ពេលថ្មីៗនេះ រដ្ឋាភិបាល និងក្រសួងបរិស្ថាន បានប្រកាសជំហរការពារធនធានធម្មជាតិ រហូតដល់មានការប្តេជ្ញាចិត្តសហការជាមួយបណ្តាញសហគមន៍ព្រៃឈើ ព្រមទាំងមានការដោះលែងសកម្មជនការពារបរិស្ថានថែមទៀតផង។ ប្រមុខរដ្ឋាភិបាលកម្ពុជា ពីម្សិលមិញ ក៏បានជំរុញឲ្យមានការយកចិត្តទុកដាក់ ចាប់ដៃធ្វើការជាមួយគ្នាបន្ថែមទៀត ដើម្បីសម្រេចគោលដៅតែមួយ គឺការពារធនធានធម្មជាតិ។ លោកនាយករដ្ឋមន្ត្រីថែមទាំងបានលើកសរសើរអ្នកចម្រៀងល្បីម្នាក់ដែលចូលរួមការពារបរិស្ថាន និងចាត់ទុកថាជាគំរូល្អ។ ដូច្នេះ ស្របពេលជាមួយនឹងរដូវវស្សាដែលអំណោយផលដល់ការដាំកូនឈើផង ហេង ឧត្តម អ្នកកាសែតវិទ្យុបារាំង សូមណែនាំលោកអ្នកនាងស្តាប់ ឲ្យស្គាល់កន្លែងបណ្តុះកូនឈើសម្រាប់លក់ពីរបីកន្លែង ដែលគេអាចរកទិញកូនឈើក្នុងតម្លៃថោកសមរម្យ។
