ជប៉ុនគ្រោងនឹងផ្ដល់ទឹកប្រាក់ ជិត២៥០លានដុល្លារបន្ថែម មកកាន់កម្ពុជា
គិតចាប់តាំងពីខែមីនា មកទល់ចុងខែកក្កដា កម្ពុជាទទួលទឹកប្រាក់ប្រមាណជិត១៥០លានដុល្លារពីប្រទេសជប៉ុន សម្រាប់គម្រោងធំៗមួយចំនួន។ ហើយជប៉ុននឹងផ្ដល់ទឹកប្រាក់បន្ថែមសរុបចំនួនប្រមាណ២៥០លានដុល្លារ មកកម្ពុជាសម្រាប់គម្រោងចំនួនពីរ នៅរាជធានីភ្នំពេញ និងក្រុងព្រះសីហនុ។ បើតាមសេចក្ដីប្រកាសរបស់ក្រសួងការបរទេស ជំនួយនេះនឹងត្រូវបានចុះហត្ថលេខារវាងភាគីទាំងពីរ ក្នុងដំណើរទស្សកិច្ចទៅកាន់ប្រទេសជប៉ុន របស់លោកនាយករដ្ឋមន្ត្រីហ៊ុន សែន នៅថ្ងៃទី០៦ ដល់ថ្ងៃទី០៩ សីហាខាងមុខនេះ។
ចុះផ្សាយនៅថ្ងៃ៖
ស្តាប់ - ០១:៤៩
អត្ថបទដោយ៖ ទី កញ្ញា
ជំនួយ ដែលជប៉ុននឹងផ្ដល់មកកម្ពុជានេះ គិតជាទឹកប្រាក់សរុបមានចំនួនជិត២៥០លានដុល្លារ ហើយនឹងត្រូវយកមកអនុវត្តទៅលើគម្រោងពីរ ដោយមួយនៅរាជធានីភ្នំពេញ និងមួយទៀតនៅក្រុងព្រះសីហនុ។ ដោយនេះជាជំនួយទឹកប្រាក់បន្ថែម ពីទឹកប្រាក់ប្រមាណជិត១៥០លានដុល្លារពីប្រទេសជប៉ុន បើគិតចាប់តាំងពីខែមីនា មកទល់ចុងខែកក្កដា កន្លងមក។
ក្នុងនោះទឹកប្រាក់ប្រមាណ៣៥លានដុល្លារ ដែលជាការផ្ដល់ហិរញ្ញវត្ថុឥតសំណង នឹងត្រូវយកមកប្រើប្រាស់សម្រាប់គម្រោងអភិវឌ្ឍឡើងវិញ លើការការពារទឹកជំនន់ក្នុងរាជធានីភ្នំពេញឲ្យកាន់តែប្រសើរ។
រីឯ ទឹកប្រាក់ប្រមាណ២០៩លានដុល្លារទៀត ដែលជាជំនួយឥណទានសម្បទាន នឹងត្រូវអនុវត្តសម្រាប់គម្រោងចំណតផែកុងតឺន័រថ្មីរបស់កំពង់ផែស្វយ័ត ក្រុងព្រះសីហនុ។ នេះបើតាមសេចក្ដីប្រកាសរបស់ក្រសួងការបរទេសកម្ពុជា។
គួរជម្រាបជូនថា សម្រាប់ជំនួយទាំងពីរនេះ លោកនាយករដ្ឋមន្ត្រីហ៊ុន សែន នឹងចុះហត្ថលេខា ជាមួយនាយករដ្ឋមន្ត្រីជប៉ុន ក្នុងទស្សនកិច្ចការងារផ្លូវការរបស់លោក នៅប្រទេសជប៉ុន។ បន្ថែមពីការចុះហត្ថលេខាលើជំនួយនេះ លោកហ៊ុន សែននឹងជួបតំណាងភាគីជប៉ុន ពីអង្គការពាណិជ្ជកម្ម សមាគមមិត្តភាពកម្ពុជា-ជប៉ុន និងសមាគមមិត្តភាពជប៉ុន-មេគង្គផងដែរ។
សូមបញ្ជាក់ថា គិតពីចាប់តាំងពីខែមីនា មកទល់ចុងខែកក្កដា ជប៉ុនបានផ្ដល់ទឹកប្រាក់ប្រមាណជិត១៥០លានដុល្លារ សម្រាប់គម្រោងធំៗមួយចំនួន ដោយក្នុងនោះរួមមានទាំងជំនួយឥតសំណង ជំនួយកម្ចីដែលមានការប្រាក់ទាប និងវិភាគទានជាដើម។ តួយ៉ាង កាលពីខែមីនា កម្ពុជាទទួលថវិការពីជប៉ុនប្រមាណ១៤០លានដុលា្លរ។ ហើយកាលពីខែកក្កដា កម្ពុជាទទួលជាជំនួយឥតសំណងប្រមាណ៦លានដុល្លារ សម្រាប់វិស័យអប់រំ។ ចំណែកឯ ទឹកប្រាក់ជិត១លាន៣សែនដុល្លារទៀត ជប៉ុនបានប្រកាសផ្ដល់ទឹកប្រាក់មកភាគីអង្គការសហប្រជាជាតិនៃសាលាក្ដីខ្មែរក្រហម កាលពីថ្ងៃទី៣១ កក្កដា ឆ្នាំ២០១៧ កន្លងទៅ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ