លោក កឹម សុខា ៖សង្គ្រោះជាតិ ស្ថាប័នរដ្ឋ និង ពលរដ្ឋ ត្រូវការពាររដ្ឋធម្មនុញ្ញរួមគ្នា
គណបក្សសង្គ្រោះជាតិ នៅព្រឹកថ្ងៃសៅរ៍នេះ បានប្រារព្ធទិវាប្រកាសប្រើរដ្ឋធម្មនុញ្ញលើកទី២៣នាទីស្នាក់ការគណបក្សសង្គ្រោះជាតិ។ ឆ្លៀតក្នុងឱកាសនោះលោក កឹម សុខា ប្រធានស្ដីទីបក្សបានលើកឡើងថា ទាំងរូបលោកផ្ទាល់ គណបក្សសង្គ្រោះជាតិ ស្ថាប័នរដ្ឋ និង ពលរដ្ឋ ត្រូវការពាររដ្ឋធម្មនុញ្ញដែលជាច្បាប់កំពូលរបស់ប្រទេស។
ចុះផ្សាយនៅថ្ងៃ៖
ស្តាប់ - ០២:០៣
ថ្លែងនៅចំពោះមុនអ្នកគាំទ្រជាច្រើននាក់ លោក កឹម សុខា បានគូសបញ្ជាក់បន្ថែមថា នៅក្នុងប្រទេសកម្ពុជាគ្មានអ្វីធំជាងរដ្ឋធម្មនុញ្ញនោះទេ ហើយរាល់ការតាក់តែងសេចក្ដីព្រាងច្បាប់ត្រូវធ្វើឲ្យស្របនឹងរដ្ឋធម្មនុញ្ញ។ ដូច្នេះទាំងរូបលោក គណបក្សសង្គ្រោះជាតិ ស្ថាប័ននានារបស់រដ្ឋ និង ពលរដ្ឋត្រូវនាំគ្នាការពាររដ្ឋធម្មនុញ្ញ។
សម្រាប់ លោក កឹម សុខា បុព្វកថានៃរដ្ឋធម្មនុញ្ញគឺជាចំណុចរឹតតែសំខាន់ទៀតដែលនាំភាគីខ្មែរមូលមាត់គ្នាឈានទៅរកការផ្សះផ្សារ ឯកភាពជាតិ និង បង្រួបបង្រួមជាតិទាំងមូល។ លោកអះអាងថា ការកកើតនៃរដ្ឋធម្មនុញ្ញបន្ទាប់ពីខ្មែរមានការបែកបាក់ ។ ហើយលោកអំពាវនាវឲ្យខ្មែរគ្រប់ភាគីនាំគ្នាមើលខ្លឹមសារនៃរដ្ឋធម្មនុញ្ញដើម្បីបញ្ចៀសការឈ្លោះគ្នារវាងខ្មែរនិងខ្មែរ។
លោកប្រធានស្ដីទីបក្សសង្គ្រោះជាតិរូបនេះ ក៏ស្នើឲ្យពលរដ្ឋធ្វើជាសាក្សីនៃពាក្យសម្បថដែលមានចែងនៅក្នុងរដ្ឋធម្មនុញ្ញ។ ខ្លឹមសារសង្ខេបនៃពាក្យសម្បថក្នុងរដ្ឋធម្មនុញ្ញគឺជាការជម្រុញឲ្យអ្នកនយោបាយមានការគោរពច្បាប់ដោយស្មើភាព។ ថ្លែងដោយប្រយោលលោក កឹម សុខា ថា គ្មានអ្នកណាម្នាក់ធ្វើអំពើអ្វីមួយដោយល្អឥតខ្ចោះនោះទេ ប៉ុន្តែចាំបាច់ទាមទារឲ្យមានការឆ្លុះបញ្ចាំងសកម្មភាពរបស់អ្នកនយោបាយ។
សម្រាប់ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានស្វាគមន៍ជំហរបេ្ដជ្ញាចិត្តរបស់លោក កឹម សុខា ។ ប៉ុន្តែលោក សុខ ឥសាន ស្នើឲ្យលោក កឹម សុខា អនុវត្តជំហរនេះឲ្យបានជាក់ស្ដែង។ ព្រោះលោក សុខ ឥសាន មើលឃើញថា កន្លងមកលោក កឹម សុខា បានរំលោភសិទ្ធិតុលាការដែលផ្ទុយពីខ្លឹមសារដែលមានចែងក្នុងរដ្ឋធម្មនុញ្ញ។
ដោយឡែក ក្រៅពីការថ្លែងរបស់លោក កឹម សុខា មន្ត្រីជាន់ខ្ពស់គណបក្សសង្គ្រោះជាតិផ្សេងទៀតក៏បានឡើងថ្លែងពីជំពូកនិមួយៗដែលមានចែងក្នុងរដ្ឋធម្មនុញ្ញពីចំណុចខ្វះខាតនៅក្នុងការអនុវត្តរបស់រដ្ឋាភិបាលទាក់ទងនឹងវិស័យ អប់រំ សុខាភិបាល កសិកម្មជាដើម។
សូមបញ្ជាក់ថា រដ្ឋធម្មនុញ្ញកម្ពុជាបានកកើតឡើងនៅក្នុងឆ្នាំ១៩៩៣ ដោយបង្កើតឡើងរួមគ្នាពីសំណាក់គណបក្សចំនួនបួនក្នុងនោះរួមមានៈ គណបក្សប្រជាជន គណបក្សហ៊្វុន ស៊ិនប៉ិច គណបក្ស លោក សឺន សាន និង គណបក្សម៉ូលីណាកា។ ហើយខ្លឹមសារសំខាន់ៗនៃរដ្ឋធម្ម នុញ្ញបានយកមូលដ្ឋានគ្រឹះពីកិច្ចព្រមព្រៀងសន្តិភាពទីក្រុងប៉ារីសស្ដីពីបញ្ហាកម្ពុជាថ្ងៃទី២៣តុលាឆ្នាំ១៩៩១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ