លោក ហ៊ុន សែន ចេញទៅបំពេញទស្សនកិច្ចនៅចិននៅថ្ងៃស្អែក
លោកនាយករដ្ឋមន្ត្រី ហ៊ុន សែន នឹងទៅបំពេញទស្សនកិច្ចនៅប្រទេសចិនចំនួន៣ថ្ងៃចាប់ពីថ្ងៃអាទិត្យស្អែកនេះ។ នេះបើតាមការបញ្ជាក់នៅលើហ្វេសប៊ុករបស់ លោកនាយករដ្ឋមន្រ្តីនៅថ្ងៃសៅរ៍នេះ។ តាមគម្រោង ប្រមុខរដ្ឋាភិបាលកម្ពុជានឹងចុះហត្ថលេខាលើកិច្ចព្រមព្រៀងមួយចំនួនជាមួយសមភាគីចិន។
ចុះផ្សាយនៅថ្ងៃ៖
នៅក្នុងដំណើរទស្សនកិច្ចលើកនេះ លោកប្រមុខរដ្ឋាភិបាលខ្មែរ មានគម្រោងពិភាក្សាការងារជាមួយ លោកប្រធានាធិបតី ស៊ី ជិនពីង នាយករដ្ឋមន្ត្រី លី ឃឺឈាង ប្រធានរដ្ឋសភាប្រជាជនចិន លី ជាំងស៊ូ និងលោក វ៉ាង យ៉ាង ប្រធានសភាពិគ្រោះយោបល់ចិន។ លោក ហ៊ុន សែន ចាត់ទុកដំណើរទស្សនកិច្ចនេះថា ជាការពង្រឹងនូវចំណងមិត្តភាព និងកិច្ចសហប្រតិបត្តិការ ក្នុងនាមជាប្រទេសដៃគូយុទ្ឋសាស្រ្តគ្រប់ជ្រុងជ្រោយ។
បើតាមលោកនាយករដ្ឋមន្រ្តី ហ៊ុន សែន ភាគីទាំងពីរនឹងបើកកិច្ចពិភាក្សាលើការពង្រឹងវិស័យសេដ្ឋកិច្ច ពាណិជ្ជកម្ម និងវិនិយោគផងដែរ។ លើសពីនេះទៀតក៏មាន អនុស្សារណៈនិងកិច្ចព្រមព្រៀងមួយចំនួនត្រូវបានពង្រាងរួចហើយ សម្រាប់ចុះហត្ថលេខាជាមួយភាគីចិន។ ចិន ដែលលោក ហ៊ុន សែន ចាត់ទុកថា មានទំនាក់ទំនងល្អដូចជាបងប្អូន និងបានជួយកម្ពុជា យ៉ាងច្រើនចាប់តាំងពីជំនាន់សម្តេចព្រះនរោត្តម សីហនុ មកទល់សព្វថ្ងៃនេះ។
ជាការកត់សម្គាល់ លោកនាយករដ្ឋមន្ដ្រី ហ៊ុន សែន បានធ្វើដំណើរទស្សនកិច្ចទៅកាន់ប្រទេសចិនសរុបគឺចំនួន៦លើកមកហើយ ចាប់តាំងពីទស្សនកិច្ចលើកដំបូងនៅខែកុម្ភៈ ឆ្នាំ១៩៩៩។ លើកទី២ នៅខែមេសា ២០០៤ លើកទី៣ នៅខែធ្នូ ២០១០ លើកទី៤ នៅខែមេសា ២០១៣ លើកទី៥ នៅខែឧសភា ឆ្នាំ២០១៧ និងលើកទី៦ នៅខែមករា ឆ្នាំ២០១៩នេះ។
គួររំឭកដែរថា ចិនបានក្លាយជាប្រភពទេសចរណ៍ ដ៏ធំជាងគេបង្អស់របស់កម្ពុជា ដែលមានអ្នកទេសចរ ១,៦លាននាក់ មកកម្ពុជា នៅឆ្នាំ២០១៨។ ប្រទេសចិន បានក្លាយទៅជាដៃគូពាណិជ្ជកម្មធំបំផុតរបស់កម្ពុជា នៅឆ្នាំ២០១៨ ក្រុមហ៊ុនចិនបានដាក់ទុនវិនិយោគនៅកម្ពុជាសរុបជាង ២០ពាន់លានដុល្លារ ហើយក្រុមហ៊ុនចិន ៧០ភាគរយ ជាក្រុមហ៊ុនផលិតសម្លៀកបំពាក់ និងស្បែកជើង។ ក្រុមហ៊ុនទាំងនេះបានផ្តល់ការងារដល់ប្រជាពលរដ្ឋកម្ពុជារាប់សែននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ