ទិវាអក្ខរកម្មជាតិ៖ នាយករដ្ឋមន្ត្រីអំពាវនាវឲ្យរោងចក្រ ក្រុមហ៊ុនឯកជន ជួយបើថ្នាក់អក្ខរកម្ម
ថ្ងៃទី០៨ ខែកញ្ញា នេះគឺជាទិវាអក្ខរកម្មជាតិ និងអន្តរជាតិ។ ប្រមុខរដ្ឋាភិបាលកម្ពុជាតាមរយៈសារលិខិត បានអំពាវនាវឲ្យស្ថាប័នពាក់ព័ន្ធបន្តចូលរួមលើកកម្ពស់ការងារអក្ខរកម្មនៅកម្ពុជាឲ្យកាន់តែមានប្រសិទ្ធភាព ជាពិសេសរោងចក្រ ក្រុមហ៊ុនឯកជន ត្រូវជួយបើកថ្នាក់អក្ខរកម្មសម្រាប់កម្មករ កម្មការិនី។ ខណៈក្រសួងអប់រំបានបញ្ជាក់ថា អត្រាអក្ខរកម្មជនពេញវ័យនឹងកើនឡើងដល់៩៥.៧ភាគរយនៅឆ្នាំ២០៣០ខាងមុខ។
ចុះផ្សាយនៅថ្ងៃ៖
លោកនាយករដ្ឋមន្ត្រីហ៊ុន សែនតាមរយៈសារលិខិត បញ្ជាក់ថានៅឆ្នាំ២០១៩នេះ កម្ពុជាបានប្រារព្ធទិវាអក្ខរកម្មជាតិក្រោមប្រធានបទ “អក្ខរកម្មផ្សារភ្ជាប់នឹងជំនាញមុខរបរ” ដែលទស្សនាទាននៃប្រធានបទនេះ មិនសំដៅត្រឹមតែការរៀនអក្សរ និងលេខនព្វន្តប៉ុណ្ណោះទេ ប៉ុន្តែបានគិតគូរដល់ឱកាសសម្រាប់យុវជនទទួលបានចំណេះដឹង ចំណេះធ្វើ សហគ្រិនភាព ជំនាញមុខរបរ និងនវានុវត្តន៍ គ្រប់ផ្នែក ជាពិសេស អក្ខរកម្មបច្ចេកវិទ្យា។
តាមរយៈសារលិខិតចុះថ្ងៃទី១៩ សីហា ឆ្នាំ២០១៩, លោកនាយករដ្ឋមន្ត្រី បាន អំពាវនាវចំនួន៨ចំណុចទៅកាន់ស្ថាប័នពាក់ព័ន្ធនានា ឲ្យមានការចូលរួមបន្តលើកកម្ពស់ការងារអក្ខរកម្មនៅកម្ពុជា។ នៅក្នុងនោះប្រមុខរដ្ឋាភិបាលកម្ពុជា ក៏បានអំពាវនាវឲ្យប្រធានរោងចក្រ សហគ្រាស និងក្រុមហ៊ុនឯកជន ជួយជំរុញការបើកថ្នាក់អក្ខរកម្មគួបផ្សំនឹងថ្នាក់បំប៉នមុខជំនាញវិជ្ជាជីវៈផ្សេងៗដល់កម្មករ កម្មការិនី។
បើតាមសេចក្តីប្រកាសរបស់ក្រសួងអប់រំយុវជន និងកីឡា មានកម្មករ កម្មការិនី ប្រមាណ១,៧០០នាក់ បានចូលរួមនៅក្នុងកម្មវិធីអក្ខរកម្មសម្រាប់កម្មករ ដែលពួកគាត់មកពី២៥រោងចក្រកាត់ដេរនៅ៩រាជធានី-ខេត្ត។
អ្នកនាំពាក្យក្រសួងអប់រំ លោក រស់ សុវាចារ បានថ្លែងប្រាប់វិទ្យុបារាំងអន្តរជាតិនៅថ្ងៃទី៨ ខែកញ្ញានេះថាកម្មករ កម្មការិនីមានកម្រិតអក្ខរកម្មផ្សេងៗគ្នា ហើយនៅតាមបណ្តារោងចក្រ ដែលមានកម្មករ កម្មការិនី មិនទាន់ជឿនលឿនលើការអាន និងការសរសេរ ក្រសួងបានបន្តសហការជាមួយអង្គការយូណេស្កូ និងរោងចក្រ ដើម្បីបន្តបើកថ្នាក់អក្ខរកម្មជូនពួកគាត់។
អ្នកនាំពាក្យក្រសួងអប់រំ បន្ថែមថា អ្នកដែលទទួលផលមិនមែនតែកម្មករ កម្មការិនីទេ គឺសូម្បីតែម្ចាស់រោងចក្រផ្ទាល់ក៏ទទួលបានផលពីសំណាក់កម្មករ កម្មការិនី ដែលពួកគាត់បានចូលរួមវគ្គអក្ខរកម្មរបស់ក្រសួងអប់រំ។
បើតាមការព្យាករណ៍ របស់ក្រសួងអប់រំ យុវជន និងកីឡា អត្រាអក្ខរកម្មជនពេញវ័យបានកើនឡើងពី៨២.៥ភាគរយក្នុងឆ្នាំ២០១៧ ទៅ៨៨ភាគរយក្នុងឆ្នាំ២០១៩ និងកើនឡើងដល់៩៥.៧ភាគរយនៅក្នុងឆ្នាំ២០៣០ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ