បក្សប្រឆាំង អះអាងថាក្រុមដែលអាជ្ញាធរបំបែក កាលពីល្ងាចថ្ងៃសិទ្ធមនុស្ស មិនមែនជាសមាជិករបស់ខ្លួន
អ្នកអបអរទិវាសិទ្ធិមនុស្ស១០ធ្នូមួយក្រុម ត្រូវអាជ្ញាធររាជធានីភ្នំពេញបំបែក និងដឹកចេញពីកន្លែងប្រារព្ធពិធីសំដៅទៅផ្ទះសំណាក់ព្រែកលៀបកាលពីល្ងាចម្សិលមិញ។ ប៉ុន្តែ អ្នកដែលត្រូវដឹកបញ្ជូនចេញពីទីលានប្រជាធិបតេយ្យទាំងនោះមិនរងអំពើហិង្សាអ្វីទេ។ នេះបើតាមការអះអាងរបស់អ្នកការពារសិទ្ធិមនុស្ស។ គណបក្សសង្គ្រោះជាតិអះអាងថា អ្នកទាំងនោះជា«ក្រុមឯករាជ្យ» ដែលមិនមែនជាសមាជិករបស់ខ្លួនទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
ព្រលប់ថ្ងៃទី១០ធ្នូម្សិលមិញ កម្លាំងនគរបាល និងអាវុធហត្ថរាជធានីភ្នំពេញ បានចុះទៅបំបែកហ្វូងអ្នកអបអរទិវាសិទ្ធិមនុស្សអន្តរជាតិមួយក្រុម ដែលមិនព្រមវិលត្រឡប់ទៅផ្ទះវិញ។ អាជ្ញាធរបានបណ្តេញអ្នកទាំងនោះឲ្យចាកចេញពីទីលានប្រជាធិបតេយ្យ រមណីយដ្ឋានវត្តភ្នំ និងម្តុំខាងមុខស្ថានទូតអាមេរិក បន្ទាប់ពីពួកគេបន្តស្ថិតនៅកន្លែងប្រារព្ធពិធីហួសម៉ោងកំណត់។
ពេលនោះ កម្លាំងសមត្ថកិច្ចបានបិទផ្លូវនៅមុខស្ថានទូតអាមេរិកនិងចាប់មនុស្ស១១នាក់ ពីក្នុងចំណោមអ្នកអបអរសិទ្ធិមនុស្សរាប់រយអ្នក ដាក់ឡានបញ្ជូនចេញទៅក្រៅក្រុងទាំងយប់។ ការណ៍នេះបានធ្វើឱ្យសកម្មជនសិទ្ធិមនុស្សបារម្ភអំពីការប្រើហិង្សាដោយអាជ្ញាធរទៅលើជនទាំងនោះ ប៉ុន្តែតាមពិតទៅ គ្មានរឿងដូចនេះទេ។
មនុស្សទាំង១១នាក់ត្រូវបានអាជ្ញាធរដឹកសំដៅទៅឱ្យស្នាក់នៅផ្ទះសំណាក់ព្រែកលៀប នាយប់នោះ ប៉ុន្តែពួកគេបានសុំអាជ្ញាធរប្តូរមកស្នាក់នៅវត្តគៀនឃ្លាំងវិញ។ ពួកគេ «មិនបានរងការវាយធ្វើបាបឬចាប់ចងឡើយ»។ នេះបើតាមលោក អំ សំអាត មន្ត្រីសិទ្ធិមនុស្សរបស់អង្គការលីកាដូ ដែលបានបញ្ជាក់ថា តាំងពីល្ងាចរហូតដល់ព្រឹកថ្ងៃទី១១ធ្នូនេះ ប្រជាជនដែលមកពីខេត្តព្រៃវែង កំពង់ចាម ក្រចេះ និងស្ទឹងត្រែង ក្នុងនោះមានស្ត្រី៣នាក់ផង «មានសេរីភាពទាំងស្រុង»។
ដោយបានឃ្លាំមើលសកម្មភាពរបស់អ្នកចូលរួមទិវាសិទ្ធិមនុស្ស និងរបស់អាជ្ញាធរជាប់ជានិច្ច លោក អំ សំអាត អះអាងថា ពួកគេជាក្រុម «អ្នកអបអរឯករាជ្យ» ពោលគឺមិនស្ថិតក្នុងគណបក្សសង្គ្រោះជាតិ ឬជាសមាជិកក្រុមអង្គការសង្គមស៊ីវិលណាមួយឡើយ។ ទន្ទឹមនឹងនេះដែរ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ ក៏បានបដិសេធថា ពួកគេ «មិនមែនជាសមាជិករបស់គណបក្សប្រឆាំងទេ» ត្បិតគណបក្សនេះបានប្រកាសរំសាយការជួបជុំតាំងពីម៉ោង១២ម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ