កម្ពុជានឹងស្ថិតក្នុងបញ្ជីតាមដានរបស់អង្គការឃ្លាំមើលការលាងលុយកខ្វក់
ប្រទេសកម្ពុជានឹងត្រូវអង្គការឃ្លាំមើលការលាងលុយកខ្វក់អន្តរជាតិ ដាក់បញ្ចូលទៅក្នុងបញ្ជីតាមដាន ដោយសារតែមានការព្រួយបារម្ភថាកម្ពុជាងាយរងគ្រោះដោយការលាងលុយកខ្វក់។នេះបើតាមការចុះផ្សាយរបស់ទីភ្នាក់ងារសារព័ត៌មានRuter។ ការដាក់ប្រទេសកម្ពុជាចូលក្នុងបញ្ជីពណ៌ប្រផេះបែបនេះ នឹងត្រូវប្រកាសនៅទីក្រុងប៉ារីសដែលនឹងទំនងនឹងកាត់បន្ថយលំហូរហិរញ្ញវត្ថុវិនិយោគនិងពាណិជ្ជកម្មអន្តរជាតិចេញចូលមកកាន់ប្រទេសអាស៊ីអាគ្នេយ៍។
ចុះផ្សាយនៅថ្ងៃ៖ កែប្រែថ្ងៃទី៖
ក្រុមការងារសកម្មភាពហិរញ្ញវត្ថុ ដែលហៅកាត់ថា«FATF» បាននិយាយនៅក្នុងរបាយការណ៍ថាប្រព័ន្ធយុត្តិធម៌នៅកម្ពុជាមាន«អំពើពុករលួយខ្ពស់»។ ប្រទេសកម្ពុជាបានប្រើប្រាស់ការស៊ើបការណ៍សម្ងាត់ហិរញ្ញវត្ថុតិចតួចក្នុងការស៊ើបអង្កេត។
អង្គភាពស៊ើបអង្កេតផ្នែកហិរញ្ញវត្ថុរបស់កម្ពុជាមិនបានត្រួតពិនិត្យមើលកាស៊ីណូនិងវិស័យអចលនទ្រព្យដែលបានរីកចម្រើនយូរអង្វែងដែលត្រូវបានកំណត់អត្តសញ្ញាណដោយអង្គការនានាដូចជាការិយាល័យអង្គការសហប្រជាជាតិប្រឆាំងគ្រឿងញៀននិងឧក្រិដ្ឋកម្មដែលត្រូវបានប៉ះពាល់ដោយការលាងលុយកខ្វក់របស់ក្រុមឧក្រិដ្ឋជននោះឡើយ។ នេះជាការលើកឡើងនៅក្នុងរបាយការណ៍ដដែល។
បើតាមរបាយការណ៍នេះ គ្មានករណីលាងលុយកខ្វក់ណាមួយធ្លាប់ត្រូវបានកាត់ទោសនៅកម្ពុជានោះទេ។
គួររំឭកជូនថា កម្ពុជាត្រូវបានដកចេញពីបញ្ជីពណ៌ប្រផេះរបស់ ក្រុមការងារសកម្មភាពហិរញ្ញវត្ថុ «FATF» កាលពីឆ្នាំ ២០១៥ ដូច្នេះការចុះបញ្ជីថ្មីនៅពេលនេះនឹងបង្ហាញថាវាបានដើរថយក្រោយនៅលើកិច្ចខិតខំប្រឹងប្រែងដើម្បីប្រឆាំងនឹងការលាងលុយកខ្វក់។
សូមបញ្ជាក់ថា ក្រុមការងារសកម្មភាពហិរញ្ញវត្ថុ ដែលហៅកាត់ថា «FATF» គឺជាអង្គការអន្តររដ្ឋាភិបាលដែលគាំទ្រការប្រយុទ្ធប្រឆាំងនឹងការលាងលុយកខ្វក់និងការផ្តល់ហិរញ្ញប្បទានភេរវកម្ម។ ប្រទេសកម្ពុជាត្រូវបានចុះក្នុង"របាយការណ៍វាយតម្លៃគ្នាទៅវិញទៅមក" លើគោលនយោបាយរបស់ខ្លួនក្នុងការប្រឆាំងការលាងលុយកខ្វក់និងហិរញ្ញប្បទានភេរវកម្មនេះកាលពីឆ្នាំ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ