វេទិកាអនាគត ចង់ឱ្យបង្កើនចំនួនអាសនៈរដ្ឋសភាសម្រាប់ការបោះឆ្នោតឆ្នាំ ២០១៨
វេទិកាអនាគត ចង់ឱ្យមានការបង្កើនចំនួនអាសនៈក្នុងរដ្ឋសភានិងការបែងចែកអាសនៈ នៅក្នុងច្បាប់ស្តីពីការបោះឆ្នោតជ្រើសតាំងតំណាងរាស្រ្ត (ចបជត) សម្រាប់ការបោះឆ្នោតថ្នាក់ជាតិ ខាងមុខ ។ ការលើកឡើងយ៉ាងដូច្នេះ ត្រូវបានបញ្ជាក់នៅក្នុងរបាយការណ៍ កម្រាស់ ៤ ទំព័រ ចេញផ្សាយកាលពីម្សិលមិញស្តីពីការបែងចែកអាសនៈ រដ្ឋសភា និងការបែងចែកអាសនៈសម្រាប់ការបោះឆ្នោតឆ្នាំ ២០១៨ ។
ចុះផ្សាយនៅថ្ងៃ៖
ស្តាប់ - ០២:១៦
វេទិកាអនាគត ចង់ឱ្យបន្ថែមចំនួនអាសនៈរដ្ឋសភា ប្រសិនបើមានការកែប្រែតាមរូបមន្តដែលបានចែងក្នុងច្បាប់ស្តីពីការបោះឆ្នោតជ្រើសតាំងតំណាងរាស្រ្ត ដោយផ្អែកលើកំណើនប្រជាពលរដ្ឋក្នុងនីតិកាលនីមួយៗនៃរដ្ឋសភា។
អង្គការវេទិកាអនាគត យល់ឃើញថា ចំនួនអាសនៈនៅក្នុងការផ្លាស់ប្តូរនៅក្នុងរដ្ឋសភា និង តាមបណ្តាខេត្តមួយចំនួន មានការផ្លាស់ប្តូរតិចតួចចាប់តាំងពីឆ្នាំ ១៩៩៣ មក ទោះបីជាចំនួនប្រជាពលរដ្ឋកើនឡើងក្នុងរយៈពេលពីរទស្សវត្សរ៍កន្លងមកក៏ដោយ។
ក្រុងភ្នំពេញ មានចំនួនប្រជាជនកើនឡើង ពីជិត ១ លាន នាក់ នៅឆ្នាំ ១៩៩៨ ដល់ ជិត ១ លាន ៨ សែន នាក់ ក្នុងឆ្នាំ ២០១៥។ ចំណែកឯនៅខេត្តសៀមរាប វិញ ប្រជាជន មានចំនួន ៧ សែន នាក់ នៅឆ្នាំ ១៩៩៨ កើនឡើងដល់ជិត ១ លាន នាក់។ វេទិកាអនាគត ចង់ឱ្យបន្ថែម៣អាសនៈមណ្ឌលទាំងពីរ មានន័យថារាជធានីភ្នំពេញគួរទទួលបាន ១៥ អាសនៈ និង សៀមរាប ៩ អាសនៈ។ ដូចគ្នាដែរ ខេត្តបាត់ដំបងដែលមានកំណើនប្រជាជន គួរបន្ថែម ២អាសនៈទៀត ឱ្យបានចំនួន ១០ អាសនៈ។
ជាការកត់សម្គាល់ នៅក្នុងរាជធានីភ្នំពេញ និង ខេត្តសៀមរាប មិនមានការកើនឡើងចំនួនអាសនៈតាំងពីឆ្នាំ ១៩៩៨ មក ដោយភ្នំពេញមានចំនួន ១២ អាសនៈថេរ និង ៦ អាសនៈក្នុងខេត្តសៀមរាប។
ទន្ទឹមគ្នានេះ អង្គការវេទិកាអនាគត ស្នើឱ្យមានការកាត់បន្ថយចំនួនអាសនៈ នៅខេត្តមួយចំនួនដូចជា ឧត្តរមានជ័យ កំពង់ចាម ព្រៃវែង កំពង់ធំ កំពត ពោធិ៍សាត់ ស្វាយរៀង និង តាកែវ ក្រោមហេតុផលថា ខេត្តទាំងនេះ មានកំណើនប្រជាជនតិចតួច ឯខ្លះទៀត មានការថយចុះ។
ដើម្បីធានាបានការបែងចែកអាសនៈឱ្យបានត្រឹមត្រូវនិងយុត្តិធម៌ អង្គការវេទិកាអនាគត បានផ្តល់អនុសាសន៍ចំនួនបី ទី១ ធ្វើវិសោធនកម្ម ច្បាប់ស្តីពីការបោះឆ្នោតជ្រើសតាំងតំណាងរាស្រ្ត ដាក់បញ្ចូលវិញមាត្រាដែលចែងអំពីរូបមន្តកំណត់ចំនួនអាសនៈ និង ការបែងចែកអាសនៈតាមខេត្តឬក្រុង។ ទី២ វិសោធនកម្ម ច្បាប់ស្តីពីការបោះឆ្នោតជ្រើសតាំងតំណាងរាស្រ្ត ដោយដាក់បញ្ចូលឡើងវិញអំពីការបង្កើតគណៈកម្មាការកំណត់ចំនួនអាសនៈរដ្ឋសភា និង ទី៣ ធានាឱ្យបានថាការបែងចែកអាសនៈនាពេលអនាគតត្រូវបានធ្វើឡើងដោយតម្លាភាព ហើយការគណនា និង តួលេខដែលប្រើប្រាស់ក្នុងការកំណត់ចំនួនអាសនៈរដ្ឋសភានឹងត្រូវបង្ហាញជាសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ