេង សួរ បន្ថែមថា យុទ្ធនាការនេះត្រូវការជាចាំបាច់កិច្ចសហការរួមគ្នា ពីក្រសួងជំនាញដើម្បីជាការធានាដល់គុណភាពស្តង់ដានៃឡចំហាយកំដៅសម្រាបអ៊ុតខោអាវទាំងនោះ។ លោក ហេង សួរ មិនទាន់បញ្ជាក់ថា យុទ្ធនាការនេះនឹងចាប់ផ្ដើមនៅថ្ងៃណាទេ។
បើតាមលោក ហេង សួរ អ្នកនាំពាក្យក្រសួងការងារ យុទ្ធនាការនេះគឺជាការដាក់ចេញភ្លាមៗក្រោយកើតមានហេតុការណ៍ ផ្ទុះឡចំហាយកំដៅអ៊ុតខោអាវ កាលពីថ្ងៃសៅរ៍ទី៨មេសាម្សិលមិញ ដែលបណ្ដាលឲ្យមនុស្សពីរនាក់ស្លាប់ និងរបួស៦នាក់។ ហើយបូករួមទាំងហេតុការណ៍លើកមុនដែរ ដែលកាលណោះ កម្មការិនីម្នាក់ស្លាប់ភ្លាមៗនៅនឹងកន្លែង។
សូមបញ្ជាក់ថា ករណីផ្ទុះឡចំហាយ នេះបណ្ដាលឲ្យបុរសជាសន្ដិសុខម្នាក់ ស្លាប់ភា្លមៗនៅកន្លែង និងស្ដ្រីវ័យចំណាស់ ដែលជាអ្នកអនាម័យម្នាក់រងរបួសធ្ងន់ ដោយដាច់ជើងស្ដាំ ហើយស្លាប់ក្រោយពេលបញ្ជូនដល់មន្ទីរពេទ្យ។ ប្រឈមបញ្ហានេះសមត្ថកិច្ច បានបិទសិប្បកម្មនេះជាបណ្ដោះអាសន្នព្រោះប៉ូលីសកំពុងបើកការស៊ើបអង្កេត។ ការស៊ើបអង្កេតដែលអាចឈានទៅដល់ការចាប់បញ្ជូនម្ចាស់រោងចក្រទៅតុលាការ ពាក់ព័ន្ធបទល្មើសព្រហ្មទណ្ឌដែលបណ្ដាលមកពីការធ្វេសប្រហែស។
សម្រាប់ លោក ហេង សួរ ក្រសួងការងារ មានការសោកស្ដាយខ្លាំងណាស់ចំពោះ ហេតុការណ៍ ដែលបានកើតឡើងជាបន្តបន្ទាប់ទៅលើកម្មកររោងចក្រដោយសារតែការផ្ទុះឡចំហាយនេះ។ ប៉ុន្តែលោកបង្ហាញ ពីជំហរធ្វើការរួមគ្នាជាមួយភាគីពាក់ព័ន្ធដើម្បីដោះស្រាយបញ្ហានេះ កុំឲ្យកើតមានជាថ្មីទៀត។
ពាក់ព័ន្ធបញ្ហានេះ កន្លងមកក្រសួងការងារបានណែនាំដល់ម្ចាស់សហគ្រាស ពិសេសសហគ្រាសគ្រឹះស្ថានកាត់ដេរសម្លៀកបំពាក់គឺត្រូវប្រើប្រាស់ឡចំហាយដែលមានប្រព័ន្ធធានាសុវត្ថិភាពតាមបទប្បញ្ញត្តិជាធរមាន។ ត្រូវរៀបចំដំឡើងប្រព័ន្ធចំហាយតាមលក្ខណៈបច្ចេកទេសពីស្ថាប័នជំនាញពាក់ព័ន្ធដោយត្រូវចាក់ភ្ជាប់ជើងទម្រឡចំហាយជាមួយបេតុង និងរៀបចំវិធានការការពារសុវត្ថិភាព មុនពេលប្រតិបត្តិការប្រព័ន្ធឡចំហាយ។ ម្យ៉ាងទៀតមិនត្រូវបិទចរន្តអគ្គិសនីនៅពេលឡចំហាយកំពុងដំណើរការ ដើម្បីតាមដានសញ្ញាអាសន្នដែលកើតឡើងពីកំណើនសម្ពាធក្នុងឡចំហាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ