សហជីពបារម្ភខ្លាចសំណុំរឿងពួកគេពិបាករកច្រកចេញ នៅពេលមន្ត្រីទាញភ្ជាប់ករណីផ្លូវវ៉េងស្រេងនឹងលោក សម រង្ស៊ី
គិតមកដល់ពេលនេះ មេសហជីពខ្លះនៅមិនទាន់ដាក់ពាក្យបណ្ដឹងប្រឆាំងនឹងសេចក្ដីសម្រេចរបស់សាលាដំបូងក្រុងភ្នំពេញទៅកាន់តុលាការឧទ្ទរណ៍នៅឡើយទេ ខណៈសហជីពមួយចំនួនកំពុងរងចាំថ្ងៃកោះហៅពីតុលាការ។ ទន្ទឹមនឹងនេះ សហជីពដាក់ក្ដីព្រួយបារម្ភបន្ថែមនៅពេល មន្ត្រីរដ្ឋាភិបាលទាញភ្ជាប់សំណុំរឿងផ្លូវវ៉េងស្រេងនឹងអតីតមេដឹកនាំបក្សប្រឆាំង។ បារម្ភថា សំណុំរឿងពួកគេពិបាករកច្រកចេញ។
ចុះផ្សាយនៅថ្ងៃ៖
សំណុំរឿងហិង្សាលើផ្លូវវ៉េងស្រេងកាលពីឆ្នាំ២០១៣ ត្រូវបានអ្នកនាំពាក្យរដ្ឋាភិបាលនិងអ្នកនាំពាក្យគណបក្សកាន់អំណាចលើកឡើងជាថ្មីថា លោក សម រង្ស៊ី ដែលពេលនោះជាប្រធានគណបក្សសង្គ្រោះជាតិ ជាអ្នកទទួលខុសត្រូវខ្លាំងជាងគេ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា និង លោក រ៉ុង ឈុន ប្រធានសហភាពសហជីពកម្ពុជាលើកឡើងថា ការទាញយកករណីផ្លូវវ៉េងស្រេងភ្ជាប់ជាមួយនឹងអតីតគណបក្សប្រឆាំង ជារឿងផ្ទុយការពិត ។ ផ្ទុយការពិត ព្រោះការតវ៉ាពេលនោះជាការតវ៉ាមួយធ្វើឡើងដើម្បីប្រយោជន៍កម្មករតែប៉ុណ្ណោះ ដែលសូម្បីតែអ្នកបញ្ជាទិញក៏មើលឃើញដូច្នោះដែរ។ នេះបើតាមមន្រ្តីសហជីពទាំង២។
លោក អាត់ ធន់ រំពឹងថា សំណុំរឿងផ្លូវវ៉េងស្រេងនឹងបិទបញ្ចប់ត្រឹមការជំនុំជម្រះនៅក្នុងដៃតុលាការឧទ្ទរណ៍នាពេលខាងមុខ។ សំណូមពរជារួម សហជីពទទួចឲ្យការអន្តរាគមន៍របស់ប្រមុខរដ្ឋាភិបាលទៅកាន់ភាគីពាក់ព័ន្ធ ឈានទៅដល់ការទម្លាក់បទចោទទាំងស្រុងមកលើពួកគេ ពិសេសសំណុំរឿងផ្លូវវ៉េងស្រេងតែម្ដង។
គេនៅចាំបានថា ក្នុងចំណោមមេសហជីពទាំង៦រូប មាន៣រូបត្រូវបានប្រមុខរដ្ឋាភិបាលលោកនាយករដ្ឋមន្ត្រី ហ៊ុន សែន ចេញមុខការពារថា មិនជាប់នៅក្នុងសំណុំរឿងផ្លូវវ៉េងស្រេង។ សំណុំរឿងផ្លូវវ៉េងស្រេង ត្រូវបានរដ្ឋាភិបាលចាត់ទុកថា ជាកូដកម្មទម្លាក់រដ្ឋាភិបាលក្រោយការបោះឆ្នោតជាតិឆ្នាំ២០១៣។
អ្នកស្រី យ៉ាង សោភ័ណ្ឌ ប្រធានសម្ព័ន្ធសហជីពកម្ពុជាអះអាងជាថ្មីថា កុំថាឡើយមេសហជីពទាំងបីដែល លោក ហ៊ុន សែន ចេញមុខការពារ សូម្បីតែរូបអ្នកស្រីផ្ទាល់ និងសហជីពពីររូបទៀតគឺលោក រ៉ុង ឈុន និងអ្នកស្រី ម៉ម ញឹម ក៏មិនជាប់ព័ន្ធដែរ។ មិនជាប់ពាក់ព័ន្ធ ព្រោះគ្មានភស្តុតាងណាមួយមកបញ្ជាក់ឡើយថា អ្នកស្រីជាអ្នកដឹកនាំបាតុកម្មកាលណោះ បើទោះជាសាលាដំបូងបានព្យាយាមដូរបទចោទក៏ដោយ។
តុលាការក្រុងភ្នំពេញ កាលថ្ងៃទី១១ខែធ្នូ ប្រកាសសាលក្រមសម្រេចឲ្យប្រធានសហជីពទាំង៦រូប ជាប់ពន្ធនាគារ២ឆ្នាំ៦ខែ តែត្រូវព្យួរទោស និងបង់ប្រាក់ជំងឺចិត្តរួមគ្នាទៅជនរងគ្រោះ២នាក់ ចំនួន៣៥លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ