នាយករដ្ឋមន្រ្តីខ្មែរសរសើរជប៉ុន ខណៈអតីតបក្សប្រឆាំងស្នើជប៉ុនឈប់គាំទ្រការបោះឆ្នោតនៅកម្ពុជា
លោកនាយករដ្ឋមន្រ្តី ហ៊ុន សែន នៅថ្ងៃចន្ទនេះ បានលើកសរសើរប្រទេសជប៉ុនមិនដាច់ពីមាត់ ដោយសារតែប្រទេសមហាអំណាចសេដ្ឋកិច្ចមួយនេះ បានផ្តល់ជំនួយច្រើនជាងគេដល់ប្រទេសកម្ពុជាក្នុងការអភិវឌ្ឍដោយមិនសូវបានភ្ជាប់នឹងលក្ខខណ្ឌនយោបាយ។ ការកោតសរសើរប្រទេសជប៉ុននៅពេលនេះ គឺស្របពេលដែលក្រុមអ្នកគាំទ្រអតីតគណបក្សប្រឆាំងបន្តធ្វើបាតុកម្មស្នើឲ្យជប៉ុនដកខ្លួនថយពីការបោះឆ្នោតនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នៅក្នុងពិធីសម្ពោធកំពង់ផែក្រុងព្រះសីហនុ ដែលជាកម្ចីរបស់ជប៉ុន តម្លៃប្រមាណ៧៤លានដុល្លារ លោកប្រមុខរដ្ឋាភិបាលកម្ពុជា បានថ្លែងថា មកដល់ពេលបច្ចុប្បន្ន កម្ពុជាបានប្រើប្រាស់ហិរញ្ញប្បទាន ឬប្រាក់កម្ចីរបស់ជប៉ុនអស់ជាង៣០០លានដុល្លារហើយ សម្រាប់អភិវឌ្ឍន៍កំពង់ផែក្រុងព្រះសីហនុ តាំងពីក្រោយឆ្នាំ១៩៩៨មក។ លើសពីនេះទៀត លោក ហ៊ុន សែន ក៏បានជូនពរឲ្យកីឡាករជប៉ុនអាចឆ្លងចូលទៅវគ្គ១៦ក្រុមនៅ ក្នុងការប្រកួតបាល់ទាល់ពិភពលោក World Cup ក្នុងប្រទេសរុស្ស៊ី ដោយចាត់ទុកថា ប្រសិនជាជប៉ុនឈ្នះនោះ គឺជាមោទនភាពរបស់អាស៊ីទាំងមូល មិនមែនជាមោទនភាពតែជប៉ុនម្នាក់ឯងប៉ុណ្ណោះទេ។
ក្រៅពីសរសើររឿងជប៉ុនផ្តល់ជំនួយដល់កម្ពុជាដោយមិនសូវភ្ជាប់នឹងលក្ខខណ្ឌនយោបាយនោះ លោក ហ៊ុន សែន បានឆ្លៀតវាយបកជាថ្មីទៀត ទៅលើសហរដ្ឋអាមេរិក ដែលជាសម្ព័ន្ធមិត្តចាក់ទឹកមិនលិចរបស់ជប៉ុន។ នោះគឺករណី ដែលអាមេរិកតម្រូវឲ្យកម្ពុជាសងបំណុល ដែលរដ្ឋាភិបាល លន់ នល់ បានជំពាក់កាលពីសម័យសាធារណៈរដ្ឋខ្មែរ។ ជាបំណុលកខ្វក់ដែលលោក ហ៊ុន សែន ចាត់ទុកថាត្រូវបានគេបង្ខំឲ្យកម្ពុជាទិញគ្រាប់បែកមកទម្លាក់លើទឹកដីខ្មែរហើយទាមទារកម្ពុជាឲ្យសងបន្ថែមទៀត។បើតាម លោកនាយករដ្ឋមន្ត្រី អាមេរិកគួរតែបង្វែបំណុលទាំងនេះទៅជាជំនួយអភិវឌ្ឍវិញ។
គួរកត់សំគាល់ថា ការដែលលោកប្រមុខរដ្ឋាភិបាលខ្មែរ សរសើរជប៉ុនមិនដាច់ពីមាត់នៅពេលនេះ គឺស្របពេលក្រុមអ្នកគាំទ្រអតីតគណបក្សសង្រ្កោះជាតិ បានធ្វើបាតុកម្មចំនួន៥លើកមកហើយ រាប់ទាំងនៅលើទឹកដីជប៉ុនផ្ទាល់ ដោយសុំឲ្យប្រទេសកាន់លទ្ធិប្រជាធិបតេយ្យមួយនេះ ផ្តាច់ជំនួយដល់ការបោះឆ្នោតនៅកម្ពុជា។
លើសពីនោះ ពួកគេក៏ស្នើដល់សហគមន៍ជាតិកុំទទួលស្គាល់ការបោះឆ្នោតនៅកម្ពុជាថ្ងៃ២៩កក្កដា ដែលគ្មានវត្តមានអតីតបក្សប្រឆាំងធំមួយនេះចូលរួម។ ប៉ុន្តែមកដល់ពេលនេះ ប្រទេសជប៉ុននៅមិនទាន់បញ្ជាក់ជំហររបស់ខ្លួនថាយ៉ាងណានៅឡើយ ខណៈកាលពីថ្ងៃអាទិត្យ ពលករខ្មែរនៅកូរ៉េខាងត្បូងជាច្រើននាក់ បានធ្វើបាតុកម្ម និងដាក់ញត្តិជាថ្មីទៀត ឲ្យប្រទេសនេះឈប់គាំទ្រដំណើរការបោះឆ្នោតនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ