លោក ហ៊ុន សែន ថាការដែលបរទេសឈប់ផ្តល់ជំនួយដោយសារតែកម្ពុជាមានសេដ្ឋកិច្ចរីកចម្រើន
លោកនាយករដ្ឋមន្រ្តី ហ៊ុន សែន បានប្រាប់ឲ្យក្រសួងអប់រំ និងក្រសួងសង្គមកិច្ចត្រៀមខ្លួនទទួលយកសាលាគ-ថ្លង់មកគ្រប់គ្រងវិញនៅឆ្នាំ២០១៩ ដោយសារតែបរទេសនឹងឈប់ផ្តល់ជំនួយ ខណៈលោកអះអាងថាមកពីកម្ពុជាមានសេដ្ឋកិច្ចរីកចម្រើនហើយ។ ការលើកឡើងរបស់លោក ហ៊ុន សែន គឺនៅក្នុងពេលដែលលោករៀបចំអាហារជូនកុមារពិការគ-ថ្លង់ និងកុមារកំព្រាសរុប ៨៧៨នាក់ មកពីសាលាគ្រួសារថ្មី និងមណ្ឌលកុមារកំព្រានានាក្នុងរាជធានីភ្នំពេញនៅថ្ងៃអាទិត្យនេះ។
ចុះផ្សាយនៅថ្ងៃ៖ កែប្រែថ្ងៃទី៖
លោកប្រមុខរដ្ឋាភិបាលកម្ពុជា បានអះអាងថា ភាពអនុគ្រោះទាំងឡាយគឺត្រូវបានផ្តល់ឲ្យតែប្រទេសដែលមានការអភិវឌ្ឍន៍តិចតួចតែប៉ុណ្ណោះ ប៉ុន្តែពេលដែលប្រទេសនោះ មានការកើនឡើងនៃសេដ្ឋកិច្ច នោះម្ចាស់ជំនួយនឹងដកថយ ដើម្បីផ្ទេរជំនួយនោះទៅកាន់កន្លែងដែលមានការលំបាកជាងប្រទេសកម្ពុជា។ ផ្អែកលើហេតុផលនេះ លោក ហ៊ុន សែន បានប្រាប់ទៅក្រសួងអប់រំ និងក្រសួងសង្គមកិច្ច ឲ្យត្រៀមខ្លួនទទួលយកនូវបណ្តាមជ្ឈមណ្ឌលទាំងឡាយ ដែលម្ចាស់ជំនួយនឹងប្រគល់ឲ្យរដ្ឋាភិបាលកម្ពុជា ជាអ្នករ៉ាប់រងវិញ។ នេះក៏ជាមូលហេតុសំខាន់មួយដែលលោកប្រមុខរដ្ឋាភិបាល អះអាងថា ក្រសួងអប់រំ ក្រសួងសុខាភិបាល និងក្រសួងសង្គមកិច្ច ទទួលបានថវិកាជាតិកើនឡើងកាន់តែធំៗទៅៗនោះដែរ។
សូមបញ្ជាក់ថា អង្គការគ្រួសារថ្មី ឬសាលាបង្រៀនកុមារគ-ថ្លង់ ក្នុងខណ្ឌសែនសុខ ត្រូវបានបង្កើតឡើងចំនួន២៧ឆ្នាំមកហើយ ដោយជនបរទេស។
បើតាមលោក ហ៊ុន សែន អង្គការក្រៅរដ្ឋាភិបាលជាច្រើនទៀតក៏ត្រូវអស់ជំនួយផងដែរ គឺនៅក្រោមហេតុផលដែលលោកអះអាងថាមកពីប្រទេសកម្ពុជាមានសេដ្ឋកិច្ចរីកចម្រើនហើយ។ ប៉ុន្តែទន្ទឹមគ្នានោះ លោកបានលើកឡើងថា នៅពេលប្រទេសកម្ពុជាមានសេដ្ឋកិច្ចរីកចម្រើនហើយ ការខ្ចីលុយបរទេសក្នុងលក្ខខណ្ឌជាសម្បទានក៏ត្រូវផុតដែរ មានន័យថា កម្ពុជាត្រូវខ្ចីលុយបរទេសដែលមានការប្រាក់ទៅតាមអត្រាទីផ្សារពាណិជ្ជកម្ម។
គួរឲ្យដឹងដែរថា នៅឆ្នាំ ២០១៩ ខាងមុខ រដ្ឋាភិបាលកម្ពុជា គ្រោងខ្ចីលុយពីដៃគូអភិវឌ្ឍន៍បរទេស ក្នុងកម្រិត ១៤០០លាន SDR ឬ ស្មើនឹងប្រមាណជិត ២ពាន់លានដុល្លារបន្ថែមទៀត។ គិតត្រឹមខែកញ្ញា ឆ្នាំ ២០១៨ រដ្ឋាភិបាលកម្ពុជា បានជំពាក់បំណុលសាធារណៈពីបរទេស មានទឹកប្រាក់សរុបប្រមាណ ៦.៨ពាន់លានដុល្លារអាមេរិក។ នេះបើតាមការឲ្យដឹងពីស្ថានភាពបំណុលកម្ពុជា ក្នុងសេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០១៩ ដែលត្រូវបានគណៈរដ្ឋមន្រ្តីកម្ពុជា សម្រេចអនុម័ត កាលពីថ្ងៃទី ២៦ខែតុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ