ក្រុមគ្រួសារស្វែងរកការដោះលែងសកម្មជនបរិស្ថាន២នាក់បន្ទាប់ពីជាប់ឃុំ៤ខែ
ក្រុមគ្រួសារសកម្មជនអតីតអង្គការមាតាធម្មជាតិ ស្វែងរកអន្តរាគមន៍ពីអាជ្ញាធរដ្ឋាភិបាលនៅព្រឹកថ្ងៃនេះ ដើម្បីទាមទារសុំដោះលែងកូនប្រុសពីរនាក់របស់ពួកគេ ដែលត្រូវបានតុលាការខេត្តកោះកុង ឃុំខ្លួនបណ្តោះអាសន្ន ច្រើនខែមកនេះ បន្ទាប់ពីសកម្មជនបរិស្ថានទាំងនោះ នាំគ្នាថតកប៉ាល់ដឹកខ្សាច់នៅខេត្តកោះកុង។ បើតាមសកម្មជនបរិស្ថាន ការឃុំខ្លួនពួកគេទាំងពីរនាក់នេះជារឿងអយុត្តិធម៌ ដោយអះអាងថាសកម្មជនទាំងនោះធ្វើសកម្មភាពការពារបរិស្ថានទៅតាមការអំពាវនាវរបស់លោកនាយករដ្ឋមន្រ្តី ហ៊ុន សែន។
ចុះផ្សាយនៅថ្ងៃ៖
ស្តាប់ - ០២:១៣
ដោយ អ៊ឹង ប៊ុនថន
ការស្វែងរកកិច្ចអន្តរាគមន៍របស់ក្រុមគ្រួសារនៅពេលនេះ បានធ្វើឡើងបន្ទាប់ពីសកម្មជនបរិស្ថានទាំងពីររូបនោះគឺលោក ឌឹម គុណឌី និងលោក ហ៊ុន វណ្ណៈ ត្រូវបានបញ្ជួនទៅកាន់ពន្ធនាគារព្រែកស្វាយ ក្នុងខេត្តកោះកុង តាំងពីថ្ងៃទី១៤ខែកញ្ញាឆ្នាំ២០១៧ ពោលមានរយៈពេលជិត៤ខែមកហើយ។
ការឃុំខ្លួនបណ្តោះអាសន្នលើសកម្មជនទាំងពីរនាក់នេះ ដោយតុលាការខេត្តកោះកុងធ្វើឡើងក្រោមបទចោទទី១ ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងទី២.ធ្វើឱ្យប៉ះពាល់ដល់សិទ្ធិខាងរូបភាពនៃបុគ្គល។
ការដែលតុលាការចោទប្រកាន់បែបនេះ គឺបន្ទាប់ពីសកម្មជនអតីតអង្គការមាតាធម្មជាតិទាំងពីររូបនេះ បានថតសកម្មភាពកប៉ាល់ដឹកខ្សាច់ ស្ថិតនៅតំបន់ក្រុមហ៊ុន Koh Kong SEZ ក្នុងស្រុកគិរីសាគរ ខេត្តកោះកុង កាលពីថ្ងៃទី១២ កញ្ញាឆ្នាំទៅមិញ។
សកម្មជនបរិស្ថានដែលជូនដំណើរក្រុមគ្រួសាររបស់លោក ឌឹម គុណឌី និងលោក ហ៊ុន វណ្ណៈ មកដាក់ញត្តិសុំអន្តរាគមន៍ពីក្រសួងបរិស្ថាន ខុទ្ទកាល័យនាយករដ្ឋមន្រ្តី និងក្រសួងរ៉ែ នៅថ្ងៃទី១៨ខែមករា បានហៅការឃុំខ្លួនពួកគេទាំងពីរនាក់នេះថា ជារឿងអយុត្តិធម៌ ដោយអះអាងថាសកម្មជនទាំងនោះធ្វើសកម្មភាពការពារបរិស្ថានទៅតាមការអំពាវនាវរបស់លោកនាយករដ្ឋមន្រ្តី ហ៊ុន សែន។
មន្រ្តីក្រសួងបរិស្ថានក្រៅពីចេញមកទទួលញត្តិសុំអន្តរាគមន៍នេះ នៅមិនទាន់មានការឆ្លើយតបយ៉ាងណានៅឡើយ។
ទាក់ទងនឹងសំណុំរឿងនេះដែរ កាលពីចុងឆ្នាំ២០១៧ ក្រុមអង្គការសង្គមស៊ីវិលចំនួន២២ បានចេញសេចក្តីថ្លែងការណ៍រួមមួយដោយស្នើឲ្យអាជ្ញាធរដោះលែងលោក ហ៊ុន វណ្ណៈ និងលោក ឌឹម គុណឌី ជាសកម្មជនបរិស្ថានដែលមានសម្ព័ន្ធភាពជាមួយអង្គការមាតាធម្មជាតិ ដែលទើបតែត្រូវបានលុបឈ្មោះចេញពីបញ្ជីរបស់ក្រសួងមហាផ្ទៃនាពេលថ្មីៗនេះ។
ក្រុមអង្គការសង្គមស៊ីវិលបានបញ្ជាក់ថា សកម្មជនបរិស្ថានទាំងពីរ ត្រូវបានឃុំខ្លួនពុំសមហេតុផល ទាក់ទិននឹងបទចោទគ្មានមូលដ្ឋានច្បាស់លាស់។
ការឃាត់ និងការឃុំខ្លួនយុវជនទាំងពីរនាក់នោះ ធ្វើឡើងបន្ទាប់ពីសកម្មជនចលនាមាតាធម្មជាតិ កាលពីថ្ងៃទី១១ ខែកញ្ញា ឆ្នាំ ២០១៧ បានចេញផ្សាយវីដេអូមួយទាក់ទងនឹងការរកឃើញភាពមិនប្រក្រតីនៃការនាំចេញខ្សាច់ស៊ីលីកា ឬខ្សាច់ស ទៅកោះតៃវ៉ាន់ចំនួនជាង១លានតោន ដែលគិតជាទឹកប្រាក់ជាង៣០លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ