ព្រះរាជពិធីច្រត់ព្រះនង្គ័ល៖ ទិន្នផលកសិកម្មបានផលបង្គួរ រីឯ លោក កឹម គុណវឌ្ឍន៍ លាលែងពីតំណែង
ព្រះរាជពិធីបុណ្យច្រត់ព្រះនង្គ័លដែលបានប្រារព្ធធ្វើកាលពីថ្ងៃសៅរ៍ម្សិលមិញបានបង្ហាញថា ពោត សណ្តែក និងស្រូវ នឹងទទួលបានទិន្នផលបង្គួរ។ នេះបើយោងតាមលទ្ធផលនៃការផ្សងប្រផ្នូលតាមរយៈគោឧសភរាជ។ ព្រះ រាជពិធីច្រត់ព្រះនង្គ័ល នៅឆ្នាំនេះ បានប្រារព្ធធ្វើឡើង នៅទីលានបាល់ទាត់ ក្រុងតាខ្មៅ ទីរួមខេត្តកណ្តាល ក្រោមព្រះរាជាធិបតីរបស់ ព្រះមហាក្សត្រ សម្តេច ព្រះបរមនាថ នរោត្តម សីហមុនី រួមទាំងមន្ត្រីជាន់ខ្ពស់របស់ព្រឹទ្ធសភា រដ្ឋសភា និងរាជរដ្ឋាភិបាល និងបណ្តាអង្គទូត ជាច្រើនទៀត។ អភិបាលខេត្តកណ្តាល លោក ផៃ ប៊ុនឈឿន និងភរិយា ជាស្តេចមាឃ និងព្រះមេហួ ។
ចុះផ្សាយនៅថ្ងៃ៖ កែប្រែថ្ងៃទី៖
ជាការកត់សម្គាល់ ព្រះរាជពិធីបុណ្យច្រត់ព្រះនង្គ័លឆ្នាំនេះគ្មានការផ្សាយបន្តផ្ទាល់តាមទូរទស្សន៍ដូចរាល់ឆ្នាំទេ។ ក្រសួងព័ត៌មានបានចេញលិខិតមួយដើម្បីសុំព្រះរាជទានទោសដល់ព្រះមហាក្សត្រ និងសុំទោសដល់ថ្នាក់ដឹកនាំ ព្រមទាំងប្រជាពលរដ្ឋខ្មែរទូទាំងប្រទេស។
ក្រសួងព័ត៌មាន បានពន្យល់តាមរយៈសេចក្តីប្រកាសព័ត៌មានរបស់ខ្លួនថា ការខកខានមិនបានផ្សាយបន្តផ្ទាល់តាមកញ្ចក់ទូរទស្សន៍ ស្តីពីព្រះរាជពិធីច្រត់ព្រះនង្គ័ល គឺដោយសារកង្វះទំនាក់ទំនងព័ត៌មាន និងខ្សែសង្វាក់ការងារមិនបានល្អ។ ក្រសួងព័ត៌មានសន្យាធ្វើយ៉ាងណាមិនអោយមានកំហុសឆ្គងដូចនេះ កើតឡើងម្តងទៀតឡើយ។
ស្របពេលជាមួយគ្នានេះដែរ អគ្គនាយកទូរទស្សន៍ជាតិ លោក កឹម គុណវឌ្ឍន៍ ក៏បានលាលែងពីតំណែង។ ទោះបីជាគ្មានការពន្យល់ហេតុផលពិតប្រាកដពីការលាលែងតំណែងនេះក៏ដោយ ក៏គេអាចយល់បានថា ការលាលែងពីតំណែងរបស់លោក កឹម គុណវឌ្ឍន៍ គឺជាប់ទាក់ទងនឹងការខកខានមិនបានផ្សាយបន្តផ្ទាល់តាមកញ្ចក់ទូរទស្សន៍ ស្តីពីព្រះរាជពិធីបុណ្យច្រត់ព្រះនង្គ័លនេះឯង។ ប៉ុន្តែ បើយោងតាមប្រភពមួយចំនួន ការខកខានមិនបានផ្សាយផ្ទាល់ដោយសារតែបញ្ហាបច្ចេកទេស កង្វះធនធាននិងមធ្យោបាយរបស់ទូរទស្សន៍ជាតិកម្ពុជា។
គួរកត់សម្គាល់ម្យ៉ាងទៀតថា មួយថ្ងៃមុនពេលប្រារព្ធពិធី ដំបូលវេទិកាសម្រាប់ប្រារព្ធពិធីត្រូវបានភ្លើងឆេះដោយសារការឆ្លងចរន្តអគ្គិសនី ប៉ុន្តែ ត្រូវបានគេពន្លត់ទាន់ដោយមិនបង្កការខូចខាតធំដុំទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ