ក្រសួងព័ត៌មានហាមមិនឲ្យផ្សាយបន្តវិទ្យុបរទេសជាខេមរភាសាក្នុងអំឡុងយុទ្ធនាការឃោសនាបោះឆ្នោត
ក្រសួងព័ត៌មានកម្ពុជាបានចេញបម្រាមដល់គ្រប់វិទ្យុ FM ក្នុងស្រុកទាំងអស់ ឲ្យផ្អាករាល់ការផ្សាយបន្តពីវិទ្យុបរទេស ដែលផ្សាយជាខេមរភាសាទាំងអស់ នៅក្នុងពេញមួយអំឡុងពេលយុទ្ធនាការឃោសនាបោះឆ្នោត ៣១ថ្ងៃ ដែលចាប់ផ្តើមបើកធ្វើកាលពីថ្ងៃព្រហស្បតិ៍ ទី២៧ មិថុនា។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងសេចក្តីណែនាំ ចេញផ្សាយជាសាធារណៈ នៅថ្ងៃទី២៨ មិថុនា ២០១៣ ប៉ុន្តែ ចុះហត្ថលេខាតាំងពីថ្ងៃទី២៥ មិថុនា ២០១៣ ដោយលោកអ៊ុក ប្រាថ្នា ក្នុងនាមជារដ្ឋមន្រ្តីស្តីទី ក្រសួងព័ត៌មានបានទទួលស្គាល់ថា "ប្រព័ន្ធផ្សព្វផ្សាយមានតួនាទីដ៏សំខាន់ក្នុងការចូលរួមចំណែកឲ្យដំណើរការបោះឆ្នោតប្រព្រឹត្តទៅដោយសេរី ត្រឹមត្រូវ និងយុត្តិធម៌ ស្របតាមគោលការណ៍លទ្ធិប្រជាធិបតេយ្យ លើកកម្ពស់ការយល់ដឹងរបស់ប្រជាពលរដ្ឋ អំពីការបោះឆ្នោត"។
ក៏ប៉ុន្តែ នៅក្នុងពេលជាមួយគ្នា ក្រសួងព័ត៌មានបានចេញបម្រាមឲ្យគ្រប់ស្ថានីយ៍វិទ្យុ FM ផ្អាកការផ្សាយបន្តពីវិទ្យុបរទេសផ្សាយជាខេមរភាសា ហើយការបម្រាមនេះមានសុពលភាព ពេញមួយអំឡុងពេលយុទ្ធនាការឃោសនាបោះឆ្នោត រយៈពេល ៣១ថ្ងៃ ដែលចាប់ផ្តើមបើកធ្វើ កាលពីថ្ងៃព្រហស្បតិ៍ ២៧ មិថុនាម្សិលមិញ។
នៅក្នុងសេចក្តីណែនាំ ដែលចុះហត្ថលេខា ដោយលោកអ៊ុក ប្រាថ្នា ក្នុងនាមជារដ្ឋមន្រ្តីស្តីទី ក្រសួងព័ត៌មាន ក៏បានព្រមានផងដែរថានឹង "ចាត់វិធានការតាមផ្លូវច្បាប់" ចំពោះស្ថានីយ៍វិទ្យុ FM ណា ដែលនៅតែបន្តការផ្សាយបន្តវិទ្យុបរទេស ផ្សាយជាខេមរភាសា រំលោភលើបម្រាមនេះ។
គួរបញ្ជាក់ថា វិទ្យុបរទេសផ្សាយជាខេមរភាសា ដែលមានការផ្សាយបន្ត ដោយវិទ្យុ FM ជាដៃគូក្នុងស្រុក រួមមានជាអាទិ៍ វិទ្យុបារាំងអន្តរជាតិ វិទ្យុអាស៊ីសេរី វិទ្យុសំឡេងសហរដ្ឋអាមេរិក និងវិទ្យុអូស្រ្តាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ