ស៊ន សៀវម៉ី បំបែកឯតទគ្គកម្មឲ្យកីឡាកម្ពុជារយៈពេលជាង៤ទសវត្សរ៍
កីឡាការិនីតេក្វាន់ដូកម្ពុជា ស៊ន សៀវម៉ី បានកែប្រែប្រវត្តិសាស្ត្រកីឡាកម្ពុជាចាប់តាំងពី៤៤ឆ្នាំ ដោយកីឡាការិនីរូបនេះបានឈ្នះមេដាយមាសនៅថ្ងៃសុក្រនេះ នៅក្នុងការប្រកួតកីឡាអាស៊ីលើកទី១៧ នៅទីក្រុង Incheon ប្រទេសកូរ៉េខាងត្បូង។ ការឈ្នះមេដាយមាស ដែលកម្ពុជាមិនដែលធ្លាប់មាននាពេលនេះ បានធ្វើឲ្យកម្ពុជាឈរនៅលើប្រទេសជាង២០ក្នុង តំបន់អាស៊ី ដែលមានការចូលរួមចំនួន៤៥ប្រទេស។ថ្នាក់ដឹកនាំកីឡាកម្ពុជាបានសម្តែងមោទនភាពយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៧
កីឡាការិនីតេក្វាន់ដូកម្ពុជាស៊ន សៀវម៉ី ទីបំផុតបានឈ្នះមេដាយមាសនៅក្នុងការប្រកួតផ្តាច់ព្រ័ត្រជាមួយកីឡាការិនីអៀរ៉ង់ Rouhani Fatemeh នៅល្ងាចថ្ងៃសុក្រទី០៣តុលា នៅទីក្រុង Incheon ប្រទេសកូរ៉េខាងត្បូង ដោយទទួលបានពិន្ទុ ៧ទល់នឹង៤។ ការឈ្នះមេដាយមាសនៅក្នុងការប្រកួតដ៏ធំ ដែលកម្ពុជាមិនដែលធ្លាប់ជួបប្រទះនេះ បានធ្វើឲ្យប្រទេសកំពុងអភិវឌ្ឍន៍ និងទន់ខ្សោយខាងកីឡាមួយនេះ មានឈ្មោះជាលើកដំបូងនៅលើតារាងចំណាត់ថ្នាក់នៃប្រវត្តិសាស្ត្រប្រកួតកីឡាអាស៊ី បន្ទាប់ពីរយៈពេលជាង៤ទសវត្ស។
កម្ពុជាបានឈរនៅលេខរៀងទី២៧ក្នុងចំណោម៤៥ជាតិសាសន៍ដែលចូលរួមប្រកួតដោយបានទទួលតែមេដាយមាសតែមួយនេះគត់ចាប់តាំងពីការប្រកួតពីថ្ងៃទី១៣កញ្ញាដល់ថ្ងៃទី៣តុលា។
កីឡាការិនី ស៊ន សៀវម៉ី អាយុ១៨ឆ្នាំ ប្រកួតក្នុងប្រភេទទម្ងន់ក្រោម៧៣គីឡូក្រាមបានឈ្នះជាបន្តបន្ទាប់លើគូប្រកួត កីឡាការិនីមកពីប្រទេសអ៊ូបេគីស្ថាន Abdulla Eva Umida ដោយពិន្ទុដាច់ ២៩ពិន្ទុទល់ ៧ សម្រាប់វគ្គជម្រុះដំបូង។ឈ្នះកីឡាការិនីហ្វីលីពីន Alora Kirstie Elaine ប្រផិតប្រផើយ ៦ទល់នឹង៥ នៅវគ្គពាក់កណ្តាលផ្តាច់ព្រ័ត។
ប៉ុន្មាននាទីបន្ទាប់ពីប្រកាសលទ្ធផលនៃការប្រកួតប្រិយមិតនៅតាមប្រព័ន្ធហ្វេសប៊ុកបានធ្វើអត្ថាធិប្បាយព្រោងព្រាត ខ្លះថាសៀវមី ជាវីរៈនារីកីឡាកម្ពុជា ខ្លះសរសេរពាក្យអបអរសាទរ និងខ្លះទៀតប្រកូកប្រកាសឲ្យមានការទទួលឲ្យបានល្អនៅព្រលានយន្តហោះ ព្រមទាំង ចុច Like និង Shere ពីហ្វេសប៊ុកគណៈកម្មាធិការជាតិអូឡាំពិកកម្ពុជាយ៉ាងច្រើនសន្ធឹកសន្ធាប់។
ដោយឡែក លោករដ្ឋមន្ត្រីក្រសួងអប់រំ ហង្សជួន ណារ៉ុន ក៏បានជូនពរនិងលើកសរសើរកីឡាការិនី ស៊ន ដាវីន តាមហ្វេសប៊ុកជាបន្ទាន់ផងដែរ។ប្រតិភូកីឡាកម្ពុជាដែលនៅទីក្រុងIncheon អរកខិបកខុប ពីការបំបែកប្រវត្តិសាស្ត្រកីឡាខ្មែរនៅលើឆាកអន្តរជាតិនេះ។
ជាមួយគ្នានេះ លោក ថោង ខុន រដ្ឋមន្ត្រីក្រសួងទេសចរណ៍និងជាប្រធានគណៈកម្មាធិការជាតិអូឡាំពិកកម្ពុជាថ្លែងថា លោកមានក្តីរំភើបជាពន់ពេក ដោយលទ្ធផលបានដូចអ្វីដែលបានគិតទុក មុនការប្រកួតគឺកម្ពុជាតាំងចិត្តយកមេដាយយ៉ាងហោចណាស់ក៏១ដែរពីកីឡាអាស៊ីនេះ។
កាលពីឆ្នាំ១៩៧០ មានតែកីឡាករប្រដាល់កម្ពុជាម្នាក់ប៉ុណ្ណោះដែលបានឈ្នះមេដាយប្រាក់១
ក្រោយពីនោះ កម្ពុជាមិនដែលឈ្នះមេដាយអ្វីទាំងអស់សូម្បីតែសំរិត១ក៏គ្មានដែរ។ យោងតាមអនុក្រិត្យរបស់របស់រដ្ឋាភិបាល ជ័យលាភីមេដាយមាសកីឡាអាស៊ីត្រូវទទួលបាន
ប្រាក់រង្វាន់ចំនួន ៨០លានរៀល( ប្រមាណជា២ម៉ឺនដុល្លារ)។
នេះមិនទាន់គិតពីការឧបត្ថមពីក្រុមហ៊ុនឯកជននានា ដែលបានសន្យាផ្តល់ការលើកទឹកចិត្តមុនការប្រកួតផង។ សូមបញ្ជាក់ថាកម្ពុជាបានបញ្ជូន៧វិញ្ញាសារទៅកូរ៉េខាងត្បូង មានអត្តពលិកប្រមាណ ២០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ