រដ្ឋាភិបាល ប្រារព្ធពិធីរម្លឹកខួប ៦ ឆ្នាំ ថ្ងៃបញ្ចូលប្រាសាទព្រះវិហារ ជាសម្បត្តិបេតិកភណ្ឌពិភពលោក
រដ្ឋាភិបាល នឹងប្រារព្ធពិធីជួបជុំសាទរខួប ៦ ឆ្នាំ ថ្ងៃដាក់បញ្ចូលប្រាសាទព្រះវិហារ ក្នុងបញ្ជីសម្បត្តិបេតិកភណ្ឌពិភពលោក របស់អង្គការយូណេស្កូ។ ពិធីជួបជុំ នៅសារមន្ទីរធម្មជាតិ ស្ថិតនៅជើងភ្នំប្រាសាទព្រះវិហារ នាព្រឹកថ្ងៃចន្ទ ទី៧កក្កដា ស្អែកនេះ ក៏នឹងមានការលើកឡើងពីផែនការការពារប្រាសាទព្រះវិហារ ដែលមិនត្រឹមតែការពារពីការបំផ្លាញរបស់មនុស្ស និងធម្មជាតិលើប្រាសាទទេ តែអាជ្ញាធរក៏ត្រូវការពារទាំងព្រៃឈើ និងវប្បធម៌របស់ជនជាតិដើមភាគតិចគួយ នៅតំបន់នោះផងដែរ។
ចុះផ្សាយនៅថ្ងៃ៖
ស្តាប់ - ០២:២៥
ពិធីជួបជុំ នៅថ្ងៃ៧កក្កដាស្អែក នឹងមានការចូលរួមពីតំណាងអង្គការយូណេស្កូ តំណាងក្រសួងវប្បធម៌ កងកម្លាំងប្រដាប់អាវុធ អាជ្ញាធរខេត្ត និងប្រជាពលរដ្ឋ សរុប ១៥០០ នាក់។ ក្នុងនោះ មានពិធីសាសនា និងសន្ទរកថា ការសំដែងសិល្បះរបាំជនជាតិដើមភាគតិចគួយ នៅតំបន់ប្រាសាទព្រះវិហារ។ នេះបើតាមលោក ជុច ភឿន រដ្ឋលេខាធិការក្រសួងវប្បធម៌ និងវិចិត្រសិល្បះ និងជាប្រធានអាជ្ញាធរជាតិប្រាសាទព្រះវិហារ។
ក្រៅពីរម្លឹកពីជ័យជំនះក្នុងការចុះបញ្ជីប្រាសាទព្រះវិហារ ចូលក្នុងសម្បត្តិបេតិកភណ្ឌពិភពលោក ថ្ងៃទី៧កក្កដា ឆ្នាំ២០០៨ ក្នុងពិធីជួបជុំនៅថ្ងៃចន្ទស្អែក ត្រូវបានលោកជុចភឿន ឲ្យដឹងថា នឹងមានការលើកឡើងពីការសម្រេចបកស្រាយសាលក្រមរបស់តុលាការយុត្តិធម៌អន្តរជាតិក្រុងឡាអេ ICJ កាលពីឆ្នាំមុន ដែលបានកំណត់ថា ភ្នំព្រះវិហារទាំងមូល ស្ថិតក្នុងអធិបតេយ្យបូរណភាពទឹកដីកម្ពុជា។
ក្នុងដំណើរការអភិរក្ស និងអភិវឌ្ឍន៍ប្រាសាទព្រះវិហារ កម្ពុជាបានពង្រីកវិសាលភាពតំបន់ការពារពី ២៥០០ ហិកតា ទៅជាង ៤ ម៉ឺនហិកតា។ ប៉ុន្តែលោក ជុច ភឿន អះអាងថា អាជ្ញាធរ មិនទាន់គូសផែនទីបំពេញបន្ថែម ដោយបញ្ចូលដី ៤,៦ គីឡូម៉ែត្រក្រឡា ចូលក្នុងផែនការអភិរក្ស និងអភិវឌ្ឍន៍ប្រាសាទព្រះវិហារ នៅឡើយទេ ទោះបីជាតុលាការក្រុងឡាអេ បានចេញសេចក្តីសម្រេច បកស្រាយយ៉ាងច្បាស់ កាលពីថ្ងៃទី១១ ខែវិច្ឆិកា ឆ្នាំ២០១៣ ហើយថា តំបន់ជុំវិញប្រាសាទព្រះវិហារ ស្ថិតក្នុងអធិបតេយ្យ បូរណភាពទឹកដីកម្ពុជាក៏ដោយ។
ទោះបីជាបញ្ហាព្រំដែនកម្ពុជា-ថៃ នៅប្រាសាទព្រះវិហារ មិនទាន់ដោះស្រាយចប់ជាស្ថាពរក្តី ប៉ុន្តែចំពោះគម្រោងផែនការអភិរក្ស និងអភិវឌ្ឍន៍ប្រាសាទព្រះវិហារ ក្នុងរយៈពេល ៦ ឆ្នាំ គិតចាប់ពីថ្ងៃ៧កក្កដា ឆ្នាំ២០០៨ មកដល់ពេលនេះ ត្រូវបានលោក ជុច ភឿន គូសបញ្ជាក់ថា អាជ្ញាធរបានដាំដើមឈើ ស្តារប្រឡាយបុរាណ បង្កើតសារមន្ទីរ ហើយថ្មីៗនេះ អាជ្ញាធរកម្ពុជា ក៏បានសហការជាមួយអង្គការយូណេស្កូ ជួសជុលកន្លែងខូចខាតប្រាសាទព្រះវិហារ ពិសេសការខូចខាតដោយសង្គ្រាម ដែលថៃបង្កឡើង ចាប់តាំងពីថ្ងៃទី១៥ ខែកក្កដា ឆ្នាំ២០០៨។
ប្រាសាទព្រះវិហារ ក៏បានទទួលអ្នកទេសចរជាតិ និងអន្តរជាតិ ទៅទស្សនា ទោះបីជាខែនេះ ជាខែភ្លៀង ក៏មានអ្នកទេសចរចន្លោះពី ២០០០ ទៅ ៣០០០ នាក់ ក្នុងមួយខែផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ