លោក ហ៊ុន សែន វាយប្រហារបក្សប្រឆាំងពេញមួយថ្ងៃ!
ពេញមួយថ្ងៃនេះ លោកនាយករដ្ឋមន្ត្រី បានថ្លែងសន្ទរកថាពីរកន្លែងផ្សេងគ្នា តែខ្លឹមសារគឺនៅតែបន្តវាយប្រហារនិងទម្លាយរឿងសម្ងាត់ជាច្រើនពាក់ ព័ន្ធនឹងបក្សប្រឆាំង។ នៅពេលព្រឹក លោក ហ៊ុន សែន បានប្រកាសទទួលស្គាល់សារសំឡេងរបស់ខ្លួន និយាយគ្នាជាមួយនឹងលោក កឹម សុខា ថាជាការពិត។ ចំណែកនៅពេលថ្ងៃរសៀលនេះ លោកប្រមុខរដ្ឋាភិបាល ប្រកាសថាមានអ្នករាយការណ៍ឲ្យរូបលោកពីផ្ទៃក្នុងរបស់បក្សប្រឆាំង ។ ហើយសន្ទរកថាទាំងព្រឹកទាំងថ្ងៃ គឺសន្ធាប់វាយប្រហារចំពោះលោក សម រង្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
នៅក្នុងពិធីប្រគល់សញ្ញាបត្រដល់និស្សិតសាលាឯកជនមួយ នៅសាលមហោស្រពកោះពេជ្រ លោកនាយករដ្ឋមន្ត្រី ហ៊ុន សែន ប្រកាសថា ផែនការរៀបចំឲ្យលោក កឹម សុខា ឡើងកាន់តំណែងប្រធានបក្ស គឺជាផែនការរបស់ខ្លួន។
លោក ហ៊ុន សែន ថែមទាំងបានទម្លាយរឿងទៀតថា មន្ត្រីបក្សប្រឆាំងម្នាក់ គឺ លោក ម៉ៅ មុនីវណ្ណ គឺជាអ្នករាយការណ៍ឲ្យខ្លួន ពីព័ត៌មានផ្ទៃក្នុងមួយចំនួន ហើយពីការណ៍ដែលលោក កឹម សុខា មានចិត្តចង់សុំជួបរូបលោក។ ជុំវិញរឿងនេះ លោក ហ៊ុន សែន ព្រមានសង្កត់ទៀតថា ប្រសិនបើលោក ម៉ៅ មុនីវណ្ណ ហ៊ានចេញមកបដិសេធ លោកនឹងទម្លាយសារឆ្លើយឆ្លងទាំងអស់តែម្តង។
ថ្លែងដោយកំហឹងផង លោកនាយករដ្ឋមន្ត្រី បានបន្តលើកឡើងម្តងជាពីរដងដោយសម្តីម៉ឺងម៉ាត់ ទាក់ទិនករណីលោក សម រង្ស៊ី ថារូបលោកមិនអាចអនុគ្រោះឲ្យជាដាច់ខាត ចំពោះការប្រមាថរបស់អតីតបក្សប្រឆាំងទៅលើប្រពន្ធនិងកូនរបស់លោកនាយករដ្ឋមន្ត្រីថា មានពាក់ព័ន្ធសាច់ឈាមជាមួយនឹងមេដឹកនាំបរទេស។
ទន្ទឹមនេះ លោក ហ៊ុន សែន ក៏បានរម្លឹករឿងគំនុំចាស់ជាច្រើន ដូចជា លោក សម រង្ស៊ី ធ្លាប់ថាឲ្យរូបលោកជាចោរលក់ជាតិខ្លាំងជាងគេជាដើម។ ចំពោះលោក ហ៊ុន សែន សម្តីដូច្នេះ គឺមិនសមជាអ្នកនយោបាយដែលមានសីលធម៌នោះទេ។
លើសពីនេះ លោកប្រធានបក្សកាន់អំណាច បន្តរម្លឹកដៀមដាមថា ស្លឹកឈើជ្រុះមិនឆ្ងាយពីគល់ ដែលចង់សំដៅការចោទប្រកាន់លោក សម សារី ថាជាជនក្បត់ជាតិ។ ដូច្នេះលោក សម រង្សី វិញ កូននិងឪពុក គឺមិនខុសឆ្ងាយពីគ្នាប៉ុន្មាននោះឡើយ។
ចំណែកនៅក្នុងពិធីបើកការដ្ឋានសាងសង់ ផ្លូវក្រវាត់ក្រុងកាលពីពេលព្រឹក លោកប្រមុខ ររដ្ឋាភិបាល បានប្រកាសទទួលស្គាល់សារសំឡេងដែលបែកធ្លាយតាមបណ្តាញសង្គម ថាពិតជាការសន្ទនារវាងរូបលោក និងលោក កឹម សុខា ពិតប្រាកដមែន។ លោក ហ៊ុន សែន ថែមទាំងចំអកថា ពីមុនមកលោក កឹម សុខា តែងតែហៅរូបលោក ហ៊ុន សែន ថា ជាអាយ៉ង តែទីបំផុត លោក ហ៊ុន សែន ចោទសួរទៅវិញថា តើនរណាជាអាយ៉ងរបស់នរណា?
ក្រៅពីនេះ លោកនាយករដ្ឋមន្រ្តី ក៏បានថ្លែងគំរាមដល់ប្រធានអង្គការក្រៅរដ្ឋាភិបាលមួយ ថាបើក្នុងនាមជាមន្រ្តីអង្គការសង្គមស៊ីវិល គឺត្រូវឲ្យច្បាស់ជាមន្រ្តីអង្គការសង្គមស៊ីវិល កុំវិភាគ និងលូកលាន់ក្នុងរឿងនយោបាយ។ លោក ហ៊ុន សែន ដាស់តឿនថា ប្រសិនបើធ្វើឲ្យប៉ះពាល់ដល់សិទ្ធិរបស់អ្នកដទៃ អាចនឹងត្រូវប្រឈមមុខនឹងផ្លូវច្បាប់។ ផ្លូវច្បាប់ដែលលោក ហ៊ុន សែន ចង់សំដៅដល់ ទំនងជា ពន្ធនាគារ ផងក៏មិនដឹង។
ចំណែកជុំវិញការឃោសនានយោបាយវិញ លោកនាយករដ្ឋមន្ត្រី បានប្រកាសដាច់ណាត់តែម្តងថា បើអ្នកនយោបាយមកពីគណបក្សណាក៏ដោយ ឲ្យតែហ៊ានឃោសនាប្រកាសថាបើខ្លួនឈ្នះឆ្នោត លុបបំណុល នោះគឺត្រូវវាយឃ្នោះនៅនឹងកន្លែងតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ