តំណាងរាស្ត្រគណបក្សសង្គ្រោះជាតិមណ្ឌលកំពតប្រកាសលាឈប់ពីតំណែងនិងសមាជិកបក្ស
តំណាងរាស្ត្រគណបក្សសង្គ្រោះជាតិប្រចាំមណ្ឌលកំពតលោក វ៉ាន សំអឿន បានប្រកាសលាឈប់ពីសមាជិកគណបក្សសង្គ្រោះជាតិ និងលាឈប់ពីតំណាងរាស្ត្រមណ្ឌលកំពតដោយលើកហេតុផលថា គ្មានឳកាសបញ្ចេញសមត្ថភាពនិងឆន្ទៈដើម្បីជួយដោះស្រាយគណបក្សនិងប្រទេសជាតិ។ ការប្រកាសលាឈប់នេះ មន្ត្រីបក្សប្រឆាំងលោក យ៉ែម បុញ្ញឬទ្ធិ ចាត់ទុកថា ជារឿងគួរអោយភ្ញាក់ផ្អើលមួយ ក៍ប៉ុន្តែថា វាគឺជាសិទ្ធិសេរីភាពរបស់គាត់។ វ៉ា សំណព្វ លំអិតព័ត៌មាននេះ៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
តាមរយៈលិខិតផ្ញើទៅកាន់ប្រធានរដ្ឋសភាលោក ហេង សំរិន នៅថ្ងៃទី១៣ខែកុម្ភៈ លោក វ៉ាន សំអឿន តំណាងរាស្ត្រលំដាប់ទី១ នៅមណ្ឌលខេត្តកំពត របស់គណបក្សសង្គ្រោះជាតិ បានសម្រេចលាលែងពីមុខតំណែងជាតំណាងរាស្ត្រប្រចាំមណ្ឌលខេត្តកំពតនៅអាណត្តិទី៥ ចាប់ពីថ្ងៃចុះហត្ថលេខានេះតទៅ។
លោក វ៉ាន សំអឿន មិនអាចទាក់ទងសុំការបំភ្លឺបន្ថែមបានទេ កាលពីល្ងាចថ្ងៃទី១៣កុម្ភៈ។ ប៉ុន្តែតាមរយៈលិខិតមួយច្បាប់ ដែលផ្ញើទៅកាន់ប្រធានរដ្ឋសភា លោកហេង សំរិន បានអោយដឹងថា មូលហេតុនៃការលាឈប់នេះ គឺដោយសារតែ គ្មានឱកាស និងបម្រើប្រទេសជាតិ តាមឆន្ទៈ និងបទពិសោធន៍របស់គាត់។
លោក វ៉ាន សំអឿន ក៍បានផ្ញើលិខិតមួយផ្សេងទៀត ដើម្បីលាឈប់ពីសមាជិកគណបក្សសង្គ្រោះជាតិផងដែរ។ ប៉ុន្តែមិនទាន់មានការសម្រេចពីប្រធានគណបក្សលោក សម រង្ស៊ី និងអនុប្រធានគណបក្សលោក កឹម សុខា នៅឡើយទេ។
លោក យ៉ែម បុញ្ញាឬទ្ធិ អ្នកនាំពាក្យគណបក្សសង្គ្រោះជាតិ មានការភ្ញាក់ផ្អើលចំពោះការប្រកាសលាឈប់នេះ តែថា នោះគឺជាសិទ្ធិរបស់គាត់។ បើតាមការបញ្ជាក់ពីលោក យ៉ែម បុញ្ញាឬទ្ធិ ដដែលបានអោយដឹងបន្ថែមថា លោក វ៉ានសំអឿន បានបដិសេធ មិនរួមដំណើរជាមួយលោកទៅកាន់ខេត្តកំពតនោះទេ កាលពីថ្ងៃទី១២កុម្ភៈ នៅពេលដែលលោក បុញ្ញាឬទ្ធិ បានដឹកនាំ ក្រុមការងារគណៈកម្មការទី៧នៃរដ្ឋសភាចុះទៅកាន់ខេត្តកំពត។
លោក វ៉ាន សំអឿន អាយុ ៦៧ឆ្នាំ មកពីសហរដ្ឋអាមេរិក មានអតីតភាពជាសមាជិកគណបក្សសិទ្ធិមនុស្សនៅឆ្នាំ២០០៧ និងក្រោយមកបានក្លាយជាតំណាងរាស្ត្រមណ្ឌលកំពតនៅអាណត្តិទី៥នេះ ក្រោយពីគណបក្សសិទ្ធិមនុស្ស បានច្របាច់បញ្ចូលគ្នាជាមួយគណបក្សសមរង្ស៊ី មកជាគណបក្សសង្គ្រោះជាតិសព្វថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ