ជប៉ុនស្វាគមន៍ការកាត់ទោសមេដឹកនាំខ្មែរក្រហម
ប្រទេសជប៉ុនបានប្រកាសស្វាគមន៍ភ្លាមៗបន្ទាប់ពីការកាត់ទោសមេដឹកនាំជាន់ខ្ពស់ក្នុងរបបខ្មែរក្រហមពីររូប កាលពីថ្ងៃទី១៦ ខែវិច្ឆិកា ដោយចាត់ទុកថាជាសមិទ្ធផលបន្ថែមទៀតរបស់តុលាការកូនកាត់មួយនេះ ដែលបានចាប់ផ្តើមតាំងពីឆ្នាំ២០០៦។ មេដឹកនាំជាន់ខ្ពស់ខ្មែរក្រហមពីររូប ដែលត្រូវបានតុលាការខ្មែរក្រហមកាត់ទោសឲ្យជាប់ពន្ធនាគារអស់មួយជីវិតជាលើកទី២។
ចុះផ្សាយនៅថ្ងៃ៖
ស្តាប់ - ០២:២០
ក្រៅពីការស្វាគមន៍នូវដំណើរការកាត់ទោសមេដឹកនាំជាន់ខ្ពស់ខ្មែរក្រហម ជប៉ុនបានហៅដំណើរការកាត់ក្តីរបស់តុលាការខ្មែរក្រហមថាជាជំហានដ៏សំខាន់ឆ្ពោះទៅរកសន្តិភាពទាំងស្រុងនៅកម្ពុជា ហើយនឹងរួមចំណែកក្នុងការផ្តល់យុត្តិធម៌ និងពង្រឹងនីតិរដ្ឋនៅក្នុងប្រទេសនេះផងដែរ។ នេះបើតាមសេចក្តីថ្លែងការណ៍របស់ក្រសួងការបរទេសជប៉ុន កាលពីថ្ងៃទី១៦ ខែវិច្ឆិកា។
តុលាការខ្មែរក្រហមនៅថ្ងៃទី ១៦ វិច្ឆិកា បានកាត់ទោសអតីតមេដឹកនាំជាន់ខ្ពស់នៃរបបខ្មែរក្រហមពីររូបគឺ នួន ជា និង ខៀវ សំផន ឲ្យជាប់ពន្ធនាគារអស់មួយជីវិត នៅក្នុងសំណុំរឿង ០០២ វគ្គ ០២។ ជាការកាត់ទោសឲ្យជាប់ពន្ធនាគារអស់មួយជីវិតជាលើកទី០២ បន្ទាប់ពីសំណុំរឿង០០២វគ្គ០១ តុលាការក៏បានកាត់ទោសឲ្យអតីតមេដឹកនាំខ្មែរក្រហមទាំងពីររូប ជាប់ពន្ធនាគារអស់មួយជីវិតដែរ។ ប៉ុន្តែផ្អែកតាមប្រការ៧៥ និង៧៦នៃសេចក្តីសម្រេចនេះ អង្គជំនុំជម្រះបានរួមបញ្ចូលគ្នានូវការផ្តន្ទាទោសទាំងពីរ ទៅជាការផ្តន្ទាទោសដាក់ពន្ធនាគារអស់មួយជីវិត តែមួយ។
យ៉ាងណាក៏ដោយ ប្រទេសជប៉ុនបានបង្ហាញក្តីសង្ឃឹមយ៉ាងមុតមាំថាសំណុំរឿង ដែលនៅសល់នឹងត្រូវបានតុលាការលើកយកមកជំរុំជម្រះយ៉ាងឆាប់រហ័ស ហើយទទួលបានជោគជ័យ ខណៈជនជាប់ចោទ និងជនរងគ្រោះនៅក្នុងសំណុំរឿងទាំងនោះមានអាយុកាន់តែច្រើន។
សូមជម្រាបជូនថា ប្រទេសជប៉ុនបានផ្តល់ជំនួយប្រមាណ៨៦លានដុល្លារអាមេរិកដល់អង្គជំនុំជម្រះវិសាមញ្ញក្នុងតុលាការកម្ពុជា ឬសាលាក្តីខ្មែរក្រហមចាប់តាំងពីឆ្នាំ២០០៦មក។ ចំនួនទឹកប្រាក់នេះស្មើនឹងប្រមាណ៣០ភាគរយនៃជំនួយពីអន្តរជាតិ ដែលបានផ្តល់ឲ្យតុលាការកូនកាត់មួយនេះ។
បើតាមលោក ប៊ិន ឈិន ប្រធានក្រុមការងារភាគីកម្ពុជាសម្រាប់ទ្រទ្រង់ដំណើរការតុលាការខ្មែរក្រហម ដំណើរការរបស់តុលាការនេះ បានប្រព្រឹត្តិទៅយូរជាងការរំពឹងទុក និងរហូតមកដល់ពេលនេះបានចំណាយថវិកាអស់ប្រមាណ២៩៧លានដុលារអាមេរិក ដែលទទួលបានពីរដ្ឋាភិបាលកម្ពុជា និងបណ្តាប្រទេសជាង៣៥។ ប្រទេសផ្តល់ជំនួយដល់ដំណើរការតុលាការខ្មែរក្រហម ក្នុងនោះប្រទេសជប៉ុនស្ថិតក្នុងចំណាត់ថ្នាក់ទី១ដែលបានផ្តល់ជំនួយប្រមាណ ៨៦លានដុល្លារ ហើយបន្ទាប់មកគឺរដ្ឋាភិបាលកម្ពុជាក្នុងចំណាត់ថ្នាក់ទី២ ដែលបានចូលរួមចំណែកជាថវិកាបដិភាគ និងសម្ភារៈ ដែលមានទឹកប្រាក់សរុបប្រមាណ៤៧លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ