ដែនជម្រកសត្វព្រៃមួយកន្លែងទៀតត្រូវបានបង្កើតឡើងនៅខេត្តក្រចេះ
រដ្ឋាភិបាលកម្ពុជា បានសម្រេចបង្កើតដែនជម្រកសត្វព្រៃមួយកន្លែងទៀតនៅស្រុកព្រែកប្រសព្វ និងស្រុកសំបូរក្នុងខេត្តក្រចេះ ដោយដាក់ឈ្មោះថាដែនជម្រកសត្វព្រៃ ព្រែកប្រសព្វ។ ដែនជម្រកសត្វព្រៃថ្មីនេះមានផ្ទៃដីទំហំ១២៧៧០ហិកតា ដោយមិនរួមបញ្ចូលដីកម្មសិទ្ធឯកជន និងដីប្រើប្រាស់ជាប្រយោជន៍សាធារណៈ។
ចុះផ្សាយនៅថ្ងៃ៖
ការសម្រេចបង្កើតដែនជម្រកសត្វព្រៃនៅខេត្តក្រចេះនេះ ត្រូវបានរដ្ឋាភិបាលកម្ពុជា អះអាងថាដើម្បីកិច្ចគាំពារបរិស្ថាន ការអភិរក្សប្រព័ន្ធអេកូឡូស៊ីជីវៈចម្រុះ និងការប្រើប្រាស់ធនធានធម្មជាតិប្រកបដោយនិរន្តរភាព។ នេះជាការគូសបញ្ជាក់នៅក្នុងអនុក្រឹត្យ របស់ប្រមុខរដ្ឋាភិបាលចុះថ្ងៃទី៥តុលាឆ្នាំ២០១៨។
បើតាមអនុក្រឹត្យដដែលនេះ ការបង្កើតដែនជម្រកសត្វព្រៃដ៍ធំមួយកន្លែងទៀតនេះ គឺជាការធានាឲ្យមានការថែទាំជម្រកសត្វព្រៃ សត្វស្លាប រុក្ខជាតិ និងជីវៈចម្រុះ ដើម្បីរក្សាលំនឹងបរិស្ថាន កាត់បន្ថយការប្រែប្រួលអាកាសធាតុ និងហានិភ័យមហន្តរាយដោយគ្រោះធម្មជាតិ។ លើសពីនេះទៀត ក៏ជាការលើកទឹកចិត្តឲ្យមានការចូលរួមរបស់សហគមន៍មូលដ្ឋាន និងអ្នកពាក់ព័ន្ធក្នុងថែរក្សានិងអភិរក្សធនធានធម្មជាតិប្រកបដោយនិរន្តរភាពផងដែរ។
សូមរំឭកថា កាលពីថ្ងៃទី១៦មីនាឆ្នាំ២០១៨ ព្រះមហាក្សត្រ បានចេញព្រះរាជក្រឹត្យមួយទៅក្រសួងបរិស្ថាន ឲ្យរំសាយដែនជម្រកសត្វព្រៃស្នួល ក្នុងខេត្តក្រចេះ និងដែនជម្រកសត្វព្រៃរនាមដូនសំ នៅខេត្តបាត់ដំបង។ ការរំសាយដែនជម្រកសត្វព្រៃទាំងពីរកន្លែងដែលមានផ្ទៃដីសរុបប្រមាណជាង១១ម៉ឺន៤ពាន់ហិកតា កាលណោះ ត្រូវបានក្រសួងបរិស្ថាន បកស្រាយថា មកពីការហិនហោចអស់ព្រៃអភិរក្ស ដោយសារតែកំណើនប្រជាជន។
តែជាមួយគ្នានោះ រដ្ឋាភិបាលកម្ពុជា ក៏បានសម្រេចបង្កើតដែនជម្រកសត្វព្រៃមួយកន្លែងឈ្មោះថា «សង្ឃរុក្ខាវ័ន» នៅក្នុងភូមិសាស្ត្រស្រុកចំនួន៣គឺស្រុកអន្លង់វែង ស្រុកសំរោង និងស្រុកចុងកាល់ ខេត្តឧត្តរមានជ័យ លើផ្ទៃដីជាង៣ម៉ឺនហិកតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ