អង្គការតម្លាភាពកម្ពុជា ស្វាគមន៍ការបង្កើតច្បាប់ការពារដល់អ្នករាយការណ៍
អង្គការតម្លាភាពកម្ពុជាបានចេញសេចក្តីថ្លែងការណ៍មួយ កាលពីថ្ងៃទី២៧វិច្ឆិកា ដោយបានស្វាគមន៍ចំពោះការប្តេជ្ញាចិត្តរួមគ្នារវាងអង្គភាពប្រឆាំងអំពើពុករលួយ និងគណៈកម្មការទី១០នៃរដ្ឋសភា ក្នុងការបង្កើតច្បាប់ការពារដល់អ្នករាយការណ៍។ អង្គការតម្លាភាពកម្ពុជាក៏បានស្វាគមន៍ផងដែរ ចំពោះភាពរីកចម្រើននៃការស៊ើបអង្កេតពាក់ព័ន្ធនឹងករណីគៃបន្លំប្រាក់របស់មូលនិធិសកល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
សេចក្តីថ្លែងការណ៍ស្វាគមន៍បានធ្វើឡើង មួយថ្ងៃក្រោយពីអង្គភាពប្រឆាំងអំពើពុករលួយ(ACU) បានបំភ្លឺនៅចំពោះមុខគណៈកម្មការស៊ើបអង្កេត បោសសំអាត និងប្រឆាំងអំពើពុករលួយជាគណៈកម្មការទី១០នៃរដ្ឋសភាកាលពីថ្ងៃទី២៦វិច្ឆិកា។ សេចក្តីថ្លែងការណ៍បានលើកឡើងថា ពួកគេមានឆន្ទៈក្នុងការធ្វើការរួមគ្នា ដើម្បីបង្កើតច្បាប់ថ្មីមួយ ស្តីពីការការពារដល់អ្នករាយការណ៍ពីអំពើពុករលួយ។ ជាច្បាប់ ដែលអង្គការសង្គមស៊ីវិលធ្វើការលើការប្រឆាំងអំពើពុករលួយនៅកម្ពុជា បានខិតខំតស៊ូមតិ ដើម្បីឲ្យមានយន្តការការពារដល់អ្នករាយការណ៍ដែលប្រកបដោយប្រសិទ្ធភាព។
យោងតាមមាត្រា១៣ នៃច្បាប់ប្រឆាំងអំពើពុករលួយ បានតម្រូវឲ្យស្ថាប័នប្រឆាំងអំពើពុករលួយ ចាត់វិធានការចាំបាច់ដើម្បីរក្សាសុវត្ថិភាពដល់អ្នករាយការណ៍ពីអំពើពុករលួយ។ ប៉ុន្តែមាត្រា៤១ បានចែងថា អ្នករាយការណ៍ពីអំពើពុករលួយ អាចត្រូវផ្តន្ទាទោសពីបទបរិហារកេរ្តិ៍ ប្រសិនបើពាក្យបណ្តឹងដែលដាក់ទៅអង្គភាពប្រឆាំងអំពើពុករលួយ (ACU) ត្រូវបានអង្គភាពនេះចាត់ទុកថា នាំឲ្យមានការសាកសួរដោយឥតប្រយោជន៍ ដែលប្រការនេះ ត្រូវបានអង្គការតម្លាភាពចាត់ទុកថា មិនបានលើកទឹកចិត្តឲ្យអ្នករាយការណ៍អំពើពុករលួយហ៊ានដាក់ពាក្យបណ្តឹងនោះទេ។
លោក ព្រាប កុល នាយកប្រតិបត្តិនៃអង្គការតម្លាភាពកម្ពុជា បានថ្លែងថា បើសិនជាច្បាប់នេះ ត្រូវបានអនុម័តមែន វានឹងធ្វើឲ្យអ្នករាយការណ៍ទទួលបានសុវត្ថិភាពក្នុងការរាយការណ៍ពីអំពើពុករលួយ ដែលនឹងជួយជម្រុញឲ្យកិច្ចខិតខំប្រឹងប្រែងប្រយុទ្ធប្រឆាំងអំពើពុករលួយកាន់តែមានប្រសិទ្ធភាពថែមទៀត។ អង្គការតម្លាភាពកម្ពុជាក៏បានប្រកាសត្រៀមខ្លួន ក្នុងការផ្តល់ជំនួយបច្ចេកទេសដល់រដ្ឋាភិបាល និងរដ្ឋសភា ក្នុងការធ្វើសេចក្តីព្រាងច្បាប់មួយនេះ និងធានាថា ជាច្បាប់ដែលស្របទៅនឹងច្បាប់អន្តរជាតិ។
យោងតាមរបាយការណ៍អំពើពុករលួយកាលពីឆ្នាំ២០១៣ កម្ពុជាស្ថិតនៅចំណាត់ថ្នាក់លេខ១៦០ក្នុងចំនោមប្រទេស១៧៧ ដែលមានអំពើពុករលួយច្រើន។ បើតាមលោក ព្រាប កុល នេះគឺជាចំណាត់ថ្នាក់មិនល្អឡើយសំរាប់កម្ពុជា។ ហើយនៅថ្ងៃទី៣ខែធ្នូខាងមុខនេះ របាយការណ៍ថ្មី ស្តីពី ចំណាត់ថ្នាក់អំពើពុយរលួយរបស់កម្ពុជានឹងត្រូវប្រកាសឡើង ចាប់ពីម៉ោង១០ដល់ម៉ោង១២ថ្ងៃត្រង់នៅឯសណ្ឋាគាឡឺរ៉ូយ៉ាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ