អ្នកនាំពាក្យថា មតិរបស់លោក សម រង្ស៊ី ចំពោះ គ.ជ.ប ថ្មី ជា«យុទ្ធសាស្ត្រនយោបាយ»
ថ្ងៃអាទិត្យនេះ ប្រតិកម្មបានធ្លាក់មកពីអ្នកនាំពាក្យឱ្យគណៈកម្មាធិការជាតិរៀបចំការបោះឆ្នោត បន្ទាប់ពីលោក សម រង្ស៊ី បានសរសេរតាមហ្វេសប៊ុកកាលពីថ្ងៃសុក្រ ដោយបង្ហាញអំពីការមិនទាន់ទុកចិត្តទាំងស្រុងលើ គ.ជ.ប ថ្មី ដែលប្រធានគណបក្សសង្គ្រោះជាតិនេះ បានរួមបង្កើត។
ចុះផ្សាយនៅថ្ងៃ៖
ស្តាប់ - ០២:១៨
កាលពីថ្ងៃសុក្រ លោក សម រង្ស៊ី ប្រធានគណបក្សសង្គ្រោះជាតិ បានថ្លែងតាមយៈទំព័រហ្វេសប៊ុកផ្លូវការរបស់ខ្លួនថា៖ «បើ គ.ជ.ប. ត្រឹមត្រូវជាងមុន យ៉ាងតិច៦២នាក់ ជាសមាជិកគណបក្សសង្គ្រោះជាតិ ដើម្បីនាំមកនូវការផ្លាស់ប្តូរដែលប្រជារាស្ត្រខ្មែរចង់បាន» សម្រាប់ការបោះឆ្នោតអាណត្តិទី៦ ឆ្នាំ២០។
នៅថ្ងៃអាទិត្យនេះ អ្នកនាំពាក្យឱ្យគណៈកម្មាធិការជាតិរៀបចំការបោះឆ្នោត បានថ្លែងថា អ្នកនយោបាយតែងតែប្រើ«យុទ្ធសាស្ត្រ»ដើម្បីឈ្នះគូប្រកួត។ ការណ៍នេះធ្វើឱ្យលោក ហង្ស ពុទ្ធា ចាត់ទុកថា សាររបស់លោក សម រង្ស៊ី ជា«សម្ដីយុទ្ធសាស្ត្រសម្រាប់អ្នកនយោបាយ»។
ក្រោយការបោះឆ្នោតសភា ឆ្នាំ២០១៣ គណៈកម្មាធិការជាតិរៀបចំការបោះឆ្នោតថ្មី បានកើតឡើងដោយមានសមាសភាព៩រូប ក្នុងនោះ៤រូបមកពីគណបក្សកាន់អំណាច និង៤រូបមកពីគណបក្សប្រឆាំង ដែលមានអាសនៈក្នុងរដ្ឋសភា ក្រោមកិច្ចព្រមព្រៀងនយោបាយរវាងគណបក្សប្រជាជនកម្ពុជា និងគណបក្សសង្គ្រោះជាតិផ្ទាល់។ លោក ហង្ស ពុទ្ធា គឺជាសមាសភាពទី៩ មកពីសង្គមស៊ីវិលកម្ពុជា។
«ទុកចិត្ត ឬមិនទុកចិត្ត គឺជាការគិត ហើយក៏ជាមតិយោបល់ផ្ទាល់ខ្លួន»របស់លោក សម រង្ស៊ី។ នេះជាសម្ដីរបស់អ្នកនាំពាក្យឱ្យ គ.ជ.ប ដែលបានគូសបញ្ជាក់បន្ថែមថា សមាជិកទាំងអស់នៃ គ.ជ.ប «ធ្វើការសម្រេចចិត្តរួមគ្នា (...) តាមច្បាប់ និងកិច្ចព្រមព្រៀងដែលគណបក្សទាំងពីរបានធ្វើជាមួយគ្នា»ដោយ«រក្សាបាននូវអព្យាក្រឹតភាពរបស់ខ្លួន» និង«កំពុងតែដើរក្នុងផ្លូវឯករាជ្យ»។
ចំពោះនាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (COMFREL) វិញ «ការងារត្រូវការការត្រួតពិនិត្យ និងការជំរុញជានិច្ច ដើម្បីឱ្យស្ថាប័នមួយ[មាន]ដំណើរការលើផ្លូវត្រូវ»។ បើតាម លោក គល់ បញ្ញា អង្គការខុមហ្វ្រែលរបស់លោក កំពុងឃ្លាំមើលការជ្រើសរើសមន្ត្រីឱ្យមកបម្រើការនៅអគ្គលេខាធិការដ្ឋានរបស់ គ.ជ.ប ក៏ដូចជានៅតាមការិយាល័យរបស់ គ.ជ.ប នៅថ្នាក់ក្រោមជាតិ ដើម្បីឱ្យដឹងថា អ្នកប្រតិបត្តិទាំងឡាយ ត្រូវបានជ្រើសរើស«តាមនីតិវិធីត្រឹមត្រូវឬអត់»។
លោក គល់ បញ្ញា យល់ស្របថា «អ្នកនយោបាយមានមតិភាគច្រើនដើម្បីយកប្រៀបចំណេញខាងនយោបាយ»។ ទោះបីជាយ៉ាងណាក៏ដោយ នាយកប្រតិបត្តិអង្គការខុមហ្វ្រែល លើកឡើង ថា គណបក្សសង្គ្រោះជាតិ«មិនអាចដកការទទួលខុសត្រូវ»របស់ខ្លួន ចំពោះកូនដែលបានបង្កើតជាមួយគណបក្សប្រជាជនកម្ពុជាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ