លោក ហ៊ុន សែន ថាជប៉ុនគឺជាគំរូខាងលទ្ធិប្រជាធិបតេយ្យសម្រាប់កម្ពុជា
លោកនាយករដ្ឋមន្ដ្រី ហ៊ុន សែន បានចាត់ទុកជប៉ុន ជាប្រទេសគំរូនៅក្នុងការអនុវត្តលទ្ធិប្រជាធិបតេយ្យ និងការអភិវឌ្ឍប្រទេស។ នេះគឺជាការលើកឡើងនៅក្នុងបទសម្ភាសជាមួយកាសែតក្យូដូ ជប៉ុន កាលពីថ្ងៃសុក្រ មុនពេលដែលប្រមុខរដ្ឋាភិបាលកម្ពុជា ទៅដល់ប្រទេសជប៉ុនដើម្បីចូលរួមកិច្ចប្រជុំកំពូលមេគង្គ-ជប៉ុន លើកទី១០ នៅទីក្រុងតូក្យូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ការដែលលោក ហ៊ុន សែន ថាប្រទេសជប៉ុនគឺជាគំរូខាងលទ្ធិប្រជាធិបតេយ្យសម្រាប់កម្ពុជាអនុវត្តតាម គឺជាការឆ្លើយតបនឹងសំណួរដែលថា តើរដ្ឋាភិបាលកម្ពុជានឹងដឹកនាំប្រទេសតាមរបៀបណាក្រោយការបោះឆ្នោតដែលគណបក្សកាន់អំណាចរបស់លោកឈ្នះបានអាសនៈទាំងអស់នៃរដ្ឋសភា។ ជាការបោះឆ្នោតដែលគ្មានគណបក្សប្រឆាំងអាចចូលរួមបាន ហើយរងការរិះគន់ពីប្រទេសកាន់លទ្ធិប្រជាធិបតេយ្យដូចជា សហរដ្ឋអាមេរិក និងសហភាពអឺរ៉ុប ជាដើម។
យ៉ាងណាក៏ដោយនៅក្នុងបទសម្ភាសជាមួយកាសែតក្យូដូ ជប៉ុន លោក ហ៊ុន សែន បានអះអាងថា "ខ្ញុំតែងតែសម្លឹងមើលប្រទេសអភិវឌ្ឍន៍មួយចំនួននៅក្នុងតំបន់និងនៅជុំវិញពិភពលោក។ដូច្នេះខ្ញុំអាចរៀនពីទិដ្ឋភាពនយោបាយនិងសេដ្ឋកិច្ច។ ជាពិសេសប្រទេសជប៉ុនរក្សាបាននូវសេដ្ឋកិច្ចរឹងមាំនិងស្ថេរភាពនយោបាយនិងជាគំរូប្រជាធិបតេយ្យពិតប្រាកដ "។
ក្រៅពីកោតសរសើរប្រទេសជប៉ុន ដែលផ្ដល់ជំនួយសម្រាប់ការអភិវឌ្ឍនៅកម្ពុជា លោក ហ៊ុន សែន បានប្រាប់កាសែតក្យូដូទៀតថា លោកមានបំណងជំរុញទំនាក់ទំនងកម្ពុជា-ជប៉ុនឲ្យទៅដល់ភាពជាដៃគូកិច្ចសហប្រតិបត្តិការជាយុទ្ធសាស្ត្រ គ្រប់ជ្រុងជ្រោយ។ ប្រសិនបើបែបនោះមែន ប្រទេសជប៉ុននឹងក្លាយជាប្រទេសទីពីរដែលក្លាយជាដៃគូយុទ្ធសាស្ត្រគ្រប់ជ្រុងជ្រោយជាមួយប្រទេសកម្ពុជាបន្ទាប់ពីប្រទេសចិន។
សូមរំឮកថា ប្រទេសជប៉ុនបានស្ថិតនៅចំណុចមួយដែលគេមើលឃើញថាជាការប្រទាញប្រទង់គ្នារវាងអតីតគណបក្សប្រឆាំង និងគណបក្សកាន់អំណាចរបស់កម្ពុជា។
មុនបោះឆ្នោត មេដឹកនាំអតីតបក្សសង្រ្គោះជាតិបានរកអន្តរាគមន៍ពីមេដឹកនាំប្រទេសជប៉ុនដើម្បីជំរុញឲ្យកម្ពុជាអនុញ្ញាតឲ្យគណបក្សប្រឆាំងធំបានចូលរួមបោះឆ្នោត ប៉ុន្តែខាងរដ្ឋាភិបាលកម្ពុជាបានអះអាងប្រាប់ជប៉ុនថា ការរំលាយគណបក្សប្រឆាំងនេះគឺជាការអនុវត្តន៍ច្បាប់របស់កម្ពុជា។
នៅទីបំផុតគណបក្សកាន់អំណាចរបស់ជប៉ុនបានចេញមុខអបអរការឈ្នះឆ្នោតរបស់គណបក្សប្រជាជនកម្ពុជា ប៉ុន្តែរដ្ឋាភិបាលរបស់ជប៉ុនបាននិយាយថាខ្លួនមិនពេញចិត្ត ទៅនឹងលទ្ធផលបោះឆ្នោតនៅកម្ពុជានេះទេ។ នេះគឺដូចគ្នានឹងសហរដ្ឋអាមេរិក និងសហភាពអឺរ៉ុបអញ្ចឹងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ