លោក សម រង្ស៊ី ថ្វាយលិខិតព្រះមហាក្សត្រ ជុំវិញរឿងបោះឆ្នោត ដែលគ្មានបក្សប្រឆាំង
ពីទីក្រុងប៉ារីស កាលពីថ្ងៃម្សិលម្ងៃ លោក សម រង្ស៊ី បានសរសេរលិខិតមួយថ្វាយព្រះមហាក្សត្រ ដើម្បីសូមស្នើព្រះអង្គ កុំធ្វើតាមអ្វី ដែលរដ្ឋាភិបាល និងគណបក្សប្រជាជនកម្ពុជា កំពុងតែស្នើព្រះអង្គឲ្យធ្វើអន្តរាគមន៍ ដើម្បីជម្រុញប្រជាពលរដ្ឋ ឲ្យទៅបោះឆ្នោត ថ្ងៃ ២៩ កក្កដា ខាងមុខ។ បើតាមអតីតប្រធានគណបក្សប្រឆាំងរូបនេះ ក្នុងកាលៈទេសៈបែបនេះ ព្រះមហាក្សត្រ មានតួនាទីប្រមូលផ្តុំ និងបង្រួបបង្រួមកូនចៅព្រះអង្គឡើងវិញ ដោយឈរលើគុណតម្លៃ និងគោលការណ៍ប្រកបដោយគតិយុត្តិធម៌ ដែលពលរដ្ឋចង់បាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
តាមរយៈលិខិតថ្វាយព្រះមហាក្សត្រ លោក សម រង្ស៊ី បានអះអាងថា រដ្ឋាភិបាល និងគណបក្សប្រជាជនកម្ពុជា ចាប់ផ្តើមដាក់សម្ពាធកាន់តែខ្លាំងឡើង មកលើប្រជាពលរដ្ឋ ដើម្បីជម្រុញប្រជាពលរដ្ឋ ឲ្យចូលរួមក្នុងការបោះឆ្នោតមួយ ប្រកបដោយភាពចម្រូងចម្រាស់។ ចម្រូងចម្រាស់ ពីព្រោះការបោះឆ្នោតនោះ កំពុងតែធ្វើឡើងដោយជាន់ឈ្លីលទ្ធិប្រជាធិបតេយ្យ ដើម្បីបម្រើតែផលប្រយោជន៍គណបក្សប្រជាជនកម្ពុជា។ បើតាមអតីតប្រធានបក្សប្រឆាំងរូបនេះ។
ក្នុងសំណេរដ៍វែងនោះ លោក សម រង្ស៊ី បានលើកឡើងថា «ព្រះមហាក្សត្រ ដែលជាទីគោរពរបស់ប្រជាពលរដ្ឋជាទូទៅ មិនត្រូវចូលរួមដាក់សម្ពាធបែបនេះ មកលើប្រជាពលរដ្ឋទេ»។ សម្ពាធបែបនេះដែល លោក សម រង្ស៊ី អះអាងថា «កំពុងតែទទួលការផ្តន្ទាទោសពីប្រជាពលរដ្ឋមួយចំនួនធំ ដែលគាំទ្រគណបក្សសង្គ្រោះជាតិ ហើយតាំងចិត្តធ្វើពហិការ មិនចូលរួមក្នុងការបោះឆ្នោតក្លែងក្លាយ ថ្ងៃ ២៩ កក្កដា ២០១៨»។
ការបោះឆ្នោតក្លែងក្លាយដែល លោក សម រង្ស៊ី ភ្ជាប់ទៅនឹងអ្នករាយការណ៍ពិសេសអង្គការសហប្រជាជាតិ លោកស្រី រ៉ូណាស្មីត ដែលបានបញ្ជាក់ក្នុងសេចក្តីថ្លែងការណ៍កាលពីថ្ងៃ ៣០ មេសា ២០១៨នេះថា "ការបោះឆ្នោតណាមួយ ដែលមិនមានការចូលរួមពីគណបក្សប្រឆាំងដ៏ធំជាងគេ គឺមិនមែនជាការបោះឆ្នោតពិតប្រាកដទេ"។
ក៏ប៉ុន្តែអ្នកនាំពាក្យគណបក្សប្រជាជនកម្ពុជា បានចាត់ទុកសំណេររបស់ លោក សម រង្ស៊ី ថា មានខ្លឹមសារ ប្រមាថព្រះមហាក្សត្រក្នុងបំណងបំបែកបំបាក់ស្ថាប័នព្រះមហាក្សត្រ និងគណបក្សកាន់អំណាច។
បើតាម លោក សុខ ឥសាន គឺរដ្ឋាភិបាលនៅរង់ចាំមើលប្រតិកម្ម ពីព្រះបរមរាជវាំងសិន មុននឹងសមត្ថកិច្ចចាត់វិធានលើ លោក សម រង្ស៊ី មួយករណីទៀត ក្នុងបទចោទប្រមាថព្រះមហាក្សត្រ។ ព្រះបរមរាជវាំងមកទល់ពេលនេះ នៅមិនទាន់មានប្រតិកម្មអ្វីឡើយ ទាក់ទងទៅនឹងលិខិតលោកសម រង្ស៊ី។
យ៉ាងណាក៏ដោយ លោក សម រង្ស៊ី ក៏បានរំឮកពីតួអង្គ ព្រះនរោត្តម សីហនុ ដែលតែងតែ បង្រួបបង្រួមប្រជាជាតិខ្មែរទាំងមូល។ ឧទាហរណ៍ នៅឆ្នាំ ១៩៩៨ និង ២០០៣ ព្រះអង្គបានបដិសេធ មិនយាងទៅបើកសម្ពោធរដ្ឋសភាថ្មី ដែលមិនមានវត្តមាន អ្នកតំណាងរាស្ត្រជាប់ឆ្នោត មកពីគ្រប់គណបក្សនយោបាយទាំងអស់ ជាពិសេស គណបក្សហ្វ៊ុនស៊ិនប៉ិច និង គណបក្ស សម រង្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ