អ្នកវិភាគ៖ ទស្សនកិច្ចលោក ចន ឃែរី អាចមានឥទ្ធិពលលើនយោបាយផ្ទៃក្នុងនិងការបរទេសរបស់កម្ពុជា
លោក ចន ឃែរី រដ្ឋមន្ដ្រីក្រសួងការបរទេសអាមេរិក នឹងធ្វើទស្សនកិច្ចជាផ្លូវការពីរថ្ងៃ នៅកម្ពុជា នៅដើមសប្ដាហ៍ក្រោយ។ អ្នកវិភាគនយោបាយមើលឃើញថា ដំណើរទស្សនកិច្ចលោក ចន ឃែរី អាចនឹងមានឥទ្ធិពលលើនយោបាយផ្ទៃក្នុង ព្រមទាំងនយោបាយការបរទេសរបស់កម្ពុជា។ ផ្ទុយពីនេះ មតិខ្លះយល់ថា អាមេរិកឬប្រទេសណាក៏ដោយ ពិបាកនឹងបញ្ជ្រាបឥទ្ធិពលរបស់ខ្លួនលើប្រទេសកម្ពុជាណាស់ ព្រោះកម្ពុជា មានអធិបតេយ្យភាពស្មើមុខស្មើមាត់ជាមួយប្រទេសដទៃ។
ចុះផ្សាយនៅថ្ងៃ៖
ស្តាប់ - ០២:១៧
រដ្ឋមន្ដ្រីការបរទេសអាមេរិក លោក ចន ឃែរី (John Kerry) នឹងមកបំពេញទស្សនកិច្ចជាផ្លូវការរយៈពេលពីរថ្ងៃនៅកម្ពុជាចាប់ពីថ្ងៃទី២៥ ដល់ ២៦ ខែមករា ខាងមុខនេះ ដើម្បីជំរុញនិងពង្រឹង នូវទំនាក់ទំនងទ្វេភាគីរវាងប្រទេសទាំងពីរ។ ក្នុងអំឡុងពេលទស្សនកិច្ចនៅកម្ពុជា លោក ចន ឃេរី នឹងជួបជាមួយលោកនាយករដ្ឋមន្រ្តី ហ៊ុន សែន និងលោកឧបនាយករដ្ឋមន្ត្រី ហោ ណាំហុង រដ្ឋមន្រ្តីការបរទេសកម្ពុជា។ ក្រៅពីនេះ លោក ចន ឃេរី ក៏មានគម្រោងជួបជាមួយនឹងមន្រ្តីគណបក្សប្រឆាំង និងក្រុមអង្គការសង្គមស៊ីវិលផងដែរ។
គួរកត់សម្គាល់ថា ជាការកត់សម្គាល់ ដំណើរទស្សនកិច្ចរបស់ លោក ចន ឃែរី មកកាន់កម្ពុជា ធ្វើឡើងតែមួយខែប៉ុណ្ណោះ មុនពេលដែលប្រធានាធិបតីអាមេរិក ត្រូវជួបជាមួយមេដឹកនាំប្រទេសសហគមន៍អាស៊ាន នៅសហរដ្ឋអាមេរិក នៅពាក់កណ្ដាលខែកុម្ភៈខាងមុន។ ផ្អែកតាមរបៀបវារៈទាំងនេះ លោក អ៊ូ វីរៈ ប្រធានវេទិកាអនាគត និងជាអ្នកវិភាគនយោបាយ បានព្យាករណ៍ថា ដំណើរទស្សនកិច្ចរបស់ លោក ចន ឃែរី អាចនឹងមានឥទ្ធិពលលើនយោបាយផ្ទៃក្នុង ព្រមទាំងនយោបាយការបរទេសរបស់កម្ពុជា។
សម្រាប់នយោបាយផ្ទៃក្នុងកម្ពុជា លោក អ៊ូ វីរៈ យល់ថា ប្រមុខការទូតអាមេរិក នឹងស្វែងរកការសម្របសម្រួលណាមួយ រវាងគណបក្សកាន់អំណាច និងគណបក្សជំទាស់នៃកម្ពុជា ខណៈពេលដែលគណបក្សធំជាងគេទាំងពីរនេះ មានបញ្ហាជាច្រើនដែលមិនទាន់ត្រូវបានដោះស្រាយនៅឡើយ។ បញ្ហាដែលមានជាអាថិ៍ ការជាប់ឃុំរបស់សកម្មជនគណបក្សប្រឆាំងនៅក្នុងពន្ធនាគារ ក៏ដូចជារឿងក្ដីក្ដាំតាមផ្លូវតុលាការ ជាមួយលោក សម រង្ស៊ី ប្រធានគណបក្សសង្គ្រោះជាតិ។
ដោយឡែក សម្រាប់នយោបាយការបរទេសវិញ ប្រធានវេទិកាអនាគត អះអាងថា អាមេរិកត្រូវការឲ្យកម្ពុជា ឈប់ដើរតួជាឧបករណ៍របស់ប្រទេសចិន។ បើតាមលោក អ៊ូ វីរៈ ទំនាក់ទំនងជិតស្និទ្ធរវាងកម្ពុជា និងចិន គឺជាឧបសគ្គសម្រាប់ឧបទ្វីបអាស៊ីអាគ្នេយ៍ និងសហគមន៍អាស៊ាន។
ស្រដៀងនឹងការលើកឡើងរបស់លោក អ៊ូ វីរៈ ដែរ សាស្ត្រាចារ្យវិទ្យាសាស្ត្រនយោបាយ លោក សុខ ទូច អះអាងពីរបៀបវារៈនយោបាយផ្ទៃក្នុង និងនយោបាយការបរទេស ដែលលោក ចន ឃែរី អាចនឹងលើកទៅជជែកជាមួយរដ្ឋាភិបាលកម្ពុជា។ ប៉ុន្តែសម្រាប់សាស្ត្រាចារ្យរូបនេះ អាមេរិក ពិបាកនឹងបញ្ជ្រាបឥទ្ធិពលរបស់ខ្លួនលើប្រទេសកម្ពុជាណាស់ ព្រោះកម្ពុជា មានអធិបតេយ្យភាពស្មើមុខស្មើមាត់ជាមួយប្រទេសដទៃ។ និងថា ការជជែកក្នុងនាមប្រទេសជាមិត្ត គឺជារឿងមួយ។ ប៉ុន្តែការសម្រេចយ៉ាងណានោះ គឺស្ថិតនៅលើកម្ពុជាតែប៉ុណ្ណោះ។ នេះបើតាមលោក សុខ ទូច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ