ស្រី្ដម្នាក់ត្រូវបានតុលាការឃុំខ្លួនក្រោយបង្ហោះសារប្រមាថព្រះមហាក្សត្រ និងលោក ហ៊ុន សែន
យុវតី អ្នក លក់ ដូរមួយរូបរស់នៅក្រុងប៉ោយប៉ែត នៅថ្ងៃទី ១៧ កញ្ញា នេះ ត្រូបានតុលា ការ ខេត្តបន្ទាយមានជ័យ ចេញដីការឃុំខ្លួន បណ្ដោះអាសន្ននៅពន្ធនាគារ ក្រោយពេលរូបនាងត្រូវបានចោទប្រកាន់ថា ប្រមាថប្រមាថព្រះមហាក្សត្រកម្ពុជា ព្រះមហាក្សត្រិយ៍ នរោត្តម មុនិនាថសីហនុ និងលោកនាយករដ្ឋមន្ដ្រី ហ៊ុន សែន តាមរយៈការបង្ហោះសារនៅលើ Facebook របស់នាង។ លើសពីការឃុំខ្លួន ស្ដ្រីវ័យ២០ឆ្នាំរូបនេះត្រូវបានតុលាការដាក់ឲ្យស្ថិតក្រោមការពិនិត្យពីបទ ជេរប្រមាថជាសាធារណៈ និងញុះញង់ឲ្យមានការរើសអើង ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
គួររម្លឹកថា កាលពីពេលកន្លងមក សមត្ថកិច្ចកម្ពុជា បានឃាត់ខ្លួនអ្នករិះគន់ និងប្រមាថ តាមបណ្ដាញសង្គមទៅលើថ្នាក់ដឹកនាំកំពូលរបស់កម្ពុជា ជាបន្ដបន្ទាប់ដែរ ដែលអ្នកទាំងនោះបានរិះគន់ និងប្រមាថដោយខ្លួនឯង។ ប៉ុន្ដែនេះជាករណីថ្មី ដែលការរិះគន់ និងការប្រមាថធ្វើឡើងមានលក្ខណៈជាបណ្ដាញពីអ្នកទីបី។
យុវតីមួយរូបបានយករូបថតព្រះមហាក្សត្រកម្ពុជា សម្ដេចម៉ែ និងរូបលោកនាយករដ្ឋមន្ដ្រី ហ៊ុន សែន ដែលត្រូវបានគេកាត់តក្នុងន័យអសុរោះ និង មាន សរសេរ ជេ ប្រមាថ នៅ ពី លើរូបភាពផងនោះ ទៅបង្ហោះក្នុងហ្វែសប៊ុគរបស់នាង។ ក្រោយរូបភាពទាំងនោះត្រូវបានផ្សព្វផ្សាយជាសាធារណៈ នារីអ្នកលក់ដូរក្នុងផ្សារថៃរូបនេះ ត្រូវបានអាជ្ញាធរមានសមត្ថកិច្ចខេត្តបន្ទាយមានជ័យឃាត់ខ្លួនកាលពីថ្ងៃទី១៥ កញ្ញា ក្នុងគេហដ្ឋានរបស់នាង នៅក្រុងប៉ោយប៉ែត។
នៅចំពោះមុខសមត្ថកិច្ច នារីវ័យ ២០ ឆ្នាំ រូបនេះ បានសារភាពថា ខ្លួនពិតជាបានយករូប ភាពកាត់តមានលក្ខណៈប្រមាថ និងរិះគន់ទៅលើថ្នាក់ដឹកនាំកំពូលរបស់កម្ពុជា បង្ហោះក្នុងគណនីយហ្វែសប៊ុគរបស់នាងមែន។
ស្ត្រីអ្នកលក់ដូរនេះបានសារភាពថា ខ្លួនបានស្គាល់គ្នាជាមួយឈ្មោះ អ៊ា គីមស្រេង ខ្មែររស់នៅប្រទេសអូស្ត្រាលី ម្នាក់ រយ:ពេល០៣ឆ្នាំមកហើយតាមរយ:បណ្តាញប្រព័ន្ធហ្វេសប៊ុក។ នាងបន្ដថា ក្រោយមកឈ្មោះ អ៊ា គីមស្រេង បានផ្ញើរូបភាពកាត់ត និងខ្លឹមសារមួយចំនួនដែលមានលក្ខណៈរិះគន់ជេរប្រមាថថ្នាក់ដឹកនាំកម្ពុជា ឲ្យជួយចែកចាយបន្តទៅក្នុងគណនេយហ្វេសប៊ុករបស់នាង។ ប៉ុន្ដែបើតាមនារីម្នាក់នេះ នាងមិនទាន់បានប្រយោជន៍ណាមួយពីឈ្មោះ អ៊ា គីមស្រេង ក្រោយពីការបង្ហោះរូបភាព និងសារទាំងនោះ នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ