សាលដីកាតុលាការក្រុងឡាអេ ប៉ះពាល់សតិអារម្មណ៍ប្រជាពលរដ្ឋតាមបណ្ដាខេត្តជាប់ព្រំប្រទល់ជាមួយថៃ
ជុំវិញការប្រកាសសាលដីការបស់តុលាការក្រុងឡាអេ នៅថ្ងៃទី១១វិច្ឆិកានេះ ប្រជាពលរដ្ឋខ្មែរ ដែលរស់នៅតាមបណ្ដាខេត្តជាប់ព្រំប្រទល់ជាមួយប្រទេសថៃ មានការព្រួយបារម្ភតិចតួចថា អាចនឹងមានការប៉ះទង្គិចណាមួយ រវាងកម្ពុជានិងថៃ។ ទោះជាយ៉ាងនេះក្ដី នៅព្រឹកថ្ងៃទី១១វិច្ឆិកានេះ ស្ថានភាពនិងជីវភាពប្រជាពលរដ្ឋនៅតាមបណ្ដាខេត្តជាប់ព្រំប្រទល់ជាមួយប្រទេសថៃ នៅតែដំណើរការទៅតាមប្រក្រតី។
ចុះផ្សាយនៅថ្ងៃ៖ កែប្រែថ្ងៃទី៖
សាលដីការបស់តុលាការក្រុងឡាអេ បានបង្កជាការបារម្ភខ្លះដល់ប្រជាពលរដ្ឋដែលរស់នៅខេត្តព្រះវិហារ។ លោក ឆាយ ថូ ដែលប្រកបរបរបើកឡានតាក់ស៊ីនៅជើងភ្នំ ដើម្បីជូនភ្ញៀវទេសចរឡើងទៅប្រាសាទព្រះវិហារ បានប្រាប់វិទ្យុបារាំងអន្ដរជាតិនៅព្រឹកនេះថា លោកបានត្រៀមខ្លួនខ្លះ ក្នុងករណីមានការប៉ះទង្គិចណាមួយ ក្រោយការប្រកាសសាលដីការបស់តុលាការយុត្តិធម៌អន្ដរជាតិ ពាក់ព័ន្ធនឹងរឿងរ៉ាវក្ដីក្ដាំប្រាសាទព្រះវិហារ។ ប៉ុន្តែ បើនិយាយពីការព្រួយបារម្ភវិញ លោកឆាយ ថូ បញ្ជាក់ថា លោកមិនមានការព្រួយបារម្ភខ្លាំងណាស់ណាទេ ដោយនៅព្រឹកនេះ លោកនៅតែបើកឡានជូនភ្ញៀវទេសចរឡើងទៅលេងប្រាសាទព្រះវិហារតាមធម្មតា។
នៅព្រះវិហារដែរ ប៉ុន្តែ នៅឃុំសាអែម ខេត្តព្រះវិហារ ប្រមាណ១៥គីឡូម៉ែត្រពីភ្នំ លោកឈឹម យឿន ជាអ្នកលក់ដូរឥវ៉ាន់ចាប់ហួយ បានបិទតូបរបស់លោក ដើម្បីត្រៀមខ្លួន និងតាមដានសាលដីកាតុលាការឡាអេ នៅរសៀលនេះ។ លោកបញ្ជាក់ថា រហូតមកទល់ថ្ងៃត្រង់នេះ ស្ថានភាពនៅឃុំសាអែម មានលក្ខណៈស្ងប់ស្ងាត់ធម្មតា។
ដោយឡែកនៅខេត្តបន្ទាយមានជ័យឯណោះវិញ លោកស៊ុំ ចាន់គា តំណាងអង្គការអាដហុកប្រចាំខេត្តបន្ទាយមានជ័យ មានប្រសាសន៍ថា ប្រធានបទអំពីសាលដីការបស់តុលាការឡាអេ បានវាយលុកតុគុយទាវ កាហ្វេ នានាក្នុងខេត្ត នៅព្រឹកថ្ងៃទី១១វិច្ឆិកានេះ។ លោកបញ្ជាក់ថា ប្រជាពលរដ្ឋព្រួយបារម្ភខ្លាចមានការប៉ះទង្គិច។ ចំពោះលោកចាន់គាផ្ទាល់ ប្រមុខរដ្ឋាភិបាលទាំងពីរ គឺកម្ពុជានិងថៃ គួរតែជ្រើសយកផ្លូវចរចាគ្នា ដោយមិនប្រើអាវុធប្រសើរជាង។
ផ្ទុយពីនៅតាមតុកាហ្វេ ប្រជាពលរដ្ឋខ្មែរដែលលក់ដូរនៅឯផ្សាររ៉ុងក្លឿថៃ មិនមានការជជែកគ្នាពីសាលដីកាតុលាការក្រុងឡាអេនោះទេ ដោយពួកគាត់រវល់ប្រកបអាជីវកម្មចិញ្ចឹមជីវិតតាមធម្មតា។ នេះបើតាមការឲ្យដឹងពីលោក ឡេង វិបុល ប្រជាពលរដ្ឋនៅទីក្រុងប៉ោយប៉ែត ខេត្តបន្ទាយមានជ័យ។ លោកវិបុលបញ្ជាក់ប្រាប់វិទ្យុបារាំងអន្ដរជាតិថា បើតាមការសង្កេតរបស់លោក មានការត្រៀមកម្លាំង និងចល័តទ័ពបន្តិចបន្តួច ដែលនេះបានបង្កជាការបារម្ភខ្លះដែរ តែមិនច្រើនទេ។ មិនបារម្ភច្រើនព្រោះលោកថា ប៉ោយប៉ែតជាច្រកសេដ្ឋកិច្ចដ៏សំខាន់រវាងកម្ពុជានិងថៃ ហើយលោកយល់ថា សាលដីការបស់តុលាការក្រុងឡាអេ មិនអាចធ្វើឲ្យមានការបិទព្រំដែននេះទេ។
ចំណែកលោក ឈឹម សំប៊ូន អាជីវករលក់គ្រឿងអេឡិចត្រូនិក នៅទីរួមខេត្តបាត់ដំបង ជាខេត្តដែលមានព្រំប្រទល់ជាប់ប្រទេសថៃដែរនោះ ឲ្យដឹងថា លោកដឹងថាតុលាការក្រុងឡាអេនឹងប្រកាសសាលដីកានៅរសៀលនេះ តែមិនបានតាមដានទេ ដោយសារតែរវល់លក់ដូរ។ លោក សំប៊ូន គ្មានព្រួយបារម្ភចំពោះការប៉ះទង្គិចទេ ព្រោះលោកយល់ថា ដំណាក់កាលនេះ ភាគីថៃមិនអាចរំលោភបំពានតាមចិត្តចង់ទៀតទេ។ រឿងក្ដីក្ដាំប្រាសាទព្រះវិហារ ឥឡូវនេះកំពុងមានអន្ដរាគមន៍ពីតុលាការអន្ដរជាតិ។ ហើយបើតាមលោកសំប៊ូន ភាគីទាំងសងខាង ត្រូវតែធ្វើតាមសាលដីកាតុលាការ បើទោះបីជាសាលដីកានោះ ចេញមកបែបណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ