ខួបបក្ស១០ឆ្នាំ លោក ខឹម វាសនា សារភាពថាមានកំហុសក្នុងការជ្រើសរើសសមាជិក!
ថ្ងៃទី២៦មិថុនា២០១៦នេះ គឺខួប១០ឆ្នាំនៃការបង្កើតគណបក្សសម្ព័ន្ធដើម្បីប្រជាធិតេយ្យ ឬLDP។ ក្នុងសន្និសីទកាសែតថ្ងៃនេះ លោក ខឹម វាសនា បានសារភាពថាខ្លួនពិតជាមានកំហុសក្នុងការជ្រើសរើសអនុប្រធាន ខុសដល់ទៅ២ដង និងសមាជិកអចិន្ត្រៃយ៍ផ្សេងទៀត។ ក៏ប៉ុន្តែប្រមុខបក្សរូបសញ្ញាជួងរូបនេះ មិនសារភាពដាច់ខាតថា ការជេររបស់លោកនាពេលកន្លងមក ថាជាកំហុសនោះទេ។ លោកថែមទាំងសរសើរថា ការជេររបស់លោកគឺជាភាពខ្លាំងថែមទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ក្រៅពីបានថ្លែងសារភាពថាខ្លួនខុសពិតមែនក្នុងជ្រើសរើសមនុស្សមិនត្រូវត្រឹមនាពេលកន្លងមក លោក ខឹម វាសនា បានចាត់ទុកថានេះជាបទពិសោធ ហើយលោកបានស្នើឲ្យអ្នកគាំទ្រជួយពិនិត្យមើលមនុស្សដែលខ្លួនបានជ្រើសរើសផង។ ក៏ប៉ុន្តែចំពោះការជេរគេវិញ ប្រមុខបក្ស LDP ប្រកាន់ជំហររឹងមាំថា មិនខុសទេ ព្រោះលោកជេរមនុស្សដែលគួរជេរ ហើយវាមានដើមហេតុដែលនាំឲ្យក្រុមរបស់លោកជេរផងដែរ។ លើសពីនេះ ប្រធានបក្សជួង បានឲ្យដឹងថា ការជេររបស់លោក ធ្វើឲ្យអ្នកគាំទ្រពេញចិត្តនិងចូលរួមថវិកាទ្រទ្រង់បក្ស ប្រហែល៧ទៅ៨ម៉ឺនដុល្លារជារៀងរាល់ខែទៀតផង។ ច្រើនជាងនេះ អ្នកគាំទ្រLDPផ្សេងទៀត បានទិញឡានម៉ាក់ Mazda ២០១៦ថ្មី ជូនលោកថែមទៀត។ បើតាមលោក ខឹម វាសនា ទាំងនេះ គឺជាកាដូនៃការជេររបស់លោក។
ទោះយ៉ាងនេះក្តី អ្នកនយោបាយវ័យ៥១ឆ្នាំរូបនេះ បានបង្ហើបថា១០ឆ្នាំមកនេះ បក្សរបស់ខ្លួនមានឧបសគ្គ៣សំខាន់ៗ។ ទី១គឺបក្សកាន់អំណាចដែលក្តាប់អំណាចប្រមូលផ្តុំ ទី២ បក្សសង្គ្រោះជាតិដែលចេះតែលាបពណ៌ ក្រុមសង្គមស៊ីវិលដែលលម្អៀង និងក្រុមលាក់ខ្លួនក្នុងសាសនា។ លោកពន្យល់ថាក្រុមមនុស្សទាំងនេះភាគច្រើនជាអ្នកឆ្លៀតឱកាសកេញចំណេញលើភាពឈឺចាប់របស់ប្រជាពលរដ្ឋ។ ចំណែកឧបសគ្គធំទី៣ នោះគឺពលរដ្ឋខ្មែរខ្លួនឯងតែម្តង ដែលមិនយល់ពីសច្ចភាពនៃព្រះធម៌ មិនខ្វល់ពីនយោបាយ និងមិនយល់ពីដំណើរការប្រជាធិបតេយ្យពិតប្រាកដ។
ដូច្នេះហើយ ទើបក្នុងឱកាសខួប១០ឆ្នាំរបស់បក្សនេះ លោក ខឹម វាសនា ថាមិនមានដាក់ចេញគោលនយោបាយថ្មីអ្វីទេ! ប្រមុខបក្សសម្ព័ន្ធដើម្បីប្រជាធិបតេយ្យ គ្រាន់បានប្រាប់ថានឹងបន្តពង្រីងសកម្មភាពការងារប្រចាំថ្ងៃរបស់បក្សតទៅទៀត ដើម្បីសម្រេចបាននូវការដាក់ចេញយន្តការ៨ចំណុច កាត់បន្ថយអំណាចរដ្ឋ ឲ្យពលរដ្ឋមានអំណាច។ កាលណាពលរដ្ឋយល់ ឧបសគ្គផ្សេងទៀតអាចបំបាក់បានដោយងាយ។ ចំណែកកិច្ចការស្នូលរបស់បក្សជួងនេះ ត្រូវបានលោក ខឹម វាសនា ពន្យល់ថាគឺការផ្សាយវិទ្យុនិងចុះដើរពន្យល់ប្រជាពលរដ្ឋ ពីព្រះធម៌ គោលការណ៍ប្រជាធិតេយ្យ និងរបៀបរស់នៅក្នុងភាពថ្លៃថ្នូរជាមនុស្ស ព្រមទាំងលាងចម្រះភាពល្ងង់ខ្លៅ និងភាពអសកម្មរបស់មនុស្សខ្មែរ ហើយផ្តល់មូលដ្ឋានក្នុងការពិចារណា។
ដោយឡែក ចំពោះការត្រៀមខ្លួនសម្រាប់ការបោះឆ្នោតឃុំសង្កាត់ឆ្នាំ២០១៧ ប្រមុខបក្សជួងរូបនេះបានប្រាប់ថា LDPបានរៀបចំសមាជិកឃុំសង្កាត់បាន១ភាគ៣ហើយ។ ចំណែកចំពោះបេក្ខជនតំណាងរាស្ត្រសម្រាប់ការបោះឆ្នោតជាតិ២០១៨វិញ លោកនៅមិនទាន់បង្ហើបឲ្យច្បាស់លាស់នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ