យុវជនខ្មែរទទួលយកវប្បធម៌បរទេសដោយស្ម័គ្រចិត្ត
នៅក្នុងទិវាវប្បធម៌ជាតិលើកទី ១៧ នៅឯកោះពេជ្រនៅថ្ងៃអង្គារនេះ លោកនាយករដ្ឋមន្ត្រី ហ៊ុន សែន បានមានប្រសាសន៍ថា «ការទទួលយកវប្បធម៌បរទេសក្នុងចំណោមយុវជនខ្មែរ គឺជាការស្ម័គ្រចិត្ត»។ ជាមួយគ្នានេះ លោកបានណែនាំឲ្យ ក្រសួងវប្បធម៌បង្កើតព្រឹត្តិការណ៍វប្បធម៌ឲ្យបានច្រើន និងមានការលើកកំពស់សិល្បៈបុរាណ ព្រមទាំងផ្តល់ឲ្យមានជំនួបរវាងអ្នកសិល្បៈករជើងចាស់ ជាមួយយុវជនដើម្បីចែករំលែកបទពិសោធន៍ដល់ក្មេងជំនាន់ក្រោយ។
ចុះផ្សាយនៅថ្ងៃ៖
ស្តាប់ - ០២:៤៨
«បញ្ហាវប្បធម៌មិនមែនជាការឈ្លានពានមួយទេ តែវាស្ថិតនៅត្រង់ថាយើងទទួលយករបស់គេដោយការស្ម័គ្រចិត្តតែប៉ុណ្ណោះ»។ គឺជាការលើកឡើងរបស់លោកនាយករដ្ឋមន្ត្រី ហ៊ុន សែន នៅពិធីមួយឯកោះពេជ្រនៅព្រឹកថ្ងៃអង្គារនេះ ក្នុងឱកាសនៃទិវាវប្បធ៌មជាតិ០៣មីនា ខួបលើកទី១។
លោកនាយករដ្ឋមន្ត្រី បានប្រៀបធៀបទៅនឹងប្រទេសបារាំងដែលបានត្រួតត្រាប្រទេសកម្ពុជាជិតមួយសទវត្ស តែមិនបានទុកវប្បធម៌របស់គេនៅប្រទេសកម្ពុជាគួរឲ្យកត់សម្គាល់ទេ ដោយសារជំនាន់នោះវប្បធម៌របស់ខ្មែរខ្លាំង ហើយលោកអំពាវនាវឲ្យមានការដកពិសោធពីចំណុចខ្លាំងរបស់វប្បធម៌ខ្មែរពីអតីតកាល។
«សម្លេង ហ៊ុន សែន»
ជាមួយគ្នានេះ លោក ហ៊ុន សែន ក៏បានរិះគន់អ្នកឧបត្ថម ដែលបានផ្សាយពាណិជ្ជកម្ម ដល់កម្មវិធីរាំរញាក់រញ័រ ហើយលើកទឹកចិត្តឲ្យមានការឧបត្ថមផ្នែកសិល្បៈបុរាណ មានចាប៉ីដងវែងជាដើម។ លើសពីនេះលោកនាយករដ្ឋមន្ត្រីក៏បានស្នើឲ្យក្រសួងវប្បធម៌រៀបចំ កម្មវិធីជួបជុំមួយរវាងយុវជនជំនាន់ក្រោយ ជាមួយនឹងវរៈសិល្បៈករចាស់ៗ ដើម្បីឲ្យពួកគាត់និយាយ និងផ្តល់បទពិសោធន៍ដល់ក្មេងៗ បន្ទាប់ពីសេសសល់ពីការកាប់សម្លាប់របស់ ប៉ុល ពត។
ទាក់ទងទៅនឹងទិវានៃសេចក្តីស្រលាញ់ថ្ងៃទី១៤កុម្ភៈ ជារៀងរាល់ឆ្នាំ លោកនាយករដ្ឋមន្ត្រីក៏បានបន្ថែម ដោយរិះគន់ការព្រួយបារម្ភមួយចំនួនចំថ្ងៃនោះ ពីការប្រគល់ខ្លួនប្រាណរវាងយុវវ័យ ដោយហេតុថា ក្រុមយុវជនចេះដឹងខ្លួនឯងហើយ ហើយមិនអាចទប់ស្កាត់បានទេ។ក៏ប៉ុន្តែលោកក៏ស្នើសុំឲ្យមានការទទួលយកការអប់រំ ជាកញ្ចប់ ព្រមទាំងណែនាំឲ្យក្រសួងវប្បធម៌ រៀបចំព្រឹត្តិការណ៍វប្បធម៌ឲ្យបានច្រើន ដើម្បីដាស់ស្មារតីពលរដ្ឋខ្មែរ។
សូមបញ្ជាក់ថា លើការការពារនិងអភិរក្សវប្បធម៌ខ្មែរបច្ចុប្បន្ន ត្រូវគេមើលឃើញថា នៅមានភាពធូរលុង ហើយក្រសួងវប្បធម៌មិនសូវមានចំណាត់ការខ្លាំងក្លារ ជាហេតុនាំឲ្យមានការព្រួយបារម្ភពីការសាបរលាបវប្បធម៌ ដ៏ល្អរបស់ខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ