សមាគមខ្មែរកម្ពុជាក្រោម នឹងរៀបចំទិវាពិភពលោកស្តីពីជនជាតិដើម នៅថ្ងៃទី៩ សីហា
អង្គការសមាគមខ្មែរកម្ពុជាក្រោម ចំនួន ១១ ស្ថាប័ន នៅថ្ងៃទី ៩ សីហា ខាងមុខនេះ នឹងរៀបចំពិធីអបអរសាទរខួបទី ១០ នៃទិវាពិភពលោកស្តីពីជនជាតិដើម នៅកម្ពុជាជាលើកទីមួយ។ លោក សឺន ជុំជួន នាយកកម្មវិធីសមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ បានបញ្ជាក់ប្រាប់វិទ្យុបារាំងថា ពិធីនេះរៀបចំឡើង ក្នុងគោលបំណងទាញការចាប់អារម្មណ៍ពីសហគមន៍អន្តរជាតិ ពិសេសរដ្ឋាភិបាលវៀតណាមឲ្យយកចិត្តទុកដាក់បន្ថែមចំពោះពលរដ្ឋខ្មែរកម្ពុជាក្រោម និងចាត់ទុកពលរដ្ឋខ្មែរកម្ពុជាក្រោមថា ជនជាតិដើម មិនមែនជាជនជាតិភាគតិចនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
បើតាមគម្រោង អង្គការសមាគមខ្មែរកម្ពុជាក្រោម នឹងប្រារព្ធទិវានៅនៅទីស្នាក់ការសមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ នៅភូមិគោកឃ្លាំង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដោយមានការចូលរួមពីសំណាក់ព្រះសង្ឃ ប្រជាពលរដ្ឋខ្មែរកម្ពុជាក្រោម តំណាងអង្គការក្រៅរដ្ឋាភិបាលផ្នែកសិទ្ធិមនុស្ស និងការិយាល័យនៃឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ប្រមាណជា ១២០ នាក់។
បើតាម លោក សឺន ជុំជួន នាយកកម្មវិធីសមាគមខ្មែរកម្ពុជាក្រោម ពិធីនេះធ្វើឡើងក៏ដើម្បីចូលរួមអបអរសាទរទិវាពិភពលោកស្ដីពីសិទ្ធិជនជាតិដើមរបស់អង្គការសហប្រជាជាតិ។ មិនត្រឹមតែប៉ុណ្ណោះ ពិធីនេះ ក៏នឹងក្លាយជាវេទិកាមួយ ដើម្បីចែករំលែកព័ត៌មាន ចំណេះដឹងដល់ខ្មែរក្រោម និងពលរដ្ឋទូទៅពីស្ថានភាពរស់នៅ និងសិទ្ធិ សេរីភាពរបស់ខ្មែរក្រោមដែលកំពុងឋិតក្រោមការគ្រប់គ្រងរបស់រដ្ឋាភិបាលវៀតណាម។
នាយកកម្មវិធីសមាគមខ្មែរកម្ពុជាក្រោម រូបនេះ បានវាយតម្លៃថា បើទោះបីជាស្ថានភាពរបស់ពលរដ្ឋខ្មែរកម្ពុជាក្រោម មានភាពល្អប្រសើរជាងមុន ក្នុងរយៈពេល ១០ ឆ្នាំចុងក្រោយ ក៏ដោយ តែលោកនៅតែទទូចឲ្យរដ្ឋាភិបាលវៀតណាម បញ្ឈប់រាល់ការធ្វើទុកបុកម្នេញនិងគាបសង្កត់ពលរដ្ឋគ្រប់រូបភាព។
សូមបញ្ជាក់ថា ជនជាតិដើមលើពិភពលោកមានប្រមាណ ៣៧០លាននាក់ រស់នៅក្នុងប្រទេសជាសមាជិកអង្គការសហប្រជាជាតិ។ យ៉ាងណាក៏ដោយ អង្គការសហប្រជាជាតិ បានវាយតម្លៃថា ពួកគេទាំងនោះ កំពុងប្រឈមនឹងបញ្ហាជាច្រើន ជាពិសេសពាក់ព័ន្ធនឹងសិទ្ធិសេរីភាព ក្នុងកាន់កាប់ដីធ្លី វប្បធម៌ ជំនឿ សាសនា និងភាសាជាដើម។ សិទ្ធិជនជាតិដើម និងសិទ្ធិជនជាតិភាគតិច ត្រូវបានអង្គការសហប្រជាជាតិ បើកកិច្ចប្រជុំ កាលពីថ្ងៃទី ១៣ កញ្ញា ឆ្នាំ ២០០៧ ដោយទទួលស្គាល់ និងអនុញ្ញាតឲ្យពលរដ្ឋដែលជាជនជាតិដើម និងជនជាតិភាគតិច ទទួលបានសិទ្ធិពេញលេញក្នុងការរស់នៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ