ថៅកែរោងចក្រប្រកាសថា ប្រាក់ខែកម្មករចាប់ពីខែមករា ទទួលបានទាបបំផុត ១៤៥ដុល្លារ រហូតដល់ ២៥០ដុល្លារ
ខណៈដែលរដ្ឋមន្ត្រីក្រសួងការងារ បានចេញសេចក្តីណែនាំស្តីពីការកំណត់ប្រាក់ឈ្នួលអប្បបរមារបស់កម្មកររោងចក្រកាត់ដេរសម្រាប់ឆ្នាំ២០១៥ គឺសមាគមរោងចក្រកាត់ដេរ GMAC ក៏បានចេញសេចក្តីប្រកាសបូកសរុបប្រាក់ឈ្នួលដែលកម្មកររោងចក្រកាត់ដេរ អាចនឹងមានសរុបសម្រាប់ឆ្នាំ២០១៥ មានចំនួនទាបបំផុត ១៤៥ ដុល្លារ ហើយកម្មករដែលធ្វើការយូរឆ្នាំ នឹងទទួលបានប្រាក់ខែរហូតដល់ ២៥០ ដុល្លារ។ ពាក់ព័ន្ធនឹងប្រាក់ខែកម្មករ នៅពេលនេះ សហជីពនឹងមិនធ្វើកូដកម្ម ឬបាតុកម្ម តវ៉ាអ្វីនោះទេ។
ចុះផ្សាយនៅថ្ងៃ៖
ស្តាប់ - ០២:៣០
ប្រាក់ខែអប្បបរមារបស់កម្មកររោងចក្រកាត់ដេរ ចាប់ពីខែមករា ឆ្នាំ២០១៥ តទៅ មានចំនួន ១២៨ ដុល្លារ។ រីឯកម្មករសាកល្បង ធ្វើការរយៈពេល ៣ ខែដំបូង ទទួលបាន ១២៣ ដុល្លារ។ ក្នុងសេចក្តីណែនាំ ចុះថ្ងៃទី១៧វិច្ឆិកា រដ្ឋមន្ត្រីក្រសួងការងារ លោក អ៊ិតសំហេង ក៏បានប្រាប់ដល់ថៅកែរោងចក្រសហគ្រាស ត្រូវបន្តផ្តល់ប្រាក់អត្ថប្រយោជន៍ផ្សេងៗ ឲ្យដល់កម្មករដដែល រួមមាន៖ ប្រាក់ធ្វើដំណើរ ប្រាក់មកធ្វើការងារទៀងទាត់ ប្រាក់បន្ថែមម៉ោង និងប្រាក់រង្វាន់អតីតភាពការងារ ជាដើម។
ទន្ទឹមនឹងសេចក្តីណែនាំរបស់រដ្ឋមន្ត្រីខាងលើ សមាគមរោងចក្រកាត់ដេរនៅកម្ពុជា ហៅកាត់ថា GMAC ដែលជាក្រុមថៅកែរោងចក្រកាត់ដេរ ក៏បានចេញសេចក្តីប្រកាស បូកសរុបប្រាក់ឈ្នួល ដែលកម្មកររោងចក្រកាត់ដេរ អាចទទួលបាន ចាប់ពីខែមករា ឆ្នាំ២០១៥ តទៅ។
តាម GMAC ប្រាក់ឈ្នួលប្រចាំខែទាបបំផុតលើមូលដ្ឋានការងារស្នូល ៨ ម៉ោង ក្នុងមួយថ្ងៃ សម្រាប់កម្មករ មានតួនាទីទាបបំផុត គឺមានចំនួនពី ១៤៥ ដុល្លារ ទៅ ១៥០ ដុល្លារ ទោះជាអ្នកបោសសំអាត ថែសួន អ្នកយាម អ្នកដេរ អ្នកអ៊ុត ឬវេចខ្ចប់ក៏ដោយ។
ក្នុងសេចក្តីប្រកាស ជាភាសាខ្មែរ និងអង់គ្លេស GMAC បានគិតគូថា ករណីធ្វើការថែមម៉ោង ដោយឈរលើគោលការណ៍ស្ម័គ្រចិត្ត អតិបរមា ២ ម៉ោង ក្នុងថ្ងៃ បូកទាំងប្រាក់ថ្លៃអាហារសម្រាប់ការងារបន្ថែមម៉ោង ប្រាក់រង្វាន់អតីតភាពការងារ ប្រាក់រង្វាន់សម្រាប់បរិមាណផលិត ព្រមទាំងការធានារ៉ាប់រងគ្រោះថ្នាក់ការងារ ជំងឺវិជ្ជាជីវៈ និងការធានារាប់រ៉ងសុខភាព គឺចាប់ពីខែមករា ឆ្នាំ២០១៥ តទៅ កម្រិតប្រាក់ឈ្នួលប្រចាំខែ សរុបដែលកម្មករ អាចមានលទ្ធភាពនឹងទទួលបាន គឺចន្លោះពី ២២៥ ដុល្លារ ទៅ ២៥០ ដុល្លារ។
តួលេខរបស់ GMAC ដូច្នេះ ត្រូវបានលោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ចាត់ទុកថា ថៅកែរោងចក្រ ចង់ឲ្យកម្មករស្ងប់អារម្មណ៍ កុំតវ៉ាឡើងប្រាក់ខែ ព្រោះថា ប្រាក់ខែនៅឆ្នាំក្រោយ កម្មករអាចទទួលបានលើសពីអ្វីដែលកម្មករ ធ្លាប់ទទួលបានហើយ។
យ៉ាងណាក៏ដោយ លោក ប៉ាវ ស៊ីណា បញ្ជាក់ថា តាមការស្ទាបស្ទង់មតិកម្មករ បន្ទាប់ពីរដ្ឋាភិបាល សម្រេចឡើងប្រាក់ខែគោល ១២៨ ដុល្លាររួចមក គឺកម្មករតាមរោងចក្រ ហាក់ដូចជាមិនមានប្រតិកម្មខ្លាំងក្លាអ្វីទេ ទោះជាប្រាក់ខែនោះ ឡើងមិនដល់ចំណុចទាមទារក៏ដោយ។
តាមលោកប៉ាវស៊ីណា សហជីពកម្មករ នឹងមិនធ្វើកូដកម្ម ឬបាតុកម្ម ទាមទារឡើងប្រាក់ខែអ្វីទៀតទេ តែសហជីព នឹងជជែកជាមួយក្រុមអ្នកបញ្ជាទិញ អំពីរឿងប្រាក់ខែនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ