ករណីសកម្មជនCNRP៖ មេធាវីថា ដើមបណ្តឹង៤២នាក់មកចូលរួមសវនាការបានតែ៦នាក់
សវនាការនៅសាលាឧទ្ធរណ៍ទៅលើលោក មាជ សុវណ្ណារ៉ា និងសកម្មជនគណបក្សសង្គ្រោះជាតិ ១០រូបផ្សេងទៀត បានបិទបញ្ចប់នៅថ្ងៃទី២ ដោយនឹងបន្តបើកសវនាការសន្និដ្ឋាននៅថ្ងៃស្អែកទៀត។ រយៈពេល២ថ្ងៃនៃសវនការនេះ មេធាវីការពារក្តីឲ្យគណបក្សប្រឆាំង បានកត់សំគាល់ថា ភាគច្រើននៃដើមបណ្តឹងដែលជាអាជ្ញាធរមិនបានបង្ហាញវត្តមាន ទៅតាមអ្វីដែលពួកគេអះអាងថាជាជនរងគ្រោះនោះទេ។ តែបើតាមមេធាវីការពារជនជាប់ចោទ គឺសាលាឧទ្ធរណ៍បានផ្តល់ឱកាសឲ្យមានការបង្ហាញភស្តុតាងដោះបន្ទុកច្រើនជាងនៅសាលាដំបូង។
ចុះផ្សាយនៅថ្ងៃ៖
ស្តាប់ - ០១:៥៣
លោក សំ សុគង់ ជាមេធាវីម្នាក់ក្នុងចំណោមមេធាវីជាច្រើនទៀតដែលការពារក្តីឲ្យសកម្មជនគណបក្សសង្គ្រោះជាតិ១១រូប បានប្រាប់វិទ្យុបារាំងអន្តរជាតិRFIនៅល្ងាចនេះថា អ្វីដែលជាការកត់សំគាល់ នៅក្នុងសវនាការរយៈពេល២ថ្ងៃមកនេះ គឺភាគីដើមបណ្តឹងរដ្ឋប្បវេណីបានបង្ហាញមុខតែចំនួន៦នាក់ ក្នុងចំណោមម្ចាស់បណ្តឹងដែលជាសន្តិសុខនិងប្រជាការពារខណ្ឌដូនចំនួន៤២នាក់។
បើតាមលោកមេធាវី ការដែលដើមបណ្តឹងមិនមានវត្តមាននៅក្នុងសវនាការ លោកយល់ថា ដើម្បីឲ្យមានភាពយុត្តិធម៌ទាំងសងខាង គឺទាល់តែភាគីពាក់ព័ន្ធមានវត្តមានសួរដេញដោលក្នុងសវនាការ។
ក្រុមសន្តិសុខខណ្ឌដូនពេញ ដែលម្ចាស់បណ្តឹងបានចោទប្រកាន់សកម្មជនគណបក្សសង្រ្គោះជាតិថាបានប្រើហិង្សា ខណៈមានបាតុកម្មនៅជិតទីលានប្រជាធិបតេយ្យកាលពីឆ្នាំ២០១៤។ ប៉ុន្តែលោក សំ សុគង់ បានឲ្យដឹងថា នៅក្នុងសវនាការកូនក្តីរបស់ គឺលោក មាជ សុវណ្ណារ៉ា និងសកម្មជនគណបក្សសង្គ្រោះជាតិ១០រូបផ្សេងទៀត បានប្រាប់អង្គសវនាការថា ពួកគេជាជនរងគ្រោះទៅវិញទេ។ លើសពីនេះទៀត នៅក្នុងសវនាការនៃតុលាការជាន់ខ្ពស់នេះ ចៅក្រមបានផ្តល់ឱកាសឲ្យមានការបង្ហាញភស្តុតាងដោះបន្ទុកច្រើនជាងនៅសាលាដំបូងរាជធានីភ្នំពេញ។ នេះបើតាម លោក សំ សុគង់។
សូមបញ្ជាក់ថា កាលពីខែកក្កដាឆ្នាំ២០១៥ លោក មាជ សុវណ្ណារ៉ា ប្រធានផ្នែកព័ត៌មាន និងប្រព័ន្ធផ្សព្វផ្សាយ នៃអតីតគណបក្សសង្រ្គោះជាតិ លោក ឃិន ជំរឿន ប្រធានយុវជនគណបក្សនេះ និងលោក អឿ ណារិទ្ធ ត្រូវបានតុលាការក្រុងភ្នំពេញផ្តន្ទាទោសដាក់ពន្ធនាគារ ២០ ឆ្នាំ។
ចំណែក សកម្មជនចំនួន ៨ នាក់ផ្សេងទៀត ត្រូវបានតុលាការដដែលកាត់ទោសដាក់ពន្ធនាគារ ៧ ឆ្នាំក្នុងម្នាក់ៗ ក្រោមបានចោទប្រកាន់ថា «ចូលរួមកុបកម្ម» ខណៈពួកគេធ្វើបាតុកម្មរំដោះទីលានប្រជាធិបតេយ្យ កាលពីឆ្នាំ២០១៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ